曾志偉高調揸旗 新抱王敏奕風騷搶fo 等做星夢下任一姐

撰文：東方新地 圖片：東星圖片、東方新地圖片、無綫娛樂新聞台截圖

「一姐」菊梓喬靠邊站

昨日的記招，王敏奕備受記者追訪，至於「一姐」菊梓喬亦變得黯淡無光，在星夢歌手大合照期間要「靠邊站」！

王敏奕淡定有靠山

這日曾志偉以揸FIT人姿態開破冰記者會，多位十幾年冇踏足無綫的唱片公司高層亦俾面力撐，新人事新作風，星夢歌手亦拉大隊出席，除了一哥周柏豪外，盛傳將會冇運行的菊梓喬及產後出山再爭一姐的吳若希成為焦點，不過全場最搶鏡的就是王敏奕，去年才簽星夢的王敏奕當然要捧老爺場，還被記者要求除口罩影相及單獨接受訪問。

王敏奕表現風騷笑唔停

去年加盟星夢的王敏奕，在樂壇仍未有代表作，她出席「音樂永續 樂壇同享」記者會時問到何哲圖離職對她工作可有影響？她表示影響不大，還趁拍劇空檔亦安排了錄歌。

「老爺」加盟係開心事 同公司唔怕尷尬

問到老爺曾志偉接管無綫的音樂業務對她的發展會有很大的幫助？她坦言公司一視同仁：「我一直畀心機做好自己嘢，亦努力學唱歌、跳舞、樂器。（網友睇好你攞最受歡迎女歌星？）我會努力嘅，哈哈，畀大家睇到我嘅誠意。（但身份會唔會尷尬？）真係有留意我嘅人會知道我向來畀心機，老爺入公司係好開心嘅事，有好多好嘅諗法。」現場所見，王敏奕好風騷笑唔停，冇見一排成個人飽滿咗，面上充滿光彩，一睇就知有運行。

去片：無綫啟動《音樂永續》計劃

曾志偉致詞時表示，活動除咗提供「就業機會」，更希望大家有機會「發放正能量」；又介紹TVB新上任音樂部管理人何麗全先生。一眾歌手亦齊聚電視城，輪流發表佢地對之後嘅樂壇新景象嘅睇法：

由國際唱片業協會（香港會）推行嘅《音樂永續》計劃，今日於電視城舉行記招。TVB綜藝、音樂製作及節目副總經理曾志偉、以及各唱片公司高層、音樂品牌代表及歌手都有出席。《音樂永續》計劃目的為廣邀音樂人重新編製經典音樂，讓音樂「永續」。（影片來自娛樂新聞台）