文凱婷懶理「狐仙」負評伸脷po相曬名牌 前導師男友被怒轟無道德！

湛耀東名譽一鋪掃地 炎明熹恩師怒發聲明割席

湛耀東來頭極之猛料，喺炎明熹先前就讀嘅歌唱學校授課，據知該學校在業界聲譽極為良好，成功培育唔少歌唱精英。今次咁樣搞法，學校無辜受害被轟老師戀上學生妹無師德，搞到屬學校負責人嘅炎明熹恩師，嬲嬲豬出聲明割蓆保持學校聲譽，喪插對方毫無職業道德：「不動聲色在同一地區轉移學生作其私下教學活動，本學院管理層對湛耀東的誠信及行為表示極度失望，並就此嚴重違反合約協議舉動多次要求對方作出合理回覆及道歉未果。」

學校負責人高晨維其後留言寫道：「多謝各位朋友的關心，本來都唔諗住repost，但收到太多朋友問候，我想講：最傷心的階段已經過去，的確有好傷心、難過的時候，現在一切已交由公司管理層及律師處理，我會繼續專心教學的工作，多謝大家關心。」

文凱婷懶理負皮心情靚爆po相狂曬名牌入門級皮帶

雖然網民矛頭指向文凱婷做狐狸精，迫走湛耀東正印，出招冧掂親家奶奶「邪花入宅」，但係文凱婷心情依然靚爆，完全唔理負評，仍然開心喺IG分享靚相，又伸晒條脷出嚟，一時又笑到四萬咁口，畀網民話春心蕩漾，仲大曬Gucci皮帶一副貴族女嘅感覺，擺明show Off畀你睇！經過翻查資料，我哋發現文凱婷戴住嘅GUCCI皮帶唔算高檔貨，只係屬於該牌子嘅入門貨色，盛惠港幣$4000元，但以文凱婷不受大台重用，出騷錢向來唔夠炎明熹同姚焯菲撼來計算，呢條皮帶已經算係落重本！

疑做小三惹公憤 網民留言鬧爆

文凱婷今次疑似做小三嘅消息流出，搞到班聲夢Fans都唔幫佢，仲話文凱婷影衰晒聲夢，拖累炎明熹同姚焯菲等人嘅正面形象，加上文凱婷依然我行我素po靚相，搞到網民完全嬲嬲豬！我哋一齊睇吓網民點樣鬧文凱婷：「不知所謂的人！歌唔係唱得好，人品又差，早日退出娛樂圈」、「唱首第三者聽吓」、「如果文小姐仲有良知，唔該你立即同東sir分手，同埋開記者會向支持聲夢既粉絲、aeren專屬粉絲同埋火雞道歉」、「我最擔心係其他聲夢14個因你1個壞份子而影響佢地，因為其他聲夢學員都係好純品，希望tvb高層嚴肅處理此事」、「文小姐心虛啊，刪我帖，我身為聲夢粉絲，對你今次做既所作所為極度失望，聲夢之恥！」

文凱婷玩忘年師生戀 傳做小三搞散正室

早前有消息爆出22歲少艾文凱婷激玩師生戀，男友大足自已17年，身份疑是唱歌導師湛耀東（Waye Cham）！消息愈爆愈勁，有指文凱婷仲「越級挑戰」嗒人男友，消息話對方有位拍拖多年的正印，捱得義氣陪湛耀東走過低谷，但自從舊年文凱婷殺入兩人戀情，搞到當時湛耀東嘅正室苦苦不樂，令男方與女友分晒手飲恨收場。自此文凱婷得米升晒檔次做正室，更與湛耀東開心歐遊嘆世界！

文凱婷疑冧掂「奶奶」 獲認可

消息指文凱婷與湛耀東曾前後腳赴澳洲嘆世界，把臂同遊勁甜蜜，惟「神隊友」的湛耀東媽媽唔覺意將「合家幅」上載至社交平台，搞到呢段忘年師生戀斷正曝光。消息話湛耀東媽媽刻意用emoji幫文凱婷遮臉，更言：「一家人齊齊整整！」此舉疑反映文凱婷升晒檔次，短短時間融入親家冧掂奶奶獲晒認可，更被認定家人，發展厲害！惟事後湛耀東媽媽疑想「補獲」，火速下架照片！

文凱婷認陷忘年師生戀 堅決否認做「狐狸精」

消息震撼網民，22歲文凱婷對事件亦有回應，承認搭上大自己17年嘅前歌唱老師，仲指戀情處蜜運階段，但堅決否認自己做「狐狸精」整走正室：「我同我男朋友一齊嘅時候，大家都係單身狀態！」

文凱婷中學班相激罕流出 就學期間冧得老師歡心

有讀者爆料文凱婷中學往事，因其招牌嘟嘴樣經常被嘲「雞泡魚」，她多次參加學校歌唱比賽晒功架，當時仲係典型乖乖女受盡學校重用，並就讀地區英中名校，就連畢業典禮都企正C位明得老師歡心，多年專讀精英班主修生物學，中學大型節目做慣主持晒流利英文，惟公開試成績失晒手無緣晉身八大，要靠自資學位升學，放榜當日飲恨喊晒口。得知文凱婷疑做小三消息流出，該讀者感到非常錯愕，指與以前判若兩人！