23歲丁子朗自爆勁冧湯洛雯 公然向46歲馬國明挑機？！

原文刊於《東方新地》

馬明靚湯不時社交網晒愛

馬國明（馬明）和湯洛雯（靚湯）自今年6月公開戀情後，不時社交網晒愛，一時「定情公仔」、「愛的手機殼」，又著「情侶Tee」放閃，而每次雙方出Po，兩人都必定點讚、留言隔空傳情，Sweet到不得了！不過，呢日就有23歲丁子朗踩場，自爆好鍾意靚湯！提起女神仲一副冧滋滋！

丁子朗自爆好鍾意湯洛雯

無綫力捧上位的幾位新晉小生余德丞、吳業坤、黃庭鋒、丁子朗齊齊接受邵氏節目《TIGER’S TALK》主持伍詠薇及林盛斌（Bob）的訪問。兩位主持問到四位心目中的女神同事是誰時？丁子朗就一臉「天然呆」咁話自己好鍾意湯洛雯，直言未入行已經喜歡她，他謂:「我真係覺得佢好靚！」一旁的余德丞仲爆料話，靚湯上《娛樂大家》節目時，丁子朗不停跟她說：「我好鍾意你！你好靚！」阿Bob即追問：「會否嬲咗馬國明？」，好彩丁子朗兜得快：「唔會，女神只可遠觀而不可褻玩！」誰知，吳業坤即寸他謂：「咁你即係話馬國明褺玩佢？」一旁的伍詠薇即打他謂：「死仔！人哋拍拖你話人哋褻玩！」超級搞笑！

其實丁子朗已經唔係第一次話鍾意靚湯，喺上年出席活動時，佢已經自爆入行前已好鍾意靚湯，更直認入行認識女神後，都有讚她靚！睇嚟，女友咁受歡迎，即使落咗訂嘅馬明！都係睇緊好！