《戰毒》警匪片變鬧劇 莊思敏Ironman上身

原文刊於《東方新地》

網民感被侮辱

《戰毒》喺內地網豆瓣電影首播前，內地粉絲本來非常之期待，呢部劇號稱4A，陣容超A、角色超A、劇情超A同製作超A，點知第一集播完，有二千幾位內地觀眾評分，只得4.8分，大部分網民都話劇情好唔合情理，簡直係侮辱佢哋嘅智商。

有指《戰毒》兩大主角黃宗澤加吳卓羲本來就已經冇新意，而且又做好友又做警察，令人誤會係無綫嘅《飛虎》系列，只係改咗個內地名。不過最出事都係劇情，第一集真係有多個笑位，套劇係講緝毒，不過警方次次行動都打草驚蛇，高調行動成日走犯。

變性人最打得

再嚟就係動作場面誇張得唔合理，飾演泰國毒犯嘅莊思敏係變性人，每次出場好似去時裝表演咁，販毒都咁高調，對住班警察可以一打十，打到飛起佢都可以氣定神閒，直頭Ironman上身一樣，仲一腳就踢死個警察，最後受到眾多警察圍剿，莊思敏竟然可以使出輕功逃走，全身而退。一部警匪片拍到似搞笑片，勁多穿崩反駁位，其實都幾失敗。