《愛回家》吳偉豪金毛女友黐身監控 「翻版吳彥祖」唔讀大學做藝員

原文刊於《東方新地》

吳偉豪上位中認愛有危機

戀情被踢爆後，吳偉豪直認不諱，但他明顯仍未有心理準備公開戀情，對女友的身份避而不談，據知情者透露：「Ricco（吳偉豪）知道上緊位唔可以亂嚟，只要行錯一步就可以前功盡廢，所以佢同女友講過現階段只可以維持地下情，不過Charlotte就唔係咁諗，Ricco咁受女仔歡迎而且仲後生，佢覺得一日唔宣示主權，好快就箍唔住Ricco，咁高調咁有機心放啲去酒店Staycation嘅合照上社交網，無非都係想有人發現，焗個男嘅認愛，其實只要識得Ricco或者有跟開佢社交網，一睇就會聯繫到成件事，不過Ricco拍拖經驗淺為人又純品，佢唔會諗女友係有心，所以好坦白咁認愛，公司唔多唔少有畀壓力，以後佢只會更加低調同小心。」吳偉豪形象正氣健康，不過金毛女友Charlotte外表就好妖艷，在其社交網內有惹火三點式照，又有身穿喱士睡衣的床照，張張都係好厚粉，個樣好膠亦好唔自然，Charlotte亦做戲做全套，在戀情曝光後即把社交網轉做私人帳戶。

金毛女友做貼身司機等放工

吳偉豪被封新一代男神，受到不少女粉絲追捧，再加上無綫中有為數不少的青春小花，Charlotte又怎會放心？原來她早已採取人盯人策略，本刊記者發現，吳偉豪幾乎每次返回將軍澳電視城開工，都由Charlotte做司機管接送，男友開工她就在車廂中等放工， 做 個 廿 四 孝 貼 身 女 友。 知 情 者說：「Charlotte好樂意做司機接送Ricco，因為咁樣佢就可以完全掌握男友行蹤，又可以日對夜對，真係好黐身。」

「翻版吳彥祖」唔讀大學做藝員

正所謂情人眼裡出西施，即使女友年紀稍大，吳偉豪未有嫌棄依然認愛，可見真愛無誤，但他會否為這棵樹放棄整個森林仍然言之尚早。可以肯定的是吳偉豪對演藝事業充滿決心，五年前他中學畢業後放棄升讀大學，在父親鼓勵下投考第廿八期無綫藝員訓練班，在不少劇集做過大配角，因為外形討好貌似吳彥祖，所以被安排加入《愛•回家》大家庭，先在第三輯《八時入席》飾演「禾仔」，再於第四輯《開心速遞》飾演「朱凌凌」，本來是排骨仔的他，經過多年健身操練，到現在擁六嚿腹肌成為力捧小生，一切得來不易，13歲已擁有跆拳道黑帶的他，近年繼續向武術發展，學習詠春、八斬刀等，希望習武對演藝事業有幫助，可以演更多不同角色。22歲的吳偉豪就算再捱多十年亦只是32歲，前途無可限量，不過金毛女友Charlotte再過十年就四張幾，唔知呢段姊弟戀守唔守得住呢？