童星出身配音員張預東爆離TVB原因：太多口號講起都反胃

文：東方新地｜圖：新傳媒圖片庫、張預東FB圖片及YouTube影片截圖

張預東：我同TVB嘅目標觀眾係兩批人

現年32歲的「東東」張預東（前名張裕東）曾在90年代TVB兒童節目《閃電傳真機》及2000年兒童節目《至NET小人類》做過小主持，又曾在1998年TVB劇集《烈火雄心》中扮演消防總隊目兒子，以及在1999年劇集《雙面伊人》中飾演曹永廉角色的童年版。

小時候的張預東更參演過《賭神3之少年賭神》及《風雲雄霸天下》等電影，飾演過主角黎明及郭富城的童年版。

1995年張預東開始兼任自由身配音員，到2004年他曾離開TVB，2008年1月又重返無綫並正式轉往配音組，直至2021年1月7日他決定裸辭再次離開TVB。

張預東直言自己5、6歲時第一次跟TVB簽約，斷斷續續已合作22年，他表示離開原因係「死心」，他說：「呢間公司好多想法同做法，同我好唔一致，咁我一個人係改變唔到咁大間公司，但TVB亦改變唔到我。我想同TVB入面嘅人講，我想同舊同事講，你哋冇錯，係啲高層錯。我想同啲高層講，你哋好錯，做好多嘢都係好錯！」

張預東日前在其個人YouTube頻道上述說自己離巢原因，他表示：「離開工作咗22年嘅公司，係好難下決定。朋友問我會唔會後悔？ 我話唔會，試吓掉番轉諗吖，就係已經做咗22年，仲唔走等幾時？係咪？」

張預東在影片中直指TVB不肯聽取觀眾意見，甚至要同觀眾對抗，因此無論個表演有幾高質素、「揼」幾多製作費，也令觀眾只要見到TVB個LOGO都會想嘔，甚至想熄電視、轉台等，因此浪費了好多演出者的心機。

張預東表示公道些講TVB係有觀眾，但其目標觀眾和他自己的目標觀眾係兩批人，他說：「我根本就唔想為呢批人表演，我做咩要表演畀佢哋睇呢！咁辛苦，所以我咪走囉！但如果你仍然咁鍾意睇TVB，我尊重你，你覺得佢好睇你咪繼續睇佢囉。」

最難聽嘅口號係「帶領樂壇」

張預東又大呻：「呢幾年我講咗好多唔想講嘅對白，譬如『全港第一』、『領先全球』，仲有最難聽呢句、我真係覺得嘔心嘅係『帶領樂壇』，講起我都覺得想反胃！」

張預東憶述以前做TVB好威風，個個朋友都求他帶入電視城參觀和影相留念，最多是問他攞《獎門人》和《勁歌金曲》等節目的門票。

張預東直言在他走之前那幾年，TVB好多人都在考慮轉工，包括高層，他說：「以前的高層會同前線嘅演員、配音員、導演、製作組等打成一片，譬如以前喺清水灣電視城嘅Canteen，我哋稱呼為『舊Can』嘅一個邵氏中餐廳，可以飲啤酒，5、6點去食飯時會見到一班人喺嗰度飲酒、食煙、吹水，當中都有啲『大佬』喺度，佢哋都願意落嚟同啲員工一齊玩、一齊吹水。」

張預東續說：「本來我嘅配音事業都發展得幾唔錯，我隸屬嘅department最大粒嗰個應該都知道有我呢個人，但佢從來冇話同我哋溝通吓，呢樣嘢好緊要，做管理要知道下面前線嘅人面對緊咩情況、有咩唔開心、有咩可以改善。」

張預東又在另一段影片中透露他當年成為小童星的經過，他說：「本來想參加電視台兒童節目其中一個遊戲環節，點知一做就做咗咁多年。好彩～當年做童星收入算幾好，可以幫補吓家計。你地會唔會都諗過做童星或者俾自己小朋友做童星？」

另外張預東在社交網提到搵曾志偉、王祖藍做高層一事，他笑言：「TVB真係換咗高層。但係曾志偉王祖藍升做高層有咩好睇？李寶安余詠珊樂易玲下凡做藝人就好睇好笑喇～我笑定先，thx。」