張致恒被業主迫遷隨時瞓街 大肚老婆雯雯崩潰爆Seed：去邊先最安全？

張致恒雪上加霜

張致恒Steven早前與老婆雯雯鬧婚變，最後傾掂數又極速復合，更宣布再添新成員，被網民指關係唔好仲繼續生，影響下一代，張致恒與雯雯更反擊網友「窮有窮養」誓要組五口之家！一波未平，雯雯又在社交網爆Seed，今次唔係爆老公，係爆業主。

雯雯連環出po控訴

雯雯先後發了三篇限時動態，留言訴說業主無情：「日日睇新聞已經夠負面，但尋日收到嘅消息，完全令我崩潰成晚瞓唔到覺，一瞓着就彈起身喊！疫情嚴重到咁，周圍病菌，我又好快生，兩個仔又咁細，業主先話終止合約，我完全覺得好無助。」之後又話：「大公司就係大公司，打去求都無用，究竟出面咁嚴重，我又就生，帶住兩個咁細同啲狗，可以去邊先最安全。」其實呢啲事，都係交畀一家之主張致恒負責啦！

睇返之前嘅相關報道：

張致恒 回應被離婚

早前張致恒老婆雯雯突然單方面公開表示「正式離婚了」，雖然張致恒身在香港，但他沒有即時蒲頭，反而事隔3日才在社交網回應，原來兩公婆耍花槍，張致恒話同老婆溝通完會繼續行下去，不過字裡行間指自己犯過唔同嘅錯，真係唔知佢今次衰乜。可圈可點的是張致恒的最後一句「一家五口好好咁樣愛下去」，兩公婆加兩個仔都係一家四口，所以惹來雯雯已懷第3胎的揣測。

第5位家庭成員現真身！

張致恒所指的「一家五口」，真是耐人尋味，有指雯雯的近照著鬆身裙孕味濃，有第3胎都唔奇，不過網民更議論紛紛，直指張致恒唔應該再生第3胎，其後雯雯就在社交網上載了近日為其哥基愛犬慶祝6歲生日的照片，一直視愛犬如己出。正當大家都以為「一家五口，計埋隻狗」嘅時候，雯雯在大年初二突然開直播，更加自揭已經懷孕5個月！

網民問題幾乎有問必答

在IG直播全程影住「住家男」Steven湊住兩個小朋友，雖然雯雯全程冇露過面，但幾乎有問必答好畀面！當獲網友送祝福時，雯雯都連番多謝，不過並沒有透露過腹中塊肉的性別。至於被問到為何會突然間再度懷孕，Steven即以《世事如棋》憑歌寄意，仲話生多個都唔驚：「生兩個係攰，三個都係攰，不過聽聞女仔會文靜啲，陪呢個仔玩三個鐘唔識停。」另一方面，雯雯亦被問到早前提出離婚的事，她回答謂：「唔講啦，要講嘅都講咗。過年唔好講呢啲！不過的確有啲人，見到你唔好就好開心咁。」網民又問懷第三胎是否因為沒有避孕，雯雯亦表示：「呢個問題重要咩？無論如何都係一份福氣。（有勇氣！）冇勇氣㗎，但都係一份禮物嚟嘅。（驚冇書讀？）呢個世界冇絕路，轉變就得。」之後Steven仲補充話自己而家好多工開，叫網友唔使擔心！

早前傳出雯雯懷第三胎，不少網民畀嬲嬲

睇返早前嘅報道：

張致恒返港後過完「家庭日」隔幾日就話離婚

2022年1月27日，雯雯突然在IG限時動態上寫道：「分開不代表完結，只是讓大家過得更好的。今天我們正式離婚了，我也真心祝福你能夠幸福。」而Steven暫時未有回應。其實早前張致恒有一段時間北上搵銀，需與家人分隔兩地，不過近日他已經返咗香港，日前雯雯更曾於IG分享Steven與兩個仔仔到公園玩的影片，睇落相當溫馨。再數遠少少，張致恒在12月身在內地時，亦有透過IG寫下想念家人的心情，更分享了雯雯和兩個囝囝在香港過聖誕的相片並寫下：「辛苦老婆喺屋企為我睇住頭家，老公會呀我（老公我會）好努力工作，希望下年聖誕節可以一家人一齊過，我愛你啊老婆。」事隔才大約一個月，估唔到雯雯突然表示「離婚」，當時令人相當驚訝。

2021年曾揚言「關係結束」

其實雯雯於社交網出po講「關係結束」之後，張致恒的婚變傳聞甚囂塵上，期間張致恒曾透過經理人回應傳媒，表示張致恒正身在內地開工，澄清婚變只屬傳聞，不過就承認日前雯雯心情不好，張致恒多謝大家的關心及報道，仲話因為返國內工作，雯雯要照顧小朋友有時壓力大。對於張致恒是否要花時間氹回雯雯，經理人表示張致恒會去處理，他們會沒事的，現階段張致恒好努力工作搵錢養家，不過他的家事就不方便講太多。

直播中途雯雯殺出

其實在「關係結束」發生之前，在一次張致恒玩抖音直播中途曾經出現老婆雯雯突然留言：「打畀我！」據說當時張致恒匆匆唱埋首歌就收檔，應該是急住回雯雯電話，老婆要踩入直播搵人，應該都好大件事。

人妻人母唔易做

全職媽媽從來都唔易做，雯雯既要照顧只有2歲的天寶和1歲的天牧，還要擔心老公張致恒，相信身心都疲累，其實她亦曾在社交網寫文訴辛酸，她說：「生咗小朋友嘅媽媽，有冇發現自己愈嚟愈冇存在感，亦都唔知道自己嘅存在價值喺邊。呢兩日我簡直係崩潰狀態，照顧住兩個小朋友，再加上好多屋企唔同嘅突發事，再加埋自己病得好犀利，無論係心理身體生理都完全錯晒。上呼吸道炎，如果除咗長期戴口罩，有其他辦法唔會傳到畀屋企就好。」

張致恒 是非未停過

張致恒近年負面新聞不絕，與太太區燕雯（雯雯）於19年奉子成婚，兩年抱兩，一腳踏兩船又欠債的新聞，令他形象插水，更曾一度被迫轉行，雖然婚姻關係不被看好，但他曾揚言會努力搵錢養家，照顧太太及兩個仔。但如今突然驚現離婚的消息，到底原因何在，的確耐人尋味！

重溫：張致恒為愛兒報讀幼稚園遭歧視

正所謂「禍不及妻兒」，但總是有人會將兩者聯想起來，全因張致恒2歲兒子張天寶已到可入讀幼稚園之年，作為爸爸的張致恒當然要為愛兒尋找心儀的學校，但當張致恒為仔仔報名時，卻遭到學校校長歧視，令張致恒大為氣憤，更在社交網上發文表示：「其實真係好嬲，雖然我係曾經犯過好多錯，大家唔原諒我唔緊要，但係點解我同個仔去報名幼稚園要畀個校長歧視，難道我個仔就唔配讀書嗎？有一個咁樣嘅爸爸就唔可以係呢個社會立足嗎？你作為一個幼稚園嘅校長講到自己唔會放過任何一個教小朋友嘅機會，就要講到明因為我嘅原因唔畀我個仔機會讀書嗎？ 邊間幼稚園我就唔講啦，費事話我影響佢名氣！」

相關文章：

張致恒禍累下一代？發文大呻為愛兒報讀幼稚園遭歧視

網友鬧爆：唔係歧視，係驚你冇錢交學費

張致恒的貼文一出，有不少媒體報導，網友看到後也紛紛留言直指張致恒自己所犯的過錯，現已累到下一代：「唔係歧視，係驚你冇錢交學費，或者驚有人去幼稚園追債」、「自己累咗個仔，仲好意思攞出嚟講」、「驚佢欠學費唔肯交」、「一向都係父債子還㗎啦。唔係未聽過呀」、「信用評價丫，大佬。影響三代」、「與其指責人歧視，不如檢討吓自己點解畀人感覺不可信～ 禍害個仔嘅係身為人父嘅自己囉～」等等。

雯雯：佢只係犯咗10個有9個男人會犯嘅錯

張致恒太太雯雯看到廣大網友都大鬧她的老公張致恒，昨晚（26日）即在其社交網上列出十個重點來反擊網友，為老公出頭：

雯雯留言全文：
1. 我個仔冇報任何名校。
2. 我個仔冇報任何喺九龍塘嘅學校 。
3. 我個仔係未做任何學校嘅面試。
4. 身教係好重要，但係我個仔爸爸唔係殺人犯，佢只係犯咗10個有9個男人會犯嘅錯，咁樣並唔代表佢個仔一樣會犯呢個錯。
5. 我個仔只有兩歲半，佢將來會係一個點樣嘅人冇人可以預知，所以冇人有資格去批評佢。
6. 如果一個小朋友連面試都未面，個校長就話唔收，咁樣會唔會太過有問題。
7. 我哋從來冇渴望過一定要入呢間學校，冇接觸過個小朋友就話唔收，我都唔會想我小朋友讀一間咁樣嘅學校。

8. 你哋全部都只係睇表面，只係喺度停留係一件2019年發生嘅事，而家都已經2021年，如果呢段時間你哋係有喺張致恒身邊同佢相處，兩年後嘅佢係一個點樣嘅人，你就有資格去講，但係如果你仲停留喺兩年前，咁不如你而家了解咗先去評論咁多嘢。
9. 我哋係窮，但係並唔代表我個小朋友冇資格去讀書。
10. 我係唔會畀任何一個機會有人可以去傷害我嘅小朋友！