29歲張曦雯坐正踢走李施嬅 《法證先鋒IV 》換班底急埋班
原文刊於《東方新地》
張曦雯放棄化小丑妝為新一輯埋伏筆
《法證先鋒IV》已曲終人散，之前本刊披露監製梅小青改結局為開《法證V》鋪路，《法證IV》結局就再出現新的小丑伏屍案，還穿插著張曦雯演的高善當年被拐走及她一個凌厲眼神的畫面，令劇情發展充滿懸疑，就連被安排成為結局Big Boss的張曦雯事前亦不知道會有如此安排。她表現驚訝說：「都係睇到結局先知自己係Big Boss ！小青姐一路都冇講，大約幾個月前，小青姐有叫我扮小丑，話拍我落妝嘅畫面，不過，最後都冇拍到，我都唔知會有咁嘅安排，我當然想再拍第五輯啦！」
小丑幾乎是每輯《法證先鋒》裡出現的人物，今輯小丑更成為暗示再拍第五輯的重要關鍵。據知情者透露：「當小青姐得知公司會開《法證V》，已經決定將小丑再加落去，原本佢諗住加Kelly落去做Big Boss，係真正殺人犯，所以諗住要Kelly化小丑妝，增加神秘感，但後尾改咗結局，原來小青姐另有安排，決定將本來單元中一個角色嘅張曦雯喺《法證V》擔正，頂替已經約滿嘅李施嬅，所以唔可以做殺人犯，一定係忠嘅角色！」
湯洛雯越演越順有得留低
《法證先鋒IV》收視創佳績，一班主角都希望能夠在新一輯繼續留低，據悉除了張曦雯外，近年已成小青姐愛將的陳煒、譚俊彥、朱晨麗及黃浩然都會繼續留低，而之前頂替黃心穎演出的湯洛雯，亦得小青姐稱讚有得再拍。據知情者透露：「重拍初期，小青姐都擔心靚湯（湯洛雯）臨時入組會唔會唔適應，都有諗過將戲份加重落去黃浩然同Yumiko（鄭希怡）呢一對度，不過Yumiko度唔到期再拍，靚湯亦愈演愈順，依家出嚟反應又咁好，小青姐都決定畀靚湯再拍《法證V》。」
新一輯如箭在弦，相信演員同觀眾一樣充滿期待！
《法證先鋒》監製梅小青險中風拒退休 愛將佘詩曼、鍾嘉欣巔峰作品網民勁Like
《法證IV》開播以來，收視、口碑一直高企，令無綫火速決定開拍《法證先鋒V》，更密斟兩大御用愛將佘詩曼及鍾嘉欣，回巢助陣客串新《法證》！
梅小青險中風拒退休
人生就是一場又一場的考驗，即使環境再惡劣，只要努力用心做，定能衝破難關。去年爆出「安心偷食」事件，令《法證先鋒IV》遇上巨變，要換走主角黃心穎，由湯洛雯頂上重拍40組戲，後期剪接艱巨，更失落台慶劇播出時段，製作一波三折，就連監製梅小青亦同生命打了一場硬仗，拍攝《法證IV》期間，小青姐突然發現左腦血管栓塞，由於血管塞了95％，隨時有中風危險，接受手術期間，又發現塞了的血管位置在轉彎位，增加手術風險，逃出鬼門關的她，答應兒子退休的請求。
據知情者透露：「嗰時喺橫店拍緊《深宮計》，小青姐經常耳鳴，仲試過喺拍攝場地暈過幾次，一直搵唔出原因，後來得朋友介紹名醫，檢查先知係左腦血管栓塞，但當時因為要趕住為《深宮計》剪片埋尾，送到內地送檢，又同時趕拍緊《法證IV》，最後手術拖到上年2月先做，點知手術後，又接到要重拍《法證IV》消息，令小青姐經歷咗入行40年以嚟最大嘅考驗，養身期間要飛去台灣補拍，嗰時真係好辛苦，所以個仔先勸佢退休！」不過《法證》系列係小青姐一手打造，可以話係佢事業一個里程碑，對佢嚟講有情意結，而且佢身體亦好番好多，佢覺得自己可以應付到！」，即時答應再拍新《法證》，更密斟兩大御用愛將佘詩曼及鍾嘉欣，回巢助陣客串，劇迷有福了！
愛將佘詩曼、鍾嘉欣巔峰作品網民勁Like
向來力求完美的小青姐，為加強新《法證》聲勢，已秘密傾洽愛將佘詩曼及鍾嘉欣回巢助陣。據知情者透露：「再開新《法證》更加不容有失，小青姐想搵阿佘同鍾嘉欣返嚟拍，雖然佢哋已經約滿離巢，但兩個一路以嚟都係小青姐嘅御用愛將，關係好密切，再加上阿佘同嘉欣都曾經係《法證》系列嘅主角，見證住呢個劇嘅輝煌成績 ，有機會再參與當然開心，不過都要出晒劇本同遷就到檔期先。」
