《延禧》幕前班底回歸！新劇《皓鑭傳》正式開播！

撰文：東方新地｜圖片：皓鑭傳官博、于正、譚卓微博、影片截圖｜編輯：新假期

《延禧》同班人馬新劇《皓鑭傳》開播

根據《皓鑭傳》劇組公布資料，新劇沿用唔少《延》班底演員，當中當然唔少得大家非常熟識嘅「魏瓔珞」吳謹言同「乾隆」聶遠，但今次就會嚟個換時空令二人可以再續前緣！

除咗兩位男女主角，《延》嘅「高貴妃」譚卓、「明玉」姜梓新、「李玉公公」劉恩尚及令人睇到恨之入骨嘅「袁春望」王茂蕾都有份參演《皓鑭傳》！

今次喺《皓》中，「明玉」姜梓新飾演醫術高明嘅「殷小春」，擅長用銀針替人治病，亦會處處幫助女主角李皓鑭；

「高貴妃」譚卓於新劇中升呢飾演「華陽夫人」，係秦孝文王嘅王后，同吳謹言嘅角色關係係婆媳！

至於喺《延禧攻略》做「乾隆」嘅聶遠今次唔做皇帝，而係做秦國商人呂不韋！

新加入《延》班底演員

32歲嘅茅子俊曾和林心如於《美人心計》合作，但都係做二線角色，今次擔正于正嘅新戲，飾演秦莊襄王「贏異人」，睇嚟上位在望！

至於「趙國公主雅」會由海鈴出演；「厲夫人」則由內地著名影星寧靜飾演！

宮鬥之餘仲會有…

喺官方釋出嘅預告片中，見到《皓》以戰國晚期為背景，講述吳謹言飾演嘅李皓鑭由趙國御史之女淪為舞姬，最後再成秦始皇嬴政之母嘅過程，當然過程中會包括唔少宮鬥嘅場面，甚至會出現朝堂上嘅權鬥角力！

另外，預告片頭就已經有吳謹言飾演李皓鑭嘅自白：「如果真切的愛慕一個人，那怕受盡傷害也不改初衷。」睇嚟新劇仲會有揪心嘅感情線，希望唔好又好似上次《延》咁慘啦！

劇集製作一絲不苟

據知，今次《皓》嘅拍攝同樣極具講究，為咗令劇集場景可以還原及貼近史實，拍攝一共搭建多達400個場景，共花費8個月嘅時間，其中一個最大嘅場景仲接近3萬平方米，製作規模都唔細！

除此以外，據了解《皓》嘅劇組更對道具及服飾製作一絲不苟，如劇情轉入秦國後，劇組則多用黑及紅色，並配以獸型圖案於服飾中，以表達秦人嘅霸氣同豪放！