巴黎奧運2024 意大利網民湧張家朗IG鬧偷金牌 港網民一句反擊
張家朗IG被意大利人「出征」
意大利隊教練史里奧連(Stefano Cerioni)賽後亦在IG上載自己指著裁判黃皓志作出抗議的照片,並留言表示:「從未見過這樣一個賊!偉大的馬治!你是贏家。」並向國際劍聯(FIE)及國際奧委會(IOC)提出抗議。
![巴黎奧運 張家朗於巴黎奧運擊敗意大利代表馬治(左),衛冕男子花劍金牌。(圖片來源:IG@fencing_fie)](https://imgs.orientalsunday.hk/wp-content/uploads/2024/07/fencing_fie_1722290271_3423141365326041063_1810729898_124216888266a86bc4915d0-975x1024.jpg)
香港網民反擊鬧意大利教練種族歧視
有網民在討論區出post講到張家朗IG被「出征」一事,鬧爆意大利隊「輸打贏要」、「成班生蕃,個教練同國民都係」、「個運動員都似串,但始終都係個教練有問題啲,中途已經狂躁,賽後直程racist咁款」、「佢喺採訪嘅時候已經鬧個裁判係亞洲人,所以判比香港」等,更有網民提到「Ryan直播都有講,同個意大利佬打過幾次,佢好自大寸寸貢仲同張家朗鬧過交」。
為此有不少香港網民不忿反擊,湧到意大利選手馬基的IG鬧爆對方輸唔起,更不停提「pineapple pizza」(菠蘿薄餅),原因是意大利人都認為在pizza放菠蘿是污辱pizza文化,甚至寧願餓死都不會吃菠蘿pizza。
蔡俊彥:求不要到意大利選手ig Diu 佢
為ViuTV擔任巴黎奧運旁述的劍擊運動員蔡俊彥(Ryan)在社交網出po,求網民不要再到意大利選手的IG「出征」,並強調冇黑哨,引來不少網民力撐。蔡俊彥在Threads中發長文呼籲網民不要再「出征」去鬧意大利的劍擊選手馬治,並澄清自己在直播中的說話並非想諷刺對方:
求不要到意大利選手ig Diu 佢
比賽落敗心中不忿,人之常情。更何況呢場係絕對充滿爭議性既比賽。我係直播話
「你已經有銀牌唔好唔開心」
「希望獲得銀牌會謙虛」
全部真心話
可能我個tone 99地搞到大家覺得我想諷刺佢「佢樣寸寸貢,人冇乜野」係真事
呢句同樣適用於形容我自己對手教練向裁判投訢,非常正常。
掉轉我地法國教練一樣會咁做。意大利人的確有時賴皮一啲,向裁判施壓,
係戰術之一。你可以唔鍾意,咁唔好學,唔使走去插人哋。Post下食菠蘿pizza都幾好笑,
何必要走去人哋ig comment 呢?順手一提,我哋香港劍擊隊都有意大利教練,同對手意大利教練好frd,曾一齊執教意大利、俄羅斯(戰爭前),及美國著名選手。我唔想我教練難受。
要你哋del comment應該冇乜可能,但真係唔好繼續Diu。專心慶祝香港奪金牌,多啲正能量多啲愛,個世界會開心啲!
仲有,冇黑哨。
台北裁判亦成「箭靶」被諷黑哨
由於張家朗和馬治的比賽末段出現三次爭議判決,令中華台北裁判黃皓志亦成為「箭靶」,不只意大利網「出征」其IG,連香港網民都質疑「決一劍」時張家朗已明顯得分,但裁判仍猶豫不決,以致需要三度裁決,更諷刺他為「黑哨」。
為此蔡俊彥亦有黃皓志作出平反,大讚他是世界數一數二的好裁判:
其實最後嗰分,兩位劍手明知裁判鍾意睇腳,都唔用多啲腳,當然滿足唔到裁判,好自然佢就判唔出。
重有想滿足裁判好簡單,又用手又用腳,動作交代清晰,使乜走去睇片,必定好快判得出。
P.s 認真求下大家唔好話嗰位台灣裁判,佢絕對係世界數一數二好嘅裁判🙏🙏最後判唔出有機會係同另一位韓國裁判達唔成共識,合情合理的。
網民力撐蔡俊彥:輸贏都要有風度
不少網民都力撐蔡俊彥,表示:「大部分人唔係黑哨就教練好嘈就或者對手黑面。大佬,人哋差一分攞金喎,但突然連輸,嬲下好奇怪咩?贏左,仲要去人哋到挑釁,顯得好冇風度囉」、「走去人地ig開戰同小粉紅出征冇異」、「人哋冇體育精神、我哋唔需要學佢哋咁肉酸」、「輸贏都要有風度,至係真香港人」等。
![巴黎奧運 網民力撐蔡俊彥。(圖片來源:IG@ryanchoiiiii)](https://imgs.orientalsunday.hk/wp-content/uploads/2024/07/01_92567921866a86d6d7113f-819x1024.jpg)
網民對新晉評述員蔡俊彥反應兩極
劍擊運動員蔡俊彥近日為ViuTV擔任奧運評述員。他的表現引起了網民的熱烈討論,有人認為他講解生硬,準備不足,甚至有網民在社交平台Threads上留言表示:「睇ViuTV奧運,聽蔡俊彥講嘢真係好辛苦,鬼食泥咁,又唔做好準備,講到『甩甩咳咳』,有時又發緊夢咁。」對此,蔡俊彥也不避嫌地回應,希望大家能多些包容,給他更多機會學習和改進。
![巴黎奧運 有人認為劍擊運動員蔡俊彥講解生硬,準備不足。(圖片來源:Threads)](https://imgs.orientalsunday.hk/wp-content/uploads/2024/07/w1200-5_123688285666a75d947c48c-725x1024.jpeg)
「大師兄」張小倫爆seed反擊:積下啲口福
另一方面,剛退役的男子花劍運動員張小倫,也在社交平台上發表了自己的看法。張小倫寫道:「做香港運動員就係咁,一有成績就係到呱呱嘈,冇成績就係到X,咁細個地方岀到奧運冠軍級別運動員,你估容易丫!要犧牲幾多代人嘅努力同付出,犧牲幾多位運動付出嘅年輕人,你又識得幾多個???」
張小倫亦希望大家體諒做評述嘅運動員:
「唔該大家評論運動員去唔同電影台做旁述嘅時候,積下啲口福,個個捱更抵夜去講的專業運動知識俾你哋聽,雖然我哋唔係專業,但係我哋係流主運動員嘅血,係一世架,希望分享多啲運動員嘅經歷」
最後,他亦叫大家不論輸贏都要尊重每位運動員:
「有得去參與奧運嘅運動員我哋當然要幫佢哋打氣,冇得去嘅一樣係唔同崗位默默努力,不論輸贏係咪都要尊重吓啲運動員,佢哋用人生最青春嘅時光用努力意志去克服唔同嘅比賽同傷患,希望可以有一日踏上頒獎台,證明自己。其實冇得去參加奧運嘅運動員都好大勇氣行岀來去做運動旁述,仲要比大家批評,我性格就係咁有個句講個句,唔鐘意我哋嘅好似睇電視一樣撳個掣轉台或者熄機。 」
![巴黎奧運 剛退役的男子花劍運動員張小倫,也在社交平台上發表了自己的看法。(圖片來源:Hoy TV圖片)](https://imgs.orientalsunday.hk/wp-content/uploads/2024/07/photo_6140879266011791089_y_179155740866a75cdce9a56-1024x576.jpg)
將來還有什麼演唱會值得留意?
有不少歌手宣布舉辦演唱會,小編為你整合了香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!