姜濤演唱會｜一文直擊演唱會7大重點！

姜濤演唱會︱1. 帶傷上陣勁歌熱舞登場 表示過去一年多風浪

去年受傷後的姜濤一直未能痊癒，大家都非常擔心姜濤的腳傷會否影響表現。不過姜濤就用作品說話，一開場就即以新歌《濤》、《作品的說話》和《Master Class》勁歌熱舞登場，又唱又跳超落力。經過一番勁歌熱舞之後，姜濤表示感謝大家到場支持自己首個個人演唱會，亦感性地表示過去一年好多風浪：「棘咗好耐，可能呢一年好多嘢都棘住，令自己喺創作方面冇乜靈感，最後創作靈感就喺我個名入面『濤』，因為過去一年無論個人及圑隊經歷好多驚濤，希望可以似水一樣有一萬種形態去接受所有批評及指點，為大家帶嚟唔同音樂種類，就好似水，不分流行、古典融合一齊，希望大家enjoy。」不過最後越講越口窒，搞到姜濤都自嘲指：「唉！講嘢都係唔啱我！」

姜濤演唱會︱2.姜濤自覺愧對fans：你哋成為我生命中嘅屋企人

姜濤在唱完《追》之後，演唱會大屏幕突然播出姜濤在街頭扮姜糖坐摺凳、舉燈牌，在片中姜濤忍唔住爆喊：「我諗起佢地係到咁樣逼，係有啲心up，知道自己要做啲歌、表演畀大家睇就足夠，但我覺得自己好不足，尤其是過去呢兩年，我好驚每一個支持我嘅Fans，因為我覺得我冇乜自信去面對大家。我真係好對唔住大家。我入行五年以來從來未試過咁想見到你哋。由呢一刻我覺得你哋真係成為我生命中嘅屋企人。」

姜濤爆喊感激粉絲支持

姜濤在演唱《好得太過份》前表示感激粉絲一路而來的支持：「你哋真係好得太過分，我要多謝你哋每一位一直咁支持我嘅，有啲可能中途離開咗，但係我都好感激每一位，因為我相信我係你地生命中出現過，我就覺得好滿足。由今日開始你哋唔係我嘅Fans，係我嘅屋企人。我有乜做錯，你地可以提點我；你地有乜做錯，我都可以提點你地。」

姜濤演唱會︱3.演唱會服裝全面睇 5件有4件都係黑色衫

姜濤平時經常穿黑色長褸遮身形，今次個人演唱會依然繼續走黑暗風，全場兩小時換足5套衫，其中4件都係黑色衫。

姜濤演唱會︱5. 舞台道具多過Anson Lo個唱

姜濤和Anson Lo同樣在亞博舉行首個個人演唱會，雖然兩位的主題不一樣，但舞台設計大致上沒有太大分別，兩人同樣沿用T字台。不過姜濤演唱會就比較多道具配合演唱會主題「WAVES」，有白色紗布扮海浪、巨型水滴椅子等，完場時亦有姜濤巨型吹氣Baby Mirror公仔。

姜濤演唱會︱5. 肥仔同林海峰做嘉賓 重演頒叱咤我最喜愛男歌手一幕

姜濤首場演唱會除了邀請到ERROR隊長肥仔做嘉賓之餘，亦邀請到林海峰做嘉賓。林海峰一出場即刻惹來全場歡呼尖叫，隨即一輪嘴瘋狂擦鞋，仲話樂壇好需要姜糖：「你（姜濤）一代言啲家電，佢地（姜糖）就即刻買，咩洗衣機、冷氣機、雪櫃，我都唔知買咁多雪櫃擺喺屋企做乜啊？放你嗰啲雪糕月餅啊？姜糖除咗為廣告界帶來好多新嘅面貌，亦為我哋廣播道帶來好多新嘅面貌。你知唔知最近商台為你哋換咗啲鐵閘，我返商台3、40年，商台都只係換節目主持同廁所廁紙，但今次為咗你哋姜糖係換曬啲鐵閘。」

林海峰更表示在叱咤頒獎畀姜濤之後人氣急升，仲話：「你真係要努力，你努力唔係話你口中嘅咩『衝出亞洲，成為亞洲第一』或者『紅過羅湖』嗰啲，而係姜B嘅努力就係為咗林公子嘅成就。」兩人亦在台上重演頒獎一幕，不過今次就由姜濤頒「我最喜愛頒獎嘉賓」的獎項畀林海峰：「我應承大家我會繼續努力頒獎畀佢（姜濤）」，笑爆全場。

姜濤演唱會︱6. 深情演繹多首前輩經典舊歌：樂壇有好多好美好嘅前輩

姜濤唱出多首樂壇前輩的經典舊歌，包括鄧麗君的《我只在乎你》、張國榮《追》和黎明的《我的親愛》等，姜濤親揭選曲的特別原因：「我覺得作為我哋作為年輕一輩嘅歌手，好有呢一份責任去令到更加多年輕嘅一輩知道，其實我哋華語樂壇、香港樂壇有好多好美好嘅前輩、作品同埋精神。所以希望呢啲歌可以令大家認識更加多唔同嘅音樂。」姜濤又指《我只在乎你》是姜媽媽經常在姜濤年小時成日播，今日終於在台上唱給媽媽聽。

姜濤演唱會︱7. 演唱會周邊曝光 籃球售價599元

今次MIRROR 4位成員開首個個人演唱會，每位都推出具備個人特色的演唱會周邊。出名喜歡打籃球的姜濤，今次演唱會周邊中就推出印有其簽名和演唱會主題「WAVES」字樣的籃球，售價599元港幣。雖然籃球設計特別，對「姜糖」們極具收藏價值，但定價甚高，令不少網民認為有點兒太過掠水。

同場加映：姜濤媽媽到場支持 粉絲尖叫歡迎：奶奶駕到

姜濤向來出名孝順，難得愛子首次舉行個人演唱會，姜濤媽媽當然有到場支持。姜濤媽媽一到場就即刻引起在場姜糖們尖叫歡迎，更有粉絲們邊叫奶奶，邊揮手同姜媽媽打招呼。

同場加映2：感激演唱會工作人員 隻字不提緋聞女友Lydia

姜濤在演唱會尾段逐個點名感激每一位為演唱會盡心盡力的工作人員，不過就對緋聞女友髮型師Lydia隻字不提，小心避嫌。

姜濤演唱會《KEUNG TO “WAVES” IN MY SIGHT SOLO CONCERT 2023》完整歌單：

1. 《濤》
2. 《作品的說話》
3. 《Master Class》
4. 《我只在乎你》（原唱：鄧麗君）
5. 《風雨不改》
6. 《亞特蘭提斯》
7. 《心墻》（原唱：郭靜）
8. 《鏡中鏡》
9. 《DUMMY》
10. 《特務肥姜2.0》
11. 《孤獨病》
12. 《追》
13. 《好得太過份》
14. 《一號種籽》
15. 《Every Single Time》
16. 《我的親愛》（原唱：黎明）
17. 《一秒間》
18. 《愛情簽證申請》
19. 《我多喜歡你，你會知道》（原唱：王俊琪）
20. 《蒙著嘴說愛你》