26歲蔡嘉欣殺入《姊妹淘》搶fo上位 晒名牌袋炫富犯眾憎

原文刊於《東方新地》

蔡嘉欣上位快過港姐三甲

被指上位快過港姐三甲的蔡嘉欣，殺入《姊妹淘》不斷諗計搶fo，霸頭位搶對白冇大冇細，周身名牌狂炫富，恃住有米ibanker男友錫到燶，晒命唔使本，好快就成為犯眾憎。日前蔡嘉欣上樓盤節目接受訪問狂呻樓價高企難上車，不過家中有兩大個櫃放滿包包，被網民狂插總值幾十萬的包包已經夠做首期。明知自己惹火，蔡嘉欣都唔識低調立品，好明顯輸經驗。

娛樂圈向來都是憎人富貴厭人貧，入行只有一年的蔡嘉欣去年選港姐時已是當紅KOL，是非多多被揭一大堆黑歷史，有指她因拜金而拋棄無綫藝人吳子沖，並結識有錢ibanker新歡，男友更在將軍澳天晉租了一個月租近二萬五元的單位，方便她參選時出入將軍澳電視城。結果蔡嘉欣大熱倒灶，即被無綫睇中簽約成親生女，極速被安排加入《姊妹淘》做主持，最近更有份參演劇集《智能愛（AI）人》及處境劇《愛回家‧開心速遞》，工作機會遠遠超過去年港姐三甲。

為人高調過分進取其他主持藐爆

做慣網紅的蔡嘉欣，時裝及美容觸覺都有番咁上下，做《姊妹淘》主持開中佢嗰瓣，不過野心太大亦令她成為不少人的假想敵，據知情者透露：「Kayan（蔡嘉欣）表現得太進取，搶對白講同埋成日霸頭位、中間位都好明顯，試過有一集講美腿準則，為咗突顯自己高人一等同長腿，佢提議幾位女主持喺鏡頭前鬥腳長，佢又笑唔係個個女主持都可以坐喺長凳腳掂地。恃住自己口才好公司又畀機會，Kayan喺其他人面前都幾寸嘴㗎，但對住大家姐莊思敏就扮晒嘢好奉承，最難頂都係成日晒名牌袋同晒男朋友點樣錫佢，又話男友帶佢遊世界去過好多個國家咁，正所謂一山不能藏二虎，傅嘉莉就最唔妥佢，喺背後藐爆。」

呻無錢做首期上車 但一櫃名牌袋

在蔡嘉欣的IG內，幾乎每日都拎不同名牌手袋，絕大部分都係Hermès同Chanel，有數得計總值肯定超過五十萬，不過佢日前就在無綫的樓盤節目內大呻未夠首期上車，又話唔想畀一成首期供幾十年樓，節目一出即被明眼網民鬧爆佢啲名牌袋都夠畀首期。作為野心勃勃的港女，或者蔡嘉欣想買幾千萬以上的豪宅，區區幾十萬真係唔夠呢？與其賣袋換首期，冧男友送樓可能仲可行。