失婚名模陳祉妤 華麗轉身變無綫女主人

原文刊於《東方新地》

陳祉妤近年生活低調鮮有談及感情事，只有少數閨密知道她拍拖，去年好姊妹汪詩詩生日，她帶埋男友許濤一起出席飯局。

低調拍拖五年

曾經係香港十大名模之一嘅陳祉妤(原名陳沛嘉)，12年與彭文堅離婚後，感情生活一直低調，近年淡出娛樂圈，在其社交網內見她閒時愛放狗、行山及做運動，生活非常健康，但原來一直有愛情滋潤，而男方就是剛於4月底新上任嘅電視廣播有限公司董事局主席許濤。

陳祉妤最近一次公開談及感情狀況是17年1月，當時被問有否拍拖，她少有地主動大方承認戀愛中，指男友從事金融投資，雙方拍拖不夠一年，為保私隱未有透露名字，並盛讚男友滑雪好叻，當問到男友是否金融才俊時，她即說：「係咪才俊唔緊要，錫我就得。（有再婚打算？）未考慮，至緊要開心。」

低調迎合男友

據知陳祉妤因為男友的身份及工作關係，不希望有太多花邊新聞，所以她亦非常配合，有共識低調處理感情，直到日前二人好事近，遞交擬結婚通知書，關係才見光。其實今年4月時，陳祉妤被影到與一中年男士雙雙在淺水灣出現，二人沿海旁一直慢步行向深水灣方向，並排而行有傾有講影風景，不過許濤為人低調甚少曝光，因而未被認出。準新郎許濤(Thomas)報稱未婚及從事投資管理，二人更報住同一個港島區地址。

尖子出身平步青雲

現年48歲嘅許濤大陳祉妤一年，為一名尖子，3歲隨家人從內地來港，除咗係名校華仁書院嘅學生外，更持有美國康乃爾大學（Cornell University）電子工程碩士學位，以及威斯康辛大學（University of Wisconsin）電子工程學士學位，畢業後先後喺多個國際企業任職。今年4月底，許濤正式接陳國強棒，出任電視廣播有限公司董事局主席，並同時調任為非執行董事。目前於無綫主要股東、華人文化集團擔任首席運營官及執行董事嘅許濤，上任前一直被指是華人文化主席兼無綫非執行董事黎瑞剛嘅親信，有指因為欣賞佢熟悉基金界同形象專業，所以黎瑞剛喺15年入股成為無綫股東之一後，許濤同年獲委任為無綫非執董，至18年則獲委任為執行董事，事業上平步青雲。

陳祉妤93年參加澳門小姐選美大賽季軍及最佳儀態獎，後以華籍身份代表澳門參加由無綫舉辦的國際華裔小姐，並留港發展成為職業模特兒。現年47歲的她保養得宜，凍齡有法，身材與樣貌十年如一日，而且入得廚房，出得廳堂，不過唔聲唔聲飛上枝頭變成無綫女主人，就真係令人意想不及。

其實陳祉妤同無綫都好有淵源，佢曾經客串過無綫劇《珠光寶氣》，同陳豪有唔少對手戲，而佢嘅人生下半場的確如劇名一樣珠光寶氣。