天與地 金句位重溫 7大神級金句即睇

撰文：Nam

天與地 金句位重溫　7大神級金句你聽過了嗎？

《天與地》中，最為網民熱愛的自然是涉及政治的「抽水」，句句精彩，不能盡錄，以下先選7大金句位和大家回味。

1.做人唔係本來就應該係咁嘅咩？

Dr. Dylan（Joe Junior）：「獨立嘅精神、抗拒建制、自由、愛、勇往直前，其實何止係Rock & Roll，乜我哋做人唔係本來就應該係咁嘅咩？」

2. 政治世界就係污糟邋遢嘅世界

劉俊雄（林保怡）：「無論係香港定世界任何一個地方，政治世界就係污糟邋遢嘅世界，從政手段就只有卑鄙、奸詐，除咗呢樣，就只有更卑鄙、更奸詐。大家如果想得到公義嘅話，我可以話比大家聽，一個公義嘅人，絕對、亦無可能幫你哋達到目的。你哋唔好再自己呃自己，你哋只可以靠一啲自私嘅人，當嗰啲自私嘅人得到佢得到嘅嘢，佢滿足咗之後，先會企出嚟為你哋爭取你哋所想。呢個世界就係咁醜惡，我哋要面對現實，先至可以行我哋嘅路。大家企出嚟睇吓我哋嘅世界，呢個就係我哋嘅世界，呢個就係我哋嘅選擇。」

3. 啲無良大財團，攞咗啲舊屋村商場嚟做

Cloris（李思雅）：「係佢大大聲聲趕個阿婆走架，我幫人討個公道咋喎。俾人拉咪俾人拉囉，仲好啦，搞大件事，等多啲人可以知道而家啲老人家有幾慘。喺個商場度，想搵個位休息下，咁就俾個管理員趕走喇。呢啲叫助紂為虐呀！嗰啲無良大財團，攞咗啲舊屋村商場嚟做，之後就拆哂原本俾人休息坐嗰啲櫈。裝修、加租、搶錢、搶生意，咁咪難為咗入去商場避風避雨嘅公公婆婆囉。」

4. 議員又講錯字，又有懶音，又亂講英文

何Sir（鄭子誠）：「厲害厲害！詞鋒銳利，字字鏗鏘。我上個禮拜睇立法會直播，議員又講錯字，又有懶音，又亂講英文，如果當日選咗你入去，娛樂性一定豐富得多。」

5. 食蛇宴、摘荔枝

工會職員Alfred：「人哋啲大型工會組織，佢哋啲活動就好喇，食蛇宴啦、摘荔枝啦，買啲平價米、平價油咁樣。我哋淨係可以搞家居電器維修興趣班咋！點樣join人呀？仲話join多啲人，心照啦！」

6. 和諧唔係一百個人講同一句說話

葉梓恩（佘詩曼）：「今晚喺呢度，我呼籲警方、外邊嘅市民、所有傳媒，無需要恐懼我哋嘅聚集。因為喺呢度，每一個支持同追求獨立音樂嘅人，他們都代表住每一種獨立同自主嘅做人方法。呢啲並唔係唔和諧嘅表現。和諧唔係一百個人講同一句說話，和諧係一百個人有一百句唔同說話之餘，而又互相尊重。」

7. This city is dying, you know？

Dr. Dylan（Joe Junior）：「你睇吓我哋呢個世界，睇吓我哋呢個城市係乜嘢樣，除咗錢呢個字之外，我哋已經分辨唔出是非黑白，我哋每個人都被環境訓練到，好似倒模出 嚟咁。鍾意食同一樣嘅嘢、鍾意同一樣電視節目、支持同一種政治立場，信奉同一種生老病死嘅做人方法，this city is dying, you know？」