《 天煞地球反擊戰 》出續集! 20年後新舊人物大對比|光影星評@周優王

撰文：周優王｜圖片來源：電影資料圖片

各國地標大顛倒

今次《天煞》續集，續由首集的德裔導演羅倫艾默烈治掌舵，其過往作品包括有《明日之後》、《2012》等，可想而知，先不理故事如何，其電影的特技與場口設計肯定不會欺場。而今集確俾廿年前來得更「大鑊」，因上集的外星人只屬爛頭卒，真正主力終於今天憑更先進武器進逼地球，單是其飛船的一塊降落板便足以衝擊大西洋造成巨大海嘯，另其可摧毀地球的重力，可以將杜拜地標Buji Khalifa Tower掟去巴黎、巨大的佛像可以「安放」在倫敦大笨鐘上。當然美國總統以至全球各國領袖自廿年前勝仗後非hea住度日，而是聯合組成部門The Earth Space Defense (ESD)，吸收外星人的科技，不斷致力研究、實驗，以保護地球，果然廿年過後終有用武之地！

廿年前首集《天煞》白宮被炸的場口相當逼真，1999年陳木勝執導《特警新人類》時，也找來《天煞》的技術人員處理《特》中會展被炸一場的視覺效果。

上集白宮遭殃，今次輪到倫敦大笨鐘受難。

外星戰艦的覆蓋範圍達致地球每一角落。

The Earth Space Defense早有準備，在月球設有防禦基地，但亦遭襲擊。

5位成員再戰異類

韋哥「被殉職」

廿年前《天煞》演員眾多但多屬二線星，唯獨1995年憑《重案夢幻組》冒起的韋史密夫獨當一面，他飾演的空軍上校Steven Hiller駕駛F-16舞到外星怪獸氹氹轉，串串貢性格成為最搶鏡一員。但今次5位成員中冇佢份！因早前韋哥曾要求要有5千萬美元片酬才會演續集，電影公司不妥協，結果韋哥今年暑假加入《自殺特攻隊》，而電影公司來個「大報復」，今集講述Steven Hiller測試新型戰機失敗而被炸死，韋哥角色如此被消失實在有點騎呢！

廿年前韋史密夫能捉拿外星怪獸助團隊作解剖，以了解對方實力。今天卻只能與毀爛的新型戰機同體！

總統失常

標布文續演總統Thomas J. Whitmore……對唔住，應該係「前總統」先啱(邊會有總統可以連任多屆逾二十年？聽到「連任」兩字香港市民都怕怕)！上集發表獨立宣言及御駕親征的他好威風，但當年他曾跟外星怪獸作近距離接觸，致跟它們建立某程度的聯繫，患上名為Alien Residual Condition的病症，腦海中常感到被外星怪獸滋擾，結果好多人、包括其女兒當佢失常，但事實佢可預視外星怪獸將再來犯。

標布文當年演美國總統巧威威，但卸任後就是這副「生意失敗look」，人人當佢係傻佬。

電腦專家仕途佳

第二位續戰《天煞》的，有謝夫高拔林飾演的電腦專家David Levinson。就係廿年前佢諗到以電腦病毒注入外星母艦系統，才將來犯者一舉殲滅。今集講述他已當上Earth Space Defense Program的首位總監多年，不斷研究外太空科技，繼續成為保衞地球的關鍵人物。

廿年過後的David Levinson更見老成持重，對外星怪獸的弱點亦一一掌握得到。

叔叔嬸嬸續撐場

除了兩位要角，演David Levinson父親Julius Levinson的Judd Hirsch亦再度登場，今次他帶著自行出版、關於1996年首次外星侵襲的書籍到處搵仔，卻意外救咗幾個細路仔，續展父愛。另上集科學家，Area 51的主管Dr Brackish Okun續由Brent Spiner飾演。至於Steven Hiller的遺孀Jasmine，亦續由Vivica A. Fox擔演，為兒子對抗異類進迫打打氣！

Judd Hirsch飾演的Julius Levinson於二十年過後再成災難的見證人。

Dr Brackish Okun受攻擊昏迷二十年，醒後與前總統Thomas J. Whitmore一樣患上Alien Residual Condition。

上集Jasmine為脫衣舞孃，今次則放下這工作多年當上助產士。

新力量延續地球強勢

子承父業

Steven Hiller「被殉職」除遺下妻子Jasmine，還有兒子Dylan Hiller。由電視劇《Survivor’s Remorse》的Jessie Usher飾演此角，繼承父親位置擔任空軍中隊的隊目，除要駕駛戰機戰鬥外，亦要在戲中的一段三角關係主動出擊。

雷神細佬發圍

上述三角關係的另一男主角，正是雷神細佬……唔係洛基呀，而是飾演雷神的演員Chris Hemsworth的親細佬Liam Hemsworth。繼《飢餓遊戲》系列後他再當戰士，名為Jake Morrison。話說廿年前外星怪獸來犯令他失去雙親，當上戰機機師後的他因個性反叛常闖禍，而被貶至當運送武器到月球的防禦基地的運輸員，最後當然能重新振作打外星怪獸啦！

總統千金感情受考驗

至於三角關係的女主角呢？就係前總統Thomas J. Whitmore女兒Patricia Whitmore (Maika Monroe飾)。她與Dylan Hiller都是救世英雄之後，大家亦是好朋友，常被公眾當為一對情侶，但她愛的卻是Jake……感情立立亂，自己的父親又神神化化，加上地球隨時滅亡，這個女子真係好唔得閒！

現任總統是鐵娘子

廿年過後，美國有女總統出現，就是由Sela Ward飾演的Lanford。其家人亦於廿年前因外星怪獸侵略而身亡，今天她對敵人絕不手軟，性格強悍決斷力高。如此角色是否為民主黨總統候選人希拉莉打氣兼拉票？

「海綿嫂」上戰場

華人之光啊！保衞地球戰士無分國界，今集《天煞》便有黃太Angelababy飾演其中一名戰鬥機機師精英Rain。上次她在《刺客特攻47》都算有相當戲份，今次在眾星雲集的億萬元製作中都有得發揮，起碼不會像張靜初去年在《MI5》中近乎零對白。但係黃太一副弱質纖纖模樣去當戰機機師，似乎有欠說服力喎！

《天煞地球反擊戰：復甦紀元》
上映日期：6月23日

預告片：