大劉劉鑾雄開記招再出絕妙金句 用4字形容呂麗君 極恐怖！

大劉劉鑾雄否認甘比不開心：點值得啫？

記者會召開前，已聲明不准拍片，只能夠拍照和錄音，所以記者的手提電話均被公關收走，現場準備了不少防疫消毒用品，又為記者準備了蒸餾水，而甘比妹妹Pinga亦有在場幫手。大劉於早上10時45分現身時，穿著一身寶藍色外套加運動褲，坐下後拿著網上有關他和呂麗君的報道翻閱，表情嚴肅，被記者問到點評價呂麗君，他直言唔方便comment，原因係如果真係講，講七七四十九日都講唔完，大家就要喺度講到紮營，至於甘比有冇為這件不開心？他回答：「點值得啫？佢知咩事！」

罕提42歲大仔劉鳴煒：最開心佢好肯做善事

大劉又特別澄財產處理方面的問題，他擔心很多人會誤會「陳凱韻與家人」中，所指的「家人」只係指他的子女，他澄清「家人」就係除了陳凱韻的3個細路，仲有他其他家人，包括呂麗君的仔女，可能亦包括寶詠琴的仔女，他表示不想外人誤會他所有身家都被陳凱韻全部奪取，他說：「講真，我最大個仔今年都42歲，就嚟43歲，到後來呂麗君同陳凱韻生，佢都係最大，佢除咗讀書叻，都好肯好肯做好多善事，呢個係最開心。」

拒分財產畀「天下間極壞極壞極壞嘅恐怖份子」

大劉表示同律師討論過後，知道財產在信托內將來會有爭執或打官司：「我寧願全部派晒出去，As a gift。我曾經同律師講，我寧願送咗出去畀錯人，都唔想畀一啲天下間極壞極壞極壞嘅恐怖份子。」

有財經記者就透露今次呂麗君搵大劉幫手的原因，是因為她投資失利，搞到破產！

稱諒解蕭若元：佢搵到食使乜咁吖

大劉自言唔識用智能電話，但都知有大把網絡打手，特別指出「燈神」蕭若元造謠他有躁狂症，他表示記憶中只和對方見過一次面，沒有所謂十幾次，他也沒有躁狂症，只有是創傷後遺症，不過大劉表示好諒解對方蕭若元，因此不會要求他收回言論，或採取法律行動，或者叫台灣朋友去探吓佢，認為咁都係益咗佢：「我好諒解蕭若元，佢搵到食使乜咁吖，如果我有一日要喺平台咁呃like呀，我就大乜X鑊啦！」

他又表示：「我今日慶幸都搵到稀粥食，我唔希望我做任何嘢影響我第二代第三代生仔冇屎忽，你聽唔聽得明呢句說話呀，有啲人好慘架，為咗搵食，男人賣籮柚又有，女人出賣肉體又有，全世界都有。我今日都好吖，慶幸自己勤勤力力，又借我外母15萬碌到今日咁，唔敢講搵得到好多，兩餐安樂茶飯食！」

否認塞春卷、乒乓波傳聞

大劉又首次公開談及多年傳聞，包括塞春卷、乒乓波傳聞，指並無其事：：「我谷咗氣好耐，最緊要係澄清唔好畀人造謠造非！我好多氣谷谷埋埋，話塞春卷呀、乒乓波、網球呀，點樣鬧人呀，摑人兩巴人哋喊呀，即刻攞張支票掟埋塊面度，我都隨身唔袋支票嘅！乜嘢都有人作，啲人唔抵得我搵到少少錢，多幾個女朋友，佢咪踩你囉。造謠造非，遲啲唔係話我塞人，係話我鍾意畀人塞㖭，都得㗎！」

大劉特別澄清：「有啲人好鍾意利用網絡去歌頌自己去踩人，我見唔少，有人話我點解同陳凱韻結婚，話佢阿媽畀咗個腎我，想去報恩就同陳凱韻結婚。我要換腎都搵個後生啲啦，60歲人仲要搵個老腎去換！」

解釋「The ONE」並非「一生中最愛」

大劉又提及蕭若元在其節目上指The ONE是大劉的「一生中最愛」，他表示：「我私人從來冇諗過無論大廈名叫做『The ONE』，係我個仔改，第一個英文好『水皮』，個稿係人哋交嚟叫我用祕書去登，借個祕書呃個『老襯』。」

而講到外界一直盛傳大劉直到現在仍有幫前女友還債，甚至「助養」她們，對此大劉表示：「有啲真係有『助養』，但唔係全部，值得我贊助支持我就會做，唔代表個個係。我喺兩三年前，匯咗一筆天文數字畀一個53年前嘅女朋友，依家佢都好老，因為值得我就會照顧，但有啲無良心又賤格就唔會，娛樂圈都有唔少呢啲人，好多鬼同魔。」

大劉：希望記者會後有人會收斂啲

大劉表示對於今次幫呂小姐，全因為考慮到和她的仔女：「佢嘅仔女一個12歲一個20歲，我決定幫與唔幫，平時我諗嘢0.1秒便決定了，我都諗咗分幾兩分鐘。我都係為咗我對仔女保留返一啲尊嚴。就算殺人唔係犯法我都唔會去做，因為考慮到我嘅仔女，但我都要保護我自己、陳凱韻同3個仔女，同埋我其他仔女，我當然要預防。李家超曾說『害人之心不可有，不過防人之心不可無』，我都要防。我希望記者會後有人會收斂啲。」

情斷8年後首度同行

聖誕節前，網上流出一條富豪劉鑾雄（大劉）在皇室堡發火鬧途人的影片，同時被揭與情斷8年的呂麗君（現名呂姵霖）同行。

正當外界以為大劉和呂麗君關係破冰，點知大劉發聲明，強調與呂麗君再見不是朋友，為免惹來復合的誤會，及有人乘機招搖撞騙，他才逼不得已出此聲明，聲明內容如下：

澄清聲明

對於近日有媒體明示或暗示，意指我與呂麗君(現改名為呂姵霖）復合一事，並非屬實，為免引起大家的誤會，本人 劉鑾雄認為必須要作出以下澄清，以正視聽：

1. 最近因呂小姐有困難，有事相求，本人為免小朋友受到影響的關係，遂與呂小姐達成商業協議。當日呂小姐只是在本人位於皇室堡的寫字樓簽署相關商業交易文件，然後在沒有相約之下一同乘搭電梯離去，並不是呂小姐與本人相約逛商場，在此之前，本人與呂小姐已多年沒有見面。

2. 上述有關交易純屬商業性質，並不構成本人對呂小姐任何財政照顧或支持。

3. 對於近日媒體出現網路打手，故意散佈謠言，不僅誤導公眾，亦對本人及本人家人造成滋擾，本人覺得有必要作出澄清。

4. 本人於2016年與陳凱韻結婚，亦早已將絕大部份名下財產作出處理，以防日後他人作出任何無理訴訟，所作一切無非為保障陳凱韻及家人，避免日後有人為一己私利，興風作浪。

5. 本人重申，本人與呂小姐除了作為小朋友的父母親外，並無任何關係，亦絕對不想有任何關係，請大家不要誤信網路打手不實傳聞，作出無謂的聯想或揣測。

6. 本人自2014年與呂小姐分手後，不相往來，是次作出此聲明，實屬逼不得已，為免他人乘機招搖撞騙。

大劉2016年娶甘比 登報與呂麗君撇清關係

劉鑾雄2016年11月在各大報章頭條發聲明，正式澄清與呂麗君在2014年已分手，強調兩人已斷絕關係，與此同時大劉與另一紅顏知己甘比則在同年11月18日入紙，正式註冊結婚！

大劉發聲明會負責子女生活開支

大劉在2016年的聲明中，澄清與呂麗君在2014年時已分手，二人已斷絕關係，僅僅是一對子女的父母而已。而大劉作為父親，會繼續負責子女的生活、教育及其他開支，包括現時居住的大宅、車輛及私人飛機等。其次大劉稱與呂麗君分手前，一直照顧對方的起居飲食，並有大量現金、首飾的餽贈，總值超過港幣$20億！

另外大劉又指責呂麗君「貪得無厭」，指就算給予呂麗君100億，對方一樣會為一蚊而出賣自己。另外大劉亦擔心自己離世後，呂麗君會因爭產而與甘比及子女們對簿公堂，故已預留逾100億港元現金給甘比及長子劉鳴煒打官司，揚言絕不退讓。

甘比2016年榮升劉太

而大劉在發出聲明後，原來與甘比已在2016年11月18日入紙，正式註冊結婚！甘比透過短訊回覆傳媒：「多謝！這是一件人生中最開心事！」至於大劉接受訪問時，則稱幾年前已經計劃與甘比結婚，這個決定與近日發的聲明無關。另外大劉亦大讚甘比不貪錢、為人單純，不是壞女人，一直都好照顧自己及一眾子女。

呂麗君回復單身 成為「超級富婆」

呂麗君在與大劉分手之前，曾為對方育有一對子女，雖然兩人高調分手，但大劉表示自己依然會履行父親的責任，照顧呂麗君所生一對子女的額所有教育和生活開支。除此之外，大劉表示自己過往已經餽贈大量禮物包括現金、首飾、豪宅給予呂麗君，總值超過港幣20億，直指女方「已是超級富婆，無需要我任何經濟支持，也可過着富裕的生活。」

回復單身的呂麗君也一直住在山頂白加道獨立屋，近年改名為呂姵霖，以此名字成立基金，推廣教育及藝術發展。閒時又會去跑步、攀石、做瑜伽等等，過著「超級富婆」的單身生活。