型格暖男大叔袁文傑 愛貓離世傷痛仍在

撰文、圖片：東方新地

與袁文傑相伴10年愛貓離世心情低落

養過寵物，都明白相伴多年寵物離世，嗰種痛楚與失去至親不相伯仲，既不是三言兩語能形容，也不是一時三刻就能釋懷。貓奴袁文傑愛貓囝仔與他相伴十年，去年開始病重身子漸差，今年8月終於離世，事隔數月，日前去到電視城飯堂醫肚，一支公食住碗麵，袁文傑心事重重咁嘅樣，似乎又真係仲未提得起勁。

對人歡笑背人愁忘不了愛貓味道

其實作為演員做幕前工作，對人歡笑係專業，背對住人呢？囝仔去世兩個月後少露笑容亦都少更新社交網，袁文傑早排都自爆心情仲未回復，話仲記住抱住囝仔嘅親子時刻，更加記住囝仔嚥下最後一啖氣時身上嘅味道，硬漢都有柔情一面。