79歲尹光全晚「坐冷板櫈」網民感不值：胡楓都上台唱咗句

網民批商台安排不當：要光B坐冷板櫈

「叱咤樂壇我最喜愛的男歌手」最後由張敬軒奪得，而連登仔勁推的尹光（光B）最後食白果。連登仔對此表示不滿，認為就算光B拎唔到「我最喜愛的男歌手」，都唔應該成晚「坐冷板櫈」，至少都可以出嚟表演，話晒光B已經79歲，53年第一次入叱咤，仲要為此整咗件戰衣，大鬧marketing做得好差！

網民：胡楓都上台唱咗句愛是永恆

好多網民都為尹光抱不平「請個老人家過嚟，獎都無個都算，連表演下既機會都無，個marketing 做得好差」「陳蕾領獎時 得佢一個老人家坐係嗰度」「上台數吓波波都冇」「胡楓都有得上台，仲唱咗句愛是永恆」「mirror無獎嗰啲都有得唱」「個下好sad 好似有個獨居老人坐喺度咁，想拍掌，但係冇人睇到」「拎過獎既歌就唔好要佢再唱多次啦，學下隔離chill club，考慮多少少成個頒獎禮其實係一個show俾觀眾睇」「佢老人家拍手拍足全程」

尹光出post感謝張敬軒

尹光於頒獎禮後，在IG出post恭喜打敗自己奪得「我最喜愛男歌手」的張敬軒：「今晚好高興 多謝有幸出席呢個盛事 非常出色👍🏼👍🏼恭喜哂軒公🎉 實至名歸！」

尹光：我從來未入過叱咤 拎到獎真係會喊出嚟

尹光早前上Do姐主持的商台節目《口水多過浪花》，表示自己53年嚟第一次去叱咤。尹光先講到真係好開心入到叱咤我最喜愛男歌手最後5強，因為覺得叱咤真係好難入。而拎獎信心只有百分之十，表示對手太強，邊有信心可以贏到，不過自己已做戰衣撐場，就算自己唔得，睇到人地領獎，佢都會好開心。尹光表示佢預咗無獎，但如果真係拎到佢可能會喊出嚟。

詳細請睇：口水多過浪花︳Do姐訪問尹光鍾意唱情歌 大爆53年第一次去叱咤 戰衣已準備！