視后唐詩詠入行23年竟一直被搞錯名 離巢1年北上發展被網民要求一件事

唐詩詠 被網民要求講廣東話

唐詩詠日前發放了她在小紅書的首段影片，片中她正在車廂中，身上扣著安全帶，以普通話向大家打招呼說：「大家好！我是唐詩詠，小紅書我來了～」引來不少網民留言，有不少網民指唐詩詠講普通話時不夠自然，希望她下次拍片時可以講番廣東話，有網民就指她所揸的是左軚車，猜測她目前正身在內地。

網民原來一直搞錯唐詩詠個名

唐詩詠入行已有23年，拍過不少劇作都令內地觀眾對她留下深刻印象，但原來好多網民都搞錯了她的名字，因此對她那句「我是唐詩詠」表示得非常震驚：「唔係叫唐詠詩咩？」、「一直叫的唐詠詩，原來我錯了」、「救命，我一直以為是唐詠詩」、「叫咗你好多年做唐詠詩」、「不是唐詠詩嗎，為啥不一樣了」等。

唐詩詠42歲靚樣密密變 回顧「唐姨陷阱」23年來變化

42歲唐詩詠早前隨《隱形戰隊》播畢就正式告別娘家，細數下原來「唐姨」已經出道23年，由以前《四葉草》純情小妹豬冧盡萬千少男，搖身一變成熟女演技派視后，唐詩詠真係「陪你長大」咁話！然而唐詩詠咁多年嚟樣貌密密變，網民話似足坐過山車咁時好時壞！

2000-2005年：純情妹豬樣冧死少男

唐詩詠年紀細細就步入娛圈，中學已經學人做兼職模特兒。2000年，年僅19歲的唐詩詠索性踩過界幫港台拍攝青春劇《青春@Y2K》嶄露頭角，開始用演員身份出道，有份在《嫁個有錢人》、《2002》、《墨斗先生》、《龍咁威2之皇母娘娘呢？》等電影做下配角儲演技咁啦！不過大家最熟悉都係唐詩詠公仔箱的演出，尤其2003年加入無綫電視後，首部劇集《當四葉草碰上劍尖時》嘅可愛少女造型，當時臉仔紅紅十足靚靚版小丸子，加上時不時碌大眼仔賣可愛，認真冧掂萬千少男！

2007-2012年：唐詩詠開始谷行女人味 嘗試甩走𡃁妹除

唐詩詠娛圈撈咗一段時間，開始套套劇有份做吓入屋配角，觀眾多咗機會夜晚見到唐詩詠。當時唐詩詠未稱得上超班，但都開始有板有眼，見得吓人唔失禮咁啦！當然女大十八變，唐詩詠開始執吓唔同造型，諗住谷行女人味冧觀眾，仲試過剪短頭髮走鐵女子風格，但撞見本刊塊面仲係紅到小番茄咁，副可愛𡃁妹樣走晒出嚟，就算2012年拍《造王者》搽晒粉底出鏡，依然白裏透紅碌大眼仔，十足凍齡洋娃娃，成日都犯規不經意賣萌，一股「妹豬味」滲晒出嚟！

2014-2015年：醞釀多時 唐詩詠啲女人味瀉出嚟啦喂

早期唐詩詠依然娃娃臉，走慣可愛路線嘅唐姨早就密謀變身真女人，踏入2014年唐詩詠接拍《載得有情人》索性轉look變身啡毛女郎，嗰陣女人味瀉晒出嚟，醞釀多時終於得米甩走可愛妹妹嘅味道！之後唐詩詠撻著洪永城甜到漏油，獲封「廿四孝最佳女友」美譽，形象正面到爆棚，就算之後2015年唐詩詠冬菇頭look拍《四個女仔三個Bar》一樣女人味滿瀉，但塊面仔唔再紅晒遮唔住，睇嚟唐詩詠開始升呢變「唐姨」啦喎！

2016-2017年：唐詩詠女人味勢不可擋 砌低「咪神」高Ling

唐詩詠又再進化！呢期大解放唔多怕醜狂晒苗條body，睇返唐詩詠2016年《不懂撒嬌的女人》開鏡儀式啲靚靚相，五官愈大愈四正，嗰副body開始大殺四方，就算彎晒身拍落「咪神」高海寧，嗰股索爆女人味無法可擋，連高海寧都被砌低！後尾《不懂撒嬌的女人》叫好叫座，唐詩詠拍住王浩信的狗血式離離合合，大獲觀眾讚賞，但點估到唐姨宣傳活動時坐晒人地大脾，密密培養默契咁鬼搏先！

2018-2019年：唐詩詠升晒呢晉級無綫御用女一

《不懂撒嬌的女人》叫好叫座，幾乎牽起全城追劇潮，搞到班師奶葡萄死唐詩詠劇中有得嗒猛男王浩信，連無綫都要急急腳補拍結局鏡頭，鋪路寫王浩信同唐詩詠復合，費時原先嘅分手結局嚇走師奶收投訴。套劇咁鬼受歡迎，唐姨點會唔身價幾倍升，順手拎埋2017年《萬千星輝頒發典禮》視后，成為當時嘅廣告吸金女王，睇下唐詩詠捱足多年，拎獎嗰時水汪汪的眼睛，粉絲見到也替她高興歡呼呢！而隨住唐詩詠同洪永城宣告玩完，另一段感情就搭上素有「教育界王力宏」之稱的陳思銘，據知佢坐擁近億升學王國，係當時城中筍盤！

2020年：唐詩詠不敵年華走樣了

沒有永恆不滅的傳奇，也沒有永恆靚爆鏡的唐姨！唐詩詠步近四字頭，面臨娘家花旦流失潮，唯有頂硬上密密接劇做女一，捱到樣貌都殘咗，個對眼袋現晒形，面容浮腫，但好彩五官都仲keep到，雙眼皮依然深刻甜美。而唐詩詠同「教育界王力宏」陳思銘的一段情亦玩完拜拜，唐姨又再回歸單身變荀盤啦！

2021年：唐詩詠變姨姨了

2021年，唐詩詠在抖音上載一條片，片中她頭髮凌亂及束起頭髮，身穿鬆身衫加上凌厲眼神，噸起個樣扮嬲﹗仲要話自己好生氣，七情上面。不過更多的留言是驚呼唐詩詠殘樣兼且頸紋盡現，慨嘆女神老了，「女神不再」、「頸紋好嚴重，不能只顧臉，其他部位也很重要」、「好顯老」、「胖了有師奶味」、「TVB捱得比較苦，但也要注重保養！」

2022年：唐姨回春變正妹晒泳裝

已經四張野的唐詩詠終於回春，仲宣佈離巢告別娘家尋理想，即刻心情靚爆去吓旅行，樣同身材都忽然回晒春！平時衣著都幾保守的唐詩詠，罕有以泳裝示人，雖然唔係三點式，只是肚兜款的泳衣，但對她來說已是極限，再加上自信爆棚狂擺性感pose，不少網民都大讚唐詩詠keep得好，更有網民留言「留鼻血」與「白滑靚女」，當中最到位的一句肯定是「離開無綫後有放監的感覺」。

2023年：唐姨姨都有「清朝額」

41歲無綫視后唐詩詠，去年9月和「娘家」結束近20年賓主關係，離開日夜顛倒拍劇生活的唐詩詠，還發表「就是按照自己喜歡的方式過這一生」，早前唐詩詠跟父親到日本旅遊慢活嘆世界，並在社交平台大晒日本打卡靚相，點知驚現「清朝額」，髮線嚴重向後移，看來回復自由身仍未能令髮再生，不過唐詩詠計年紀已經年輕不再，能夠活出自我享受吓生活，何嘗未係好事呢？祝福唐姨姨離巢生活愉快啦！

早前被捕獲有猛男陪慶生有望脫單

女人四十一枝花，曾被封「絕世好女友」的唐詩詠今年5月生日時，就被網民野生捕獲有猛男陪食齋兼開心切蛋糕，片中唐詩詠身穿鮮綠色線衫襯恤衫，打扮好有文青Feel，網民拍片上載小紅書並寫道：「唐詩詠真人好靚！家人們誰懂啊，今天跟家人去素食館一眼就從門縫認出了唐詩詠！原本不敢確定，認真看了之後發現真的是，真人真的好漂亮！看樣子是在慶生，不曉得是誰的生日哈哈哈…」

與猛男合照流出

之後唐詩詠於社交網的限時動態轉發當日與cap帽男的合照，並留言：「thank you」，另外其男友人亦上載飯局合照上社交網，原來當日有3位猛男在場為唐詩詠慶生，而cap帽男與唐詩詠的生日只差一天，二人年紀相約，外形亦登對，被指有望發展，唔知兩位當事人有冇心呢？