周潤發都要密謀轉行！65歲發哥停工一年樂觀面對慨嘆演藝事業式微

Aug 19 2020

疫情之下，人人自危，經濟與社會氣氛都低迷，難免會產生負能量，不過香港有出名親民貼地的發哥周潤發就唔使怕，65歲愈跑愈弗回晒春，今次記者跟佢跑山之餘，咁勤力原來密謀轉行！

發哥周潤發疫情下照行山快閃九龍城買外賣

近年掀起一個捕獲發哥周潤發熱潮，凡在行山期間或幫襯食店撞到發哥，都必定上前由發哥自拍影合照，大家都把照片放上社交網晒命，遇到發哥如同執到金，不過近半年因新冠肺炎肆虐，香港人要減少社交活動，在限聚令及禁堂食等措施下，運動及出外食飯都受到影響，見到發哥的機會自然大大減少。不過發哥多年的行山習慣唔係話停就可以停，疫情下發哥山照行，不過周圍食好西就免喇！

發哥與發嫂疫情期間都甚少出街食飯，發哥話冇叫發嫂特別煮抗疫食療，但每日都做運動鍛鍊身體。

發哥疫下只能堅持跑山，至於出街食飯同買餸都受到影響，他說：「食肆得兩個人可以一齊坐都唔係多啦，好多嘢都避無可避，咁你困喺屋企都會抑鬱㗎啦！盡量去啲人少嘅地方囉！去郊野地方囉！咁張建宗都叫我哋食嘢要去郊野公園食㗎嘛！我買個飯盒跑完喺郊野公園食埋先走囉！」

日前發哥出巡九龍城，去古法蛋糕店掃走兩盒蛋糕，這日他一身行山黑衣裝束，但腳踏人字拖戴上黑超，踢拖一樣型過人。

之後發哥再到五金舖買水喉，同師傅傾完一大輪，睇嚟發哥返屋企又自己落手落腳做埋水工。

發哥有感演藝事業式微密謀轉行

發哥雖然已是荷李活巨星級，但他心繫香港，對於香港遇到史無前例的經濟及生活困境，他表現得極之心痛。但仍不望向大家打打氣：「我哋一定要打贏佢，唔怕！香港係福地嚟嘅！一定會過到個疫情，大家畀啲心機，畀啲忍耐。樂觀啲，咬實牙關，見步行步啦！怨天怨人都冇用，人係要靠自己，總之盡量做好自己，一定要做多啲運動，要有強健身體頂住呀！最緊要個個都身體健康。」

記者早前曾獨家捕獲發哥與山山行山，更在涼亭內為同行跑友鬆筋，見他似模似樣好專業，睇嚟發哥唔止想轉行做行山教練，仲可以做埋鬆筋教練。

周潤發：「打算考牌轉行做行山教練！」

發哥為人縱使超級樂觀，但2020年對他來說絕對是悲痛的一年，除了因疫情令生活及工作受影響，今年2月發哥98歲的母親亦因病離世，並低調舉行喪禮。還記得去年12月發哥現身養和醫院，探望因病入院的母親，當時他笑對記者說母親不用戒口，因為所有食物都要打爛，用條喉直入，凡事樂觀積極面對的他又透露自己的未來動向說：「依家我嘅工作都開始式微，日常都係跟啲藝人朋友去行山，最近我條𡃁係阿鮑（鮑起靜）！我想轉行做運動員，打算考個教練牌做行山教練。」