周啟生斥樂迷搞死樂壇掀罵戰 重提廿年前批中楊千嬅唔啱做歌手

周啟生狠批樂壇：一班食客，垃圾都可以吞落肚

樂壇前輩加音樂人周啟生指梁文禮「去批評一個根本唔識唱歌嘅名歌手」係無錯嘅！卻遭網民狙擊，周啟生再出口：「A鬧阿B，暫且唔討論A啱定唔啱，阿B搵一千人去對付A，我認為阿B唔啱！」慨嘆香港樂觀壇缺乏實力派歌手，更比喻「一班食客，垃圾都可以吞落肚，仲邊度會有好嘅廚師？」周啟生再發長文，今次點名去年回歸香港開騷的楊千嬅！

周啟生廿年前批中：楊千嬅唔適宜唱歌

周啟生發文重提廿年前曾狠批過楊千嬅根本唔適宜唱歌，他指當年被人鬧到飛起，但現在人人鬧楊千嬅，正正批中了。他長文寫道：「活在一個奇特嘅城市叫做香港，音樂藝術在流行市場裏面，其實商業佔了大部分。一個歌手會否成名，同佢本身音樂嘅能力同天份絕對不成正比例！在這環境工作差不多五十年了，曾經合作，共事嘅成名歌手也有很多，其中有著漂亮外型、俊朗、性感身材嘅也有不少…….經驗所見，真正成名利就，同唱歌好叻或者音樂造詣好高嘅，絕對唔成正比例。我經常掛喺嘴邊嘅都以實力行先，差不多20年前我曾經講過楊千樺根本唔適宜唱歌！當時畀人鬧到飛起，而家人人都鬧緊佢。改變嘅並非係事實而係大家嘅心態……寄語香港嘅迷哥迷妹，再瞓身誓死保護偶像同時，唔好忘記實力兩個字，否則香港音樂界前途堪虞….Alas！」

曾批評姜濤與粉絲開火！

周啟生兩年前看見樂壇興旺，曾出po指感到高興，希望新一代歌手有實力，唱歌的專注唱歌，演戲的專注演戲，做好一瓣先去另一瓣。不過，去年11 月，他忍唔住出po批評現今樂壇：「一個邪惡嘅樂壇，一個醜陋嘅面貌」，並以「香港樂壇魔音大比拼拍片，片中有姜濤、張蔓姿、麗英、COLLAR」，被網民讚敢言，周啟生即回覆：「唔講真話同條鹹魚有乜分別？」被疑似姜糖圍攻，周啟生理直氣壯：「質素低劣嘅歌迷只會影衰自己嘅Idol！ 」、「年青一代嘅樂迷，對音樂嘅要求，門檻調教到好低。如果好輕易就對一啲人評價好高，咁樣樂壇係唔會進步！」、周啟生直指歌迷要求低才造就低質的偶像，一點也不怕被狙擊，揚言：「話之佢死，夏蟲不可以語冰」直指所謂粉絲見識少。

延伸閱讀：歌詞庫

61歲周啟生以自身作例子：唔努力即係冇天份

周啟生表示明知講都無用，只是用心良苦，又以自己做例子，講咩叫努力，指自己多年來保持練琴同做運動：「努力係一個人最大嘅天份，我講俾你聽乜嘢叫努力，我到而家每日都可以彈八個鐘頭琴，做運動keep住一生唔停每日四個鐘都可以，最基本叫做努力！唔好同我講有啲人做咗少少嘢就叫做好努力，其實唔努力即係冇天份！」