呂慧儀蟹媽變虎媽單親教仔壓力爆煲

Nov 22 2019

單親媽媽絕對唔易做，去年與前夫黃文廸離婚後，長腳蟹呂慧儀母兼父職照顧兒子，5歲的蟹籽Anton （黃柏翹）明年升小一，呂慧儀為力谷他考到心儀小學，變身虎媽。

呂慧儀健康與壓力爆煲Dry爆變「忟薑」

最近《愛．回家之開心速遞》宣布一星期播足七日，劇中要角呂慧儀每日放工都要趕返屯門娘家湊仔，早前更因體力不支在家中暈倒，健康與壓力同時爆煲，再加上懸崖勒馬與花心張景淳斬纜，Dry爆的呂慧儀變「忟薑」，睇嚟惟有蟹籽快啲考到好學校，呂慧儀先可以放輕鬆。

蟹籽下年讀小學蟹媽後知後覺嚇到癲

呂慧儀形容過了一個「地獄九月」，因要忙為蟹籽準備面試學校而亡羊補牢，更為他報讀了不少面試班，知情者透露：「之前兩年呂慧儀都未識驚，幾個月前同蟹籽啲同學家長傾開，佢先知原來個個小朋友都周身刀，乜都唔識考小學一定唔掂，所以佢就變咗虎媽，依家每晚陪蟹籽瞓覺都同個仔練自我介紹，拍劇趁空檔又整定啲生字卡畀個仔認字，未面試佢已經緊張到喊，依家冇嘢緊要過蟹籽考小學，呂慧儀因為畀自己同個仔太大壓力，最近精神差咗笑容都少咗。」