吳若希影孕照嘲老公做道具唔夠sweet 網民睇唔過眼：連sweet都要被指揮

原文刊於《東方新地》

28歲人妻吳若希（Jinny），大女都3歲，細仔都就快出世，不過言行都同做女時一樣咁出位，早前宣傳新歌公開大爆老公何兆鴻（Alex）婚前經常講大話，曾背叛她腳踏兩船，所以Jinny話做惡妻是有苦衷云云。雖然吳若希成日公開鬧老公，但仍同 Alex成功製造第二個愛情結晶，不過她亦自爆是因疫情留家中冇嘢做故成功造人。近來在家安胎的吳若希，貼出同老公的孕照，相中的吳若希著住高釵背心連體衫，臉、身及手指貼上花，挨住老公，一輯看似幸福的一輯巨肚孕照，不過原來是Jinny的抱怨文：「這張孕照，

是第一輯的孕照的攝影師 @tylerli_ 幫我們拍的，因為有拍過的經驗，

他尊稱我夫君大人為「道具」。

「props 埋位！」

「頭低d」

「望住老婆」

「sweet d」

我承認他真的很像一個會動的道具～

連「sweet d」都要被指揮，可想而知他對我是有多愛

網民勁踩孕照：偷咗阿仔件底衫著？

吳若希嘲老公係道具，怨佢唔夠愛自己，不過未有得到網民共鳴及安慰，反而惹來大家洗版鬧爆：「連續sweet都要被指揮」、「自然啲唔好咩，太扮嘢，作狀」、「老公唔喺呢行唔識對鏡頭都唔係罪」、「老公勁慘」、「做甚麼都咁高調，點解嘅？」、「專制到」，更有大量留言係踏佢輯大肚相冇美感「得罪髮型師系列？個頭想點？」、「好似偷咗阿仔件底衫」、「啲花想點？」，向來惹火的吳若希，最愛在社交網擦存在感，相信就算係負評都唔冇所謂嘅﹗

吳若希新歌藏老公講大話證據

吳若希（Jinny）日前作客TVB娛樂新聞台節目《 StarTalk 》，接受主播許文軒 （Edmond）專訪，談到為何時常公開談論老公的惡行時，Jinny笑說：「其實呢啲唔係情趣，係事實！因為用溫和嘅方法對男仔係冇用㗎！」吳若希感慨表示相隔四年終於再推出新唱片：「 其中〈 麻醉 〉呢首歌係講我老公拍拖時嘅關係，我本身好鍾意隻歌，但又愛又恨，大家聽吓就知我老公未同我結婚時有幾多大話，搞到依家我一聽到啲歌詞就好嬲，因為我最憎人講大話！」

提到再度懷孕的感受，吳若希笑言：「 我好記得上一胎我臨生時，姑娘叫佢起身唔好瞓，話你太太生啦！佢竟然繼續瞓，嗰吓真係嬲，呢個人點可能唔理小朋友出世，淨係掛住瞓，我好期待今胎佢會唔會再瞓到成隻豬咁！」

窒完老公又甜蜜放閃 網民質疑吳若希：大肚婆情緒化？

28 歲吳若希上月突傳出懷胎三個月，當事人一直未有正面回應。吳若希同老公同步公布喜訊，立即得到不少圈中人恭賀，亦有網民留言：「睇嚟你老公鍾意打機之餘都會做其他事。」吳若希秒回：「疫情期間日對夜對，都真係好悶既。」自爆同老公係疫情期間密密做人所以搞出人命，何生真係要多謝呢個疫情囉﹗

吳若希囡囡為弟弟改名Krisoff

吳若希之前一直未有正面回應再度懷孕消息，上月廿三日28歲生日時更貼出跟初生貓咪合照指家中的確有新成員，原來當時吳若希確實陀住在BB，當時亦透露貓咪性別係男，並由囡囡淼淼改叫Krisoff，相信當時想跟大家分享喜訊但未夠三個月未能公布，故借初生貓咪來回應陀仔報道。

吳若希突然停工為安胎

28歲的吳若希(Jinny)自從出道以來便緋聞不斷，還特別有大叔緣，先後獲得多名叔父輩城中富豪特別照顧，居所愈住愈豪、座駕愈揸愈豪，長久以來收入與支出極度不成正比。想不到大叔緣直到產女結婚之後依然暢旺，代步繼續用富豪名下靚車、收工繼續喜孜孜由關係千絲萬縷的億萬富豪十哥接送。去年底與十哥藕斷絲連關係曝光再引軒然大波，才激到另一半何兆鴻 (Alex)出招，搖身一變成為跟得老公連日蒲頭電視城等收工，亮點係入手新車由兩公婆名下公司持有，回復恩愛連造人都動起來！上月有傳吳若希陀B三個月，好快為囡囡添個伴了！

窒完老公又甜蜜放閃

傳出又有身孕的吳若希仍然密密出Post，日前就Po出一張身穿民族長裙的造型照，留言間有暗串老公意味：「尋晚何兆鴻（吳若希老公）令我體會到一樣嘢，無所謂既「應唔應份」，只係睇你「樂唔樂意」。你唔樂意，就無嘢係應份。」隔一日就甜曬同老公慶祝生日嘅照片，仲話：「昨晚過得好滿足～」令網民不禁懷疑吳若希再有身孕的傳聞屬實，情緒似乎波動。

傳陀B仔三個月

一向看重事業的吳若希，被爆近來連推兩部重頭劇，大好機會都放棄即惹來懷孕揣測，而她早前便在instagram呻增磅不少：「我今天量體重，54kg比平時重了3kg，但看到自己的腿和手臂還那麼細，就跟自己說了句，今晚可以放心吃消夜…」愛keep fit突然增磅又被拍到孕味濃微胖照，有指吳若希因為剛懷孕滿三個月，所以未向外報訊，但家人十分緊張，吳媽媽為此更每日到女兒家貼家照顧，而近期除了宣傳新歌〈有位蠢才〉外，連主持的節目《姊妹淘》都被停播了，吳若希可以有更多時間好好安胎，不過對於事件，吳若希就禮貌表示唔回應了，未有否認陀B消息。

吳若希「疫」市派歌有成績 廿四孝老公幫手Plug歌

早於去年暑期飛去台灣錄新歌、拍MV，可惜人算不如天算，吳若希新歌新碟計劃一推再推，今個月終於「疫」市發放〈有位蠢才〉，可幸旋律洗腦啷啷上口，時勢影響亦多了觀眾樂迷留家聽歌睇電視，成績可謂十分亮眼。人人疫市停工居家，吳若希就為宣傳連日出入各大電台和電視城做訪問及錄影節目。記者發現Jinny勤Plug歌，老公Alex比她更勤力，連日現身電視城做柴可夫司機，有時連下午茶、晚餐都在電視城飯堂解決，熟路到當正自己地頭！

唔再用十哥座駕 新車終於有自己名

出道十年，吳若希言行比食神更難估計。福建出生家境清貧，卻在短短兩年間從400呎公屋搬入何文田豪宅、座架換得密更升級快，架架登記都在頂級富豪名下；與老公Alex 17年高調拍拖高調分手，分手後又失驚無神懷孕復合再結埋婚；與澳門Alex結婚兩年、囡囡Giselle月尾就滿三歲，去年底卻驚爆依然與富豪十哥關係密切，對方親自驅車到電視城接收工搬行李，吳若希面上的興奮笑容更十足懷春少女急不及待甜到漏。

那邊廂被爆婚後密友接收工，呢邊廂愛晒恩愛的Jinny都明顯少了放閃，婚姻生活現危機。老婆交遊廣闊又難捉摸，好彩Alex死心塌地未肯認輸，據知情人士透露，去年報道一出Alex即時勤出招收復失地：「一家人生活重心本來以經商Alex為主，一家三口一直居於澳門，後來Jinny為咗囡囡升學先搬番香港，而Alex為生意故兩邊走，但呢幾個月因為大環境影響生意，Alex聽晒老婆話搬咗大本營番香港。結婚咁多年被人踢爆仲用緊十哥名下車，Alex嗱嗱聲買車，仲要揀七人車，方便老婆開工用，架車登記係Alex公司名，而間公司係Alex同Jinny持有，變相咪就係送新車畀老婆囉，Jinny點會唔冧先？」

重拾恩愛 吳若希轉口風肯追多個

搬屋送車再做埋跟得老公日日管接管送，吳若希接受電台訪問，表面上話對多咗老公對到厭，實情態度與半年前都180度徹底轉變。近來在個人IG做直播、次次梗有老公在左近糖黐豆一樣；日前做Live話嫌棄老公掛住打機，曲線勞役Alex下廚煮宵夜，又突然自爆閨房秘密話老公寧願打機都唔願打X機，其實都係暗示兩公婆閨房趣事多又美滿，另一半根本無此需求。

連被記者問幾時追多個，吳若希都從生完Giselle怨聲載道嫌一孕蠢三年、又推卻無計劃無需求，到日前去電台錄節目推新歌，轉口風話順其自然又嫌老公唔勤力：「其實都有諗過，都有計劃，囡囡都想要個妹妹，但呢啲可遇不可求，所以順其自然。(係兩公婆努力緊？)唔知係唔係算努力啦，總之係正常生活囉！」言下之意即是夫妻感情大進、房事頻率正常，睇怕好快有機會再報喜！Alex成功化解婚姻危機可記一功！