吳業坤赴日Working Holiday兩個月 零工作自嘲「待業坤」

文：東方新地 ｜吳業坤IG、新傳媒圖庫

赴日兩個月零工作自嘲「待業坤」

吳業坤「坤哥」去年11月趁住未超齡，專程飛到日本進行Working Holiday，至今已逗留超過兩個幾月。坤哥日前接受鄭裕玲「Do姐」電台節目訪問，自爆兩個月嚟都抱住「佛系」心態搵工，佢話：「其實日日瞓到自然醒，瞓醒都10點後，做運動醒下個人，之後就出去食飯，食飽睇下日文書好快到夜晚，開頭都諗住搵工，但係唔知幾時返香港，所以算啦，變咗no working嘅working holiday！」佢仲笑自已目前叫「待業坤」，坤哥陣毒男味出晒嚟。

坤哥：覺得自己好廢！

訪問中坤哥話喺日本因為太得閒，毒到匿埋上網學捲脷，學足一星期。之後，Do姐好心提議佢拍下旅行片擺上網同大家分享，點知坤哥不離毒男本色話：「未體驗到啲乜，冇咩衝擊，揸住部相機，好似硬要拍啲嘢出嚟，算啦，真係遇到特別先。」訪問到最後，Do姐終於忍唔住問佢唔悶咩？坤哥先話：「有啲思鄉，原來兩個月唔工作，都有諗覺得自己好似好廢！」

IG晒無綫十年金牌慘被網民留言：浪費青春

30歲的吳業坤日前獲無線頒發十年金牌，出席《無綫長期服務暨傑出員工頒獎禮》還包括有獲頒廿年金牌的阿叻陳百祥，由行政總裁李寶安親自頒授金牌，各高層都有出席，場面看來相當盛大。之後，坤哥在社交網威威晒金牌，並留言考大家金牌的意義，獲得過千留言，不過大部分都笑他浪費十年青春，又重提他在台慶被安排做人肉棋子之大辱，紛紛留言叫吳業坤離巢向外闖，更有網民指這十年金牌連狗牌都不如﹗

吳業坤被勸參加《造星》

吳業坤獲得十年金牌，即在社交平台騷畀大家睇，並留「考大家知唔知塊金牌有乜意義？」獲過千多個留言，不過九成九都唔係戥坤哥高興，而是嘲笑他把十年青春就此浪費，紛紛叫坤哥離巢外闖，更提議他過檔近來成為無綫勁敵的ViuTV，又叫他下次參加《全民造星4》。

坤哥被重提台慶扮棋之辱

網民重提吳業坤六年前在台慶扮棋一事，指他在大台冇甚發展，只會繼續被忽視，更有網民恥笑他「有冇諗過發展棋藝，下次做中國象棋定圍棋？」。同時亦有網民指無綫十年金牌連狗牌都不如，網民即留言「狗牌都有名，佢（坤哥）個塊冇㗎」吳業坤晒十年金牌呃like不成，反被網民派嬲同瘋狂恥笑，被圍笑圍插的坤哥，未有回覆，繼續沉默。

為追歌手夢入行卻拍劇多過唱歌

回看一心想當歌手的吳業坤，10年參加《超級巨聲2》獲得第五名而入行。16年頭的頒獎禮是其豐收年，在《勁歌》奪得「最受歡迎新人金獎」，並憑〈原來她不夠愛我〉得勁歌金曲獎，上台演出時泣不成聲，成為經典之一。同年在商台《叱咤》頒獎禮一口氣摘下三個大獎，包括生力軍金獎、我最喜愛的男歌手和憑〈原來她不夠愛我〉奪得我最喜愛的歌曲大獎，成為頒獎禮大贏家，上台不但喊到扯蝦，身穿直條西褲的坤哥，下體現激凸，被指興奮過度，一度成為佳話及其代表作。
16年以最出道年資最短僅十六個月在紅館開個唱的坤哥，開完個唱後似乎無以為繼，在無綫拍劇多過唱歌。過去一年都是以拍劇為主，月前拍畢的新劇《異搜記》、間中上《流行經典50年》翻唱老歌，而非宣傳新歌，難怪被網民指浪費十年青春。