古巨基演唱會︱7大焦點！22位年輕歌手撐場 親自回應為何無請《聲夢》新人

古巨基演唱會︱1. 罕有化身跳唱歌手 又唱又跳超落力

向來少有在舞台上跳舞的古巨基，今次為演唱會罕有化身跳唱歌手，在唱到《順風車》時又唱又跳非常落力。

古巨基演唱會︱2. 邀請22位樂壇後輩當嘉賓 卡士媲美頒獎禮

古巨基在過去於2021曾經展開音樂企劃《 I REALLY LOVE TO SING 》，並表示：「香港樂壇有很多好歌聲，值得被更多人聽到！」近年一直出心出力提攜後輩的古巨基，今晚演唱會更邀請了22位後輩當任嘉賓，包括MC張天賦、Tyson Yoshi、Dark黃明德、吳保錡和細貓等人，卡士陣容媲美頒獎禮。古巨基更鼓勵在場觀眾多支持樂壇新人：「頭先台上有好多新歌手，有好多可能大家未必會了解佢地或者佢地嘅音樂，當中有啲可能係自資出唱片，有啲可能係網上自己發表歌曲，冇乜好多Support嘅歌手。希望大家今晚喺呢個場合見到佢地嘅名字，可以係網上面搵吓佢哋嘅音樂。」

古巨基演唱會︱3. 舞台設計花心思 每首歌換背景

雖然演唱會並沒有大型機關或華麗的舞台擺設，但當古巨基每唱一首歌，背後大熒幕都會換上新的背景配合歌詞，簡單得嚟又有心思。

古巨基演唱會︱4. 演唱會服裝全面睇

除了演唱會舞台設計之外，古巨基在服裝方面亦非常花心機，兩小時的演唱會中換上5套服裝，件件都盡顯古巨基高挑身形，其中以一開場的白馬王子Look最型仔！

古巨基演唱會︱5. 力臻除衫大曬肌肉

嘉賓之一的力臻和古巨基合唱完《Can We Try》之後，直至下一首歌《第二最愛》前奏響起都遲遲未有下台，仲突然除衫話要畀驚喜古巨基！原來件衫內裡有好多張古巨基相片，同時曬六嚿腹肌大派福利畀一眾樂迷！

古巨基演唱會︱6. 曾嘗試用AI寫歌給家人：AI係寫唔到歌

早前網上瘋傳AI尹光、AI陳奕迅等AI歌手，古巨基在演唱會笑指自己亦曾經嘗試用AI寫歌給太太和兒子，不過最後得出來的結果令人無語：「我之前試過用ChatGPT，問佢可唔可以幫手寫首歌畀我太太同個仔，佢彈出呢兩段嘢畀我。我發覺AI係寫唔到歌，將來我唔知，但係呢個moment我相信係做唔到嘅。同埋頭先咁多新晉歌手，點解我會覺得AI係冇可能做到人類嘅音樂、歌聲，係因為佢地哋付出咗好大努力，經過好多高低起跌，將佢地嘅經歷寫出嚟，係有血有肉嘅，唔係任何一個AI可以做到。」

古巨基演唱會︱7. 當爸爸後首個演唱會：大家一齊叫仔仔個名

古巨基的兒子Kuson 2019年出生，轉眼間已經3歲，今次亦是古巨基當爸爸之後首個演唱會。他在台上指仔仔綵排期間曾經想上台同爸爸一起跳舞，不過就被媽媽帶落台。古巨基一講到仔仔就笑到見牙唔見眼：「不如大家畀佢感受下咩嘢係演唱會嘅聲好冇啊？我估我老婆有拍低嘅，你哋介唔介意大家一齊叫佢個名『Kuson』，我嗰仔叫『Kuson』啊！我諗佢睇到呢個片會好好笑，多謝大家！」

同場加映：回應沒有邀請《聲夢》出身歌手一事

當被問到沒有邀請到《聲夢傳奇》新人合作一事，古巨基回應指：「互相認識或者合作係緣分嚟嘅。喺咁多合作單位入面，我都講過我好鐘意碌Youtube，好鐘意搵一啲單打獨鬥嘅歌手，自己自資或者揼石仔咁做音樂出嚟，咁睇完一個佢就會relate咗另一個俾我睇。咁喺Youtube上面係緣分令我認識到大家，所以合作都係緣分嘢，唱歌都係開心嘢，大家都平常心咁去認識咁鐘意音樂嘅朋友啦！」

一齊睇古巨基足本訪問：

&feature=youtu.be

古巨基《I REALLY LOVE TO SING｜AROUND THE WORLD LIVE 2023》演唱會完整歌單：

1. 《我生》
2. 《初初》
3. 《任天堂流淚》
4. 《眼睛不能沒眼淚》
5. 《漂流教室》
6. 《順風車》
7. 《有少少愛》（w/ Delta T）
8. 《Can We Try》（w/ ⼒臻）
9. 《第二最愛》（w/ Tyson Yoshi）
10. 《In My Dream》（原曲：Tyson Yoshi）
11. 《愛神》
12. 《樓下有人》
13. 《心跳回憶》（w/ 細貓）
14. 《歡樂今宵》
15. 《一刻永恆》（w/ Dark）
16. 《自我安慰》（w/ MC張天賦）
17. 《記憶棉》（原曲：MC張天賦）
18. 《告別我的戀人們》
19. 《地球很危險》
20. 《時代》
21. 《致少年時代》
22. 《星戰》（w/ 吳保錡/張進翹/顧定軒/黃劍文/洪助昇/何佩/黎啟峰/Michael C/張蔓莎/劉君冬/⾕旻/張天穎/STRAYZ/Lowa/Triple G/黎展峰）
23. 《人生有幾多個十年》
24. 《花灑》
25. 《愛回家》
26. ENCORE：《必殺技》
27. ENCORE：《重複犯錯》