倪晨曦、孫慧雪、岑麗香陀B零走樣！娛樂圈索媽孕照合集

原文刊於《東方新地》

倪晨曦最賞心悅目大肚婆

原定今年二月行禮結婚，計劃被疫情打亂，不過女神倪晨曦嘅造人大計如期實行，如今陀住六個月大肚繼續做瑜伽繼續影靚相，精緻五官加上完美體態，絕對係最賞心悅目嘅大肚婆。

吳若希懷第二胎

2017年當紅時期突然宣布懷孕，先生女後結婚絕對係意料之外，今年六月，28歲嘅吳若希同老公何兆鴻有共識下成功再懷第二胎，3歲 Giselle 今年尾就會正式做家姐！

李亞男再添一女

35歲李亞男同王祖藍2015年結婚，18年尾宣布囡囡Gabrielle誕生，今年中二人再次傳來喜訊，第二胎雖然又係陀女，不過見李亞男依然狀態大勇，老公祖藍吸金能力又強，生多兩個肯定不成問題。

陳凱琳2年抱兩

13年當選港姐冠軍、15年與當家小生鄭嘉穎譜戀曲、18年結婚、19年產子、20年再度懷孕細仔Yannick上月出世，29歲嘅陳凱琳呢五年人生夠晒精彩又緊湊。

賴慰玲至索大肚相

家陣每晚同大家喺《反黑路人甲》見面，估唔到呢？其實好戲又霸氣嘅「蔣家大小姐」賴慰玲一早係媽媽輩，17年與舞台劇演員結婚再宣布有喜，當時都影過至索大肚相。

孫慧雪白雪雪索爆大肚相

16年結婚，雪雪孫慧雪嘅囝囝Riley 今年已經三歲大，三年前都影過白雪雪索爆大肚相，不過呢兩年拍劇拍不停，似乎暫時無意追多個。

楊怡等待多時終成功

今年二月情人節前夕，40歲楊怡同老公羅仲謙喺IG發布靚靚孕照公布懷孕，4月女兒 Hera 剖腹出世。 如今楊怡乖乖留家抗疫湊女，謙謙就劇接劇努力搵奶粉錢。

岑麗香顏值高索媽

35歲嘅香香公主岑麗香去年三月誕下囝囝Jacob榮升人母行列，顏值高觀眾緣好冇理由浪費，話咁快收身後即復出拍劇擔任新劇BB大晒》女主角。

胡杏兒肥完又瘦瘦完又肥

今年40歲嘅胡杏兒17年誕下長子Brendan後，三年抱兩於19年再誕下次子Ryan，肥完又瘦瘦完又肥，杏兒經已駕輕就熟對身形控制自如！

鍾嘉欣三年抱兩

16年宣布結婚，跟手就三年抱兩，先後誕下囡囡Kelly同囝囝Jared，得天獨厚嘅鍾嘉欣未有因為陀B而走樣。

譚凱琪婚後迅速有喜

事業心一向強、又話明婚後都會保持工作，點解譚凱琪年初突然辭演新劇《 BB 大晒 》？之唔係婚後迅速有喜囉！陀住六個月巨肚，Zoie 早前都拍過大肚寫真，留低最美回憶。

雨僑唯美大肚照

35歲雨僑兩年前與拍拖七年嘅男友羅力威結婚，今年情人節宣布懷孕，身兼美容KOL拍番輯唯美大肚照係指定動作。

官恩娜索過陀第一胎

40歲官恩娜15年與中法混血醫生男友結婚，15年誕下長子Gabriel，17年宣布再次懷孕，相隔兩年再拍孕照，仲索過陀第一胎！

陳敏之索腿天后零走樣

41歲索腿天后陳敏之16年懷孕，年尾誕下兒子雷子樂。其實無論做女嗰陣、大肚時期定如今年過四十，索腿天后一直都保持到一副好身材。