余德丞過檔ViuTV講世界盃即出事 為獲無綫力捧即離巢解畫

余德丞過檔ViuTV講波即捱轟

當時儀式播出1998年法國世界盃《La Copa De La Vida（The Cup of Life）聖盃之光》，余德丞昨晚誤將主唱Ricky Martin講成Robbie Williams：「呢一首可能係最多球迷認知嘅一首世界盃主題曲，係來自Robbie Williams嘅呢一首歌。」余德丞並未意識到自己講錯，直至播出第二首歌曲，他才補鑊：「糾正返少少，頭先講錯咗唔係Robbie Williams而係Ricky Martin至啱，嗰首係大家最耳熟能詳嘅世界盃主題曲。」

到揭幕戰講波時段，余德丞再被網民喪插表現差。今日凌晨揭幕戰舉行時，余德丞在講波期間多次問其他評述員「你點睇？」結果令觀眾覺得煩燥。有連登仔爆粗開post喪插余德丞：「講波你就講啦，做訪問咩家陣，吓吓問人點睇，聽你講真係悶X到X咁！」雖然不少網民認為樓主搶口，但開post相隔十多小時，帖文已有逾700正評，似乎有部份觀眾對余德丞相當不滿。

網民留言勁踩余德丞：頂唔順佢訪問式講波

網民留言勁踩余德丞：「聽咗廿分鐘問咗人4、5次」、「講嘢好冇氣氛，淨係識問問問。」、「頂唔順佢訪問式講波。」又有人表示他語速太急：「練係有練過，但唔夾now班評述員，講嘢好急好用力。」也有人為余德丞抱不平：「公道啲講，香港講波風氣係咁，英文旁述真係講場波，畫面影乜就講乜。」、「主要係場波悶，啲人你又唔識，所以留意個旁述」。

余德丞談離開無綫：靠自己換到掌聲

余德丞5月宣布離巢效力8年的無綫，早前他為「FHProduction」（熊仔頭）的網上節目任嘉賓，期間自爆入行初期曾因意見多多而激怒監製，但他強調會飲水思源。他近日密密拍YouTube片，向YouTuber之路進發，他感慨稱︰「我喺自己YouTube頻道，節目自己一手一腳做出嚟，做得唔好係自己問題，靠自己換到掌聲返嚟都係自己嘅成功。」

余德丞自爆於無綫不經意得罪監製

在熊仔頭的訪問中，余德丞分享了離開無綫的心路歷程，又回憶剛入無綫時的新人時期，因經常提供意見而不經意得罪監製︰「開始入兒童節目、大約做咗半年至一年咁，已經好似大佬咁喺度行，諗緊『會唔會咁樣好睇啲』、『會唔會咁樣舒服啲』，監製覺得你咁多意見，係咪想做埋導演？」他坦言當時只希望做好件事︰「但好多人覺得關你鬼事咩？你唔使理呢啲嘢啦。」不過，余德丞強調會飲水思源︰「我喺舊公司入面學咗好多，無剛才講嘅兒童節目監製畀咁多機會，我會唔會做到今日嘅余德丞呢？」

余德丞呻無綫多掣肘 現可掌握命運

余德丞直言在無綫當主持甚少加入個人想法，但現時的說話尺度則大有不同：「以前講嘢好持平，而家可以有啲立場，至少講波可以公開撐邊一隊。」問及以前是否未獲認同？余德丞未有直接回應，僅坦承現時拍YouTube片較有成功感︰「我喺自己YouTube頻道拍片，睇到評論話我講嘢好抵死、幾衰格咁，節目自己一手一腳做出嚟，望住個BB出世…做得唔好係自己問題，如果靠自己換到掌聲番嚟都係自己嘅成功，掌握到自己嘅命運。」

熊仔頭：捧你先走，係咪過咗TVB一棟？

熊仔頭問：「捧你先走，你係咪過咗TVB一棟？」余德丞答︰「我簽長約時已經六、七年前，出咗糧梗係要做，每年都好勤力工作，不過timing好緊要，我都33歲，8年嚟乜嘢崗位都了解過，不如真係試吓（離開）。如果真係再續約可能就係簽N年，去到呢個歲數再唔行出呢一步，可能永遠冇機會。」怕轉變，但可以勇敢離開？他說：「你喺懸崖邊，後面已經有人殺緊埋嚟，你都要跳，跳落去可能九死一生，但至少有一生。」

齊睇余德丞點解離開TVB：靠自己換掌聲！