何雁詩街市買餸被誤以為工人姐姐 鄭俊弘喪笑回應激嬲老婆

撰文：東方新地 ｜ 圖：無綫娛樂新聞截圖、東星圖片、何雁詩IG

何雁詩爆與鄭俊弘互相取笑作樂

何雁詩和鄭俊弘日前夫妻檔為《慈善星輝仁濟夜》擔任表演嘉賓，由表演到訪問都係黐到實，半步不離大家，當提到之前兩夫婦被影到街市買餸，一身街坊裝束起馬尾的何雁詩，游走菜檔四圍格價，被指似賓賓，何雁詩初時笑笑口話有睇報道，又指兩公婆不時互相取笑大家，何雁詩自爆經常取笑老公似黑人，因為覺得老公跟她的高爾夫球界偶像很似樣。

何雁詩不滿老公恥笑佢

主導發言權的何雁詩初時表現輕鬆更笑笑口，但當娛樂新聞主播改問鄭俊弘對老婆被指似自己嘅工人姐姐時有何感覺？鄭俊弘來不及反應，當場窒了一窒後爆笑當場，在旁的何雁詩當場黑面，鄭俊弘唔知死繼續講：「但係我覺得呢單嘢幾搞笑﹗」更笑到彎晒腰，何雁詩即出手打老公心口以示不滿，並搶住自辯：「應該咁講，每做一樣嘢應該有適合嘅裝束嘅，我係著番啲合適嘅衫，冇理由去街市著到好似上紅館咁﹗」被問到會否留意番當日老公的衣著，何雁詩搶住話：「佢咪又係咁﹗只不過香港嘅工人姐姐通常係女仔啫﹗」鄭俊弘似乎終於察覺老婆的不滿，補鑊話：「都可以話何雁詩帶住個司機出去做苦力都得嘅﹗」何雁詩表情才稍為寬容番﹗

何雁詩爆乳反擊被指平胸

何雁詩早前努力減肥，連帶上圍都縮水，以真空上陣著上超胸裝拍攝MV，卻被嘲胸細，何雁詩為自己身材大平反，貼出做運動的NG片段，片中她身穿運動bra top，以高炒角度露出深深的事業線，開頭一個大烏身向前的動作，呈現漏奶澎湃效果，佢喺IG寫到：「「最近好多朋友問我用咩方法可以短時間內fit返呢？兩個禮拜時間可以做到㗎，畀大家睇吓NG片段先。」雖然只係短短九秒的NG片，但大家都落在她倒奶的焦點上，而且大部分網民唔係畀like，而係惹來海量的負評，紛紛留言：「好似特登著細個碼」、「咁做有必要咩？」、「點解要做到自己咁cheap，冇必要出胸」、「肉酸」、「表面上NG實際上露波」。

何雁詩IG

坤哥：窒息，我睇咗五十次

而何雁詩敢露亦敢言，逐一秒回各個負評，指自己只是想分享自己搞笑的片段，而且是穿上做運動的正常裝束，被指專登買細個碼去谷胸，佢亦回覆指自己係時候花啲時間去shopping，逐一回覆指自己好樂意接受大家的意見，佢亦解釋冇諗過大家反應如此大：「其實大家對於網上訊息也無必要反應過大，是沒必要的。」何雁詩又話自己過去好少平反，會聽取意見也明白理解，她一再強調冇諗過網民反應如此大，只是對唔太贊同嘅事情認為要發聲：「至於反應是好是壞，也沒有去想太多，只會自己做好自己，分享一些有value的事情就可以啦（例如音樂和健身分享），如果討好全世界是我的目標，我想一輩子也沒可能實現呢。」雖然被網民群插，不過都有知音人，吳業坤留言指自己不斷睇咗五十次，睇到佢窒息，亦有網民指何雁詩裝束好正常，鼓勵她繼續做自己。

何雁詩逐一回覆網民變罵戰：

大Deep V 險走光

去年11月升呢老襯的鄭俊弘，婚前同何雁詩一齊上無綫節目《流行經典50年》，被問及未婚妻婚前最後一擊，為新歌拍MV時身穿大Deep V裙好性感，鄭俊弘話一啲都唔介意，仲猛讚好靚好特別。鄭俊弘同何雁詩呢對準新人會喺2020年11月7日舉行婚禮，雖然未知到時疫情完結未，不過婚禮會如期舉行，二人一邊忙住籌備婚事，一邊都要努力工作，婚前佢哋帶埋雙方父母去揀中式禮服，何雁詩話著褂好好玩，鄭俊弘就笑言好似拍古裝咁！

何雁詩新歌MV疑真空上陣

27歲嘅何雁詩有個開物流公司嘅富爸爸，佢係家中獨女，家住市值5千萬嘅大埔滌濤山獨立屋，之前離開效力五年嘅星夢娛樂，有爸爸做大靠山照住轉做獨立歌手，仲喺疫情下出新歌，早前佢喺社交網上載拍攝新歌〈絕望時請點播〉嘅MV花絮短片，雖然條片得幾秒，但已經有亮點，皆因佢身穿Deep V碎花薄紗裙，胸前中門大開，個Deep V落到肚臍咁滯，疑似真空上陣，當時仲好大風，薄紗隨風飄揚，加上佢唱歌時狂抖大氣，心口位置不斷起伏，真係有機會走光，粉絲同好友陳瀅等留言讚佢索到爆，阿Bob林盛斌更意有所指表示：「如果再大風啲就好嘞！」何雁詩竟懵盛盛反問：「點解？」

鄭俊弘：我只能夠話好特別

何雁詩去外國讀過吓書，作風開放Deep V對佢嚟講濕濕碎，鄭俊弘亦好大方，早前被問及未婚妻咁性感有冇呷醋，佢話：「冇問題，呢啲係佢自己想表達嘅藝術，我只能夠話好特別，佢有好悉心嘅造型師幫佢設計，都好靚呀！」

自我感覺良好

未婚夫讚到天上有地下無，何雁詩就話無論男仔定女仔，著衫最緊要係自己覺得開心同有自信，為咗多謝造型師幫安搵咗條咁特別嘅裙，佢亦特登努力keep fit令自己著得條裙靚啲。不過咁，何雁詩減肥減到胸到冇埋，完全托唔起條Deep V裙，胸前如履平地，著咗都冇立體效果，咁咪即係嘥料囉！