佘詩曼台慶1舉動與何依婷不和傳聞再升溫 Ig新Post攬到實兼狂讚對方化解流言

佘詩曼曬親密合照 點名大讚何依婷

今日（19日），佘詩曼在個人社交平台上傳多張與劇中演員攬到實一實的親密合照，當中包括何依婷、王敏奕、倪嘉雯和高海寧。其中曾被傳與阿佘不和的何依婷，更獲佘詩曼上傳兩張合照。此外，佘詩曼更特別發文點名大讚何依婷「好聰明」：

碌下碌下個photo album 見到呢幾張相
想講吓呢個妹妹仔何依婷 @reginahyt
第一日「新聞女王」圍讀
俾我嘅印象係唔係好出聲，但係有主見嘅
跟住到第一日開工手揗腳震但係好俾心機嘅
忍唔住話俾佢聽應該點做
連續開咗兩日後佢同我講：「哦..原來演戲係咁嘅」
果然係學霸，好聰明
而家出嚟嘅成績，大家有目共睹，唔錯吖
我曾經都係新人，新人係需要大家嘅包容同埋慢慢接受
大家一齊俾啲時間佢啦
徐曉薇 我期待你嘅蛻變
唔好令Man姐失望，加油！
P.S 每次都要樹熊式抱抱，真係肉緊死人喇
尤其係最後嗰件，咁鬼大嚿都要攬，點樣唔愛你哋啫

何依婷肉麻留言回應：你是最最最最最好的

見到「Man姐」佘詩曼咁錫自己，何依婷不但馬上轉發到自己社交平台限時動態，仲即刻留言向佘詩曼「表白」：

Man姐，好開心可以同你一齊拍劇，雖然一開始真係好緊張，手揗腳震🤣但係你身上真係學到好多❣️你是最最最最最好的！我會加油努力，好好記住你教我既野，唔會令你失望！愛你❤️❤️❤️

台慶唯獨唔攬何依婷 一度令不和傳聞升溫

上週日（14日），有內地網民在社交平台上傳一段影片，片中可見一眾《新聞女王》演員在獲得「最佳劇集」後留在台上互相恭喜的短片。片段一開始可見佘詩曼先後與李施嬅、高海寧兩人開心攬攬、有講有笑，之後又同何沛珈、李施嬅、車婉婉等人擁抱。站在高海寧身旁的何依婷，雖然多次想與佘詩曼攬攬，但一直未能埋身，只能在旁陪笑。佘詩曼在台上攬曬同劇演員，唯獨攬漏何依婷，令二人的不和傳聞再度升溫。

何依婷結婚講明唔請佘詩曼

除了台慶台上的誤會之外，何依婷就連結婚都無請佘詩曼，令兩人的不和傳聞越傳越盛。何依婷早前宣布婚訊後，曾在訪問中透露會到外地舉辦，並表示不會在香港補擺婚禮：「唔搞喇，好煩啊！」何依婷又透露姊妹團包括蔡嘉欣、陳詩欣、鍾晴、張秀文以及2位圈外好友，又表示婚禮只會邀請摯親好友，不會大排筵席。至於婚禮會否邀請《新聞女王》中的上司佘詩曼和李施嬅，何依婷即落閘表示「冇位」，並辯稱自己只是舉辦小型婚禮，坦言佘詩曼和李施嬅會明白，她又稱之前劇集首播食飯，2人亦已經見過自己的未婚夫。

何依婷稱與奸角反差大 佘詩曼踢爆：你真人都係咁

要追溯返佘詩曼與何依婷的不和傳聞，就要數在《新聞女王》開播前接受訪問的片段。當時何依婷在訪問中表示自己的角色十分「反骨」，又稱與本人的反差「超級大」。一旁的佘詩曼突然笑住表示：「唔係啊，我覺得你真人都係咁」，不但嚇到《東張西望》的主持「O晒嘴」，更引得李施嬅大笑並秒速附和，二人的表情十分耐人尋味。而當事人何依婷的表情則略顯尷尬，只能以：「Man姐太入戲」將話題帶過。

何依婷守口如瓶唔爆結婚 狂向佘詩曼示好

被佘詩曼「踢爆」的何依婷在訪問中不斷向佘詩曼示好，又不時貼近她撒嬌，努力緩和尷尬的氣氛。而當最近宣布結婚的何依婷當然被問及詳情時，佘詩曼則表示：「唔話俾我哋知，即係唔當我哋係friend啦」，何依婷只能在旁大笑來掩飾尷尬。