半百張敏、張耀揚零走樣 忠粉揭二人低調行善事蹟

原文刊於《東方新地》

張敏、張耀揚低調行善

一連十日喺青藏高原，每日親手搬運派物資、同村民打成一片、受盡頭痛作嘔等高原反應不適折磨，竟然隻字不提連一張打卡相都冇影過……事隔成年，近日有張耀揚忠粉開抖音重溫短片，才被揭發善舉，52歲嘅張敏身形fit爆皮膚白滑不負美魔女盛名，而57歲嘅耀揚就繼續威猛有霸氣，揸住大疊人仔一百蚊紙邊數邊派畀村民，手瓜起𦟌睇嚟仲有操肌喎！

半百張敏、張耀揚零走樣

見到張敏同張耀揚，好難唔令人回味香港電影傲視亞洲嘅光輝年代！亞視藝訓班出身、憑做第一代晶女郎被導演王晶捧到上事業巔峰，張敏當年拍盡周潤發、周星馳、劉德華頂級男星，經典作《賭神 》、《 逃學威龍 》等等多不勝數；而張耀揚就係做模特兒出身被導演林嶺東發掘入影壇，高大威猛惡形惡相，《 監獄風雲 》嘅殺手雄、《 逃學威龍 》大飛、《 古惑仔3之隻手遮天 》嘅烏鴉，個個都係經典恨到觀眾咬牙切齒。兩位八十年代入行、九十年代走紅、二千年淡出嘅經典藝人不約而同低調行善，利用知名度幫助弱小影響生命，香港電影嘅影響力點止名和利票房而已。