84歲「食屎陳師奶」被大劉點名添人氣 孫慧蓮退休老師圓演員夢
「食屎陳師奶」連大劉都係粉絲
「陳師奶」真名孫慧蓮(Helen)84歲,退休後於1996年入行做演員,現時以特約演員於16年開始參與處境劇《愛.回家之開心速遞》,當中飾演「食屎陳師奶」一角,人氣強勁連大劉早前開記者招待會,都點名大讚晚晚有捧場。
![「食屎陳師奶」一角深受網民喜愛,曾被列為《愛回家》女神第四位。](https://imgs.orientalsunday.hk/wp-content/uploads/2021/11/15_1035725245619f2c15c4228-1024x577.jpg)
《愛回家》成「食屎陳師奶」代表作
日前「陳師奶」孫慧蓮接受訪問大談入行多年有冇代表作?對「食屎陳師奶」呢個名點睇?薑果然愈老愈辣,完全冇諗過佢會咁樣答:「陳師奶引起好多市民對我嘅認識,如果你講話代表作,唯一就係呢一個。因為我做咗好長時間,我記得我數過,16、17年做到依家。有啲朋友或者同事都會話『乜嘢食屎呀!咁你都肯做肯接受?』我話呢啲名之嘛,我話你本人唔食屎咪得囉,世界上有冇人食屎?我亦有學生話『有冇搞錯呀孫主任咁你都肯做?』我話做戲之嘛,我咪做出人生百態有乜嘢唔好啫,我話我只要唔做壞事咪得囉,食屎唔係壞事,但係有冇人食屎吖?你做嗰行就要投入嗰行。」
家英哥都係佢學生
孫慧蓮退休前是一位小學教師,由1959年起教過五間官立小學,教過的學生包括羅家英,也曾經在將軍澳官立小學和歐陽偉豪(Ben Sir)做過同事。「其實我個人都好活潑吓嘅,以前稱之為『十三點』,我父母冇受過咩教育,我係船廠女,好自由奔放周圍走,同埋我好有表演慾⋯⋯但係當時啲女孩子,正途一般只有護士同埋教師兩條出路⋯⋯我好彩考到那打素醫院,但係我知道我自己讀唔到書,啲醫學書好厚,到最後考到師範,入到去我乜嘢科都唔修,英文科我唔修、美術科我又唔修、美勞我又唔修、因為嗰啲要交功課,咁我就修體育,所以到今時今日我嘅健康都幾好,係因為我教咗39年體育科。家英哥應該係我最早期觀塘官立(小學)學生,家英係第二屆,應該係60年插班嘅。」
當年父母反對造星夢
「我本身好鍾意做演藝工作,不過舊式家庭加嗰時嘅演藝界風氣,聽聞好複雜。我成日都話自己樣又唔夠,高度又唔夠、口齒又未必咁伶俐,最主要都係我嘅家庭,雖然佢哋唔理我,但係一入親呢啲所謂娛樂圈嘅大染缸,佢哋始終會知道一定唔俾,所以我唔敢。」為了圓年青時的演藝夢,孫慧蓮在39年教師生涯退休後,仔女亦長大,她於1996年看到港台招聘演員,膽粗粗自己寫信去一試,當時面試要求她扮訓導主任,而因為她本身是老師所以就順利考入港台,開始其演戲人生,做足13年茄哩啡,作品包括《新紮師妹3》的沙灘天使、《復仇者之死》張婆等,直至2006年正式退休後繼續做特約演員。
滿腔熱誠永不言退
講到在《愛回家》中的演出,孫慧蓮表示老中青甚至小朋友都喜歡「食屎陳師奶」這個角色,因為她是教書出身,所有凡有小朋友要求合照,她都會說:「你鍾意睇『陳師奶』ok,不過你一定要做功課,雖然我走咗入演藝界,但我好多時都心繫教育。」孫慧蓮表示身邊好友都羨慕她到了這年紀仍有工作:「好多朋友鍾意飲茶吹水過日晨,我唔慣,可能我係一個好有衝勁嘅人,以前我兼顧幾份工,我教政府夜校、成人教育班,我又去學裁剪,再年輕未結婚時我又去幫人補習,堅持,我同自己講一定做到就做到。我冇諗過退休,我對演藝工作好有熱誠,會做到有一日精神與體力都應付唔到喇,我先會逼自己退休,除非無綫覺得我呢個人唔可以再用,否則會一直做落去。」
![食屎陳師奶 孫慧蓮後生時曾任教體育老師,所以體能十分好,平時會到郊外行山遊玩,早前更遇上年輕粉絲要求合照。](https://imgs.orientalsunday.hk/wp-content/uploads/2023/01/9_157207479563d3f2bb7ae0c.jpg)
孫慧蓮接受訪問
Ben Sir搶認係陳師奶舊校同事
阿姐汪明荃去年社交網發帖,透露陪家英哥羅家英出席了一個特別的聚會,與他幾位幾十年冇見面的小學同學,以及在他小學六年級畢業之後、60年未見過面的一位馮文彥老師(中文老師)見面,阿姐在文中更特別感謝「熱心人孫老師」努力找到家英哥其他同班同學,在大家聯絡後發起了這飯局。
![食屎陳師奶 今次聚會除了3位老師外,又搵來包括家英哥在內,10個在1961年畢業於觀塘官小的舊生,距今剛好60年一個甲子,網友都大讚這樣的聚會十分難得。](https://imgs.orientalsunday.hk/wp-content/uploads/2021/11/01_1033881910619f2bef6a66c-1024x768.jpg)
阿姐在文中提到一位孫老師:「TVB劇集《愛回家》裡面飾演陳太」,所講的就是觀眾熟悉的「食屎陳師奶」,有不少網友都對「陳師奶」原來係家英哥小學老師大感驚訝,紛紛表示「估佢唔到」、「失覺失覺」等等,54歲的Ben Sir(歐陽偉豪)隨即留言指:「孫老師全名是孫慧蓮,是我舊校同事!」阿姐亦有回應:「多謝提醒。」
![食屎陳師奶 阿姐介紹這兩位是馮文彥老師和古嫣玲老師,阿姐透露家英哥準備了三條頸巾送給三位老師,令她大讚很sweet、很暖心。](https://imgs.orientalsunday.hk/wp-content/uploads/2021/11/04_1632693243619f2bf6e0ef3-1024x767.jpg)
叫「食屎陳師奶」因曾食狗屎
以「食屎陳師奶」一角彈起的孫慧蓮英文名Helen,現年84歲,是一名特約演員,由2017年開始在《愛·回家之開心速遞》中扮演「食屎陳師奶」一角,其中被冠以「食屎」之名的緣故,是有一集「陳師奶」帶狗散步,卻留下狗屎沒有清理,並誓神劈願地指屎不是自己的狗所痾,否則就會食了那些屎。後來證實屎確實是「陳師奶」的狗所屙,熊家成員於是送上狗屎給「陳師奶」食,自此開始叫她做「食屎陳師奶」。
![雖然經常人稱呼為「食屎陳師奶」,但其實孫慧蓮在《愛回家》的角色名叫「陳妹珠」。](https://imgs.orientalsunday.hk/wp-content/uploads/2021/11/11_745310502619f2c086a7d2-1024x564.jpg)
同「根叔」有過曖昧感情戲
「食屎陳師奶」在劇中雖然有老公,但同「根叔」劉丹都有過不少曖昧感情戲。現實中孫慧蓮是個單親媽媽,育有3名女兒,並有4個孫,她曾在訪問中透露自己為了湊大3個女,曾一個人做3份工,包括在小學做訓導老師、教人補習、教編織與烹調,來供3個女兒在美國及英國讀書。現時孫慧蓮和二女兒一起在香港生活,而大女和細女已移居美國。她曾透露在50歲時選擇離婚,是因為和前夫理想不同、目標不一致,而她堅持要「做自己」。
![「食屎陳師奶」在劇中曾同「根叔」重現《烈火戰車》情節。](https://imgs.orientalsunday.hk/wp-content/uploads/2021/11/14_489200246619f2c12bee6a-1024x578.jpg)
原來曾執教39年 恨演悲情戲
曾執教鞭39年的孫慧蓮,任教過5間小學,主要負責教體育科,又兼任埋芭蕾舞導師,亦擔任過訓導主任,在將軍澳一間小學中,她就和Ben Sir做過同事。孫慧蓮指自己從小已有個演員夢,1996年已開始在港台電視兼職做特約演員,2006年正式退休後,她有更多時間投入演出,曾演過電影《新紮師妹3》的沙灘天使、《復仇者之死》張婆以及ViuTV劇集《詭探前傳》的花姑等,她笑言最想挑戰悲情角色,因為自己無需滴眼藥水,都可以立即崩潰落淚。
![食屎陳師奶 孫慧蓮曾透露自己畢業自葛量洪師範學院,由1959年開始教書。](https://imgs.orientalsunday.hk/wp-content/uploads/2021/11/06_1799482261619f2bfb5680b-1024x1024.jpg)
![食屎陳師奶 除了演戲外,孫慧蓮又經常四出做義工,又曾捐錢幫助內地興建醫院和學校。](https://imgs.orientalsunday.hk/wp-content/uploads/2021/11/16_1963796139619f2e6b355d1-1024x1024.jpg)
![食屎陳師奶 從事特約演員25年,孫慧蓮演出過很多不同角色。](https://imgs.orientalsunday.hk/wp-content/uploads/2021/11/07_466663155619f2bfe12c0c-1024x1024.jpg)
將來還有什麼演唱會值得留意?
有不少歌手宣布舉辦演唱會,小編為你整合了香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!