43歲陳山聰蝕住拍《十八年後的終極告白》 為角色出動百萬私伙
原文刊於《東方新地》
去年有《金宵大廈》被網民捧做民間視帝、最佳拍檔,承接住道勢,陳山聰繼續擔大旗做男主角。誰說黑道大哥一定要惡形惡相、金毛紋身,新劇《十八年後的終極告白》「一哥」造型襯絕風流倜儻,陳山聰自爆,角色塑造、造型設計,甚至到品牌贊助都係由自己一手一腳親力促成。
![0](https://imgs.weekendhk.com/wp-content/uploads/2020/04/1_1169a_catc_p20_22_3464749025ea94cfa44ac4.jpg)
陳山聰度身訂造潮「一哥」
11年與舊愛何超雲分手後形象插水,一度淪為無綫棄將,14年好彩有伯樂李添勝力保回歸演出劇集《宦海奇官》,陳山聰腳踏實地慢慢收復失地,從閒角一步步向上爬到成為男主角,地位回復信心都返晒嚟。雖然《十八年後》一劇是與監製王偉仁首次合作,不過一收到劇本即做足功課,並主動搵監製商量角色造型。陳山聰向本刊記者表示:「多謝Simon(王偉仁)肯聽我講又肯畀咁大發揮我,係我同佢講不如呢個社團大佬玩啲唔同嘅嘢,佢又『叮』一聲話好主意喎。係真㗎,『一哥』由服裝、首飾、眼鏡都係我自己一手去搵贊助。好似衫咁,係我自己搵馬來西亞名師Ian設計,一共為一哥做咗五套衫,手錶就係好兄弟莫家淦間舖頭去贊助,至於點配襯就係我自己idea,想風格一致啲,所以有啲飾物、衫、手錶同全部鞋都係出動私伙。」
陳山聰自謙爆套劇兩年前完成製作,出動私伙全為角色,沒有計算過價錢。不過一向有潮山聰之稱,時尚觸覺敏銳、買衫快狠準過圈中不少一線潮人,據知二十集新劇造型造價高達七位數字,正所謂魔鬼在細節,贊助產品以外山聰出動的私伙才真正講究,價值不菲。
![0](https://imgs.weekendhk.com/wp-content/uploads/2020/04/2_1169a_catc_p20_22_6441915285ea94cfc41169.jpg)
順得老婆易服侍
繼《金宵》之後再遇佳作、被網民力讚是視帝熱門人選,陳山聰接受電話訪問時開心之餘自言如今心態不比從前:「後生嗰陣時想威想攞獎,但係講真經歷過咁多之後,呢一刻真係覺得冇嘢緊要得過老婆同喺老婆個肚度嘅仔,我依家最期待BB出世,我成日幻想個仔會生成咩樣呢?做老竇係咩感覺呢?其實咁嘅時勢,拍到一套好劇可以陪觀眾度過難關、帶畀大家歡樂已經好滿足,攞唔攞獎對我嚟講真係Bonus!」
![0](https://imgs.weekendhk.com/wp-content/uploads/2020/04/15_1169a_catc_p20_22_16972831545ea94d134c31f.jpg)
![0](https://imgs.weekendhk.com/wp-content/uploads/2020/04/4_1169a_catc_p20_22_15159054305ea94d004586d.jpg)
新年至今除了宣傳新劇,全程停工留家抗疫,剛好讓山聰陪伴和照顧懷孕的老婆Apple:「好感恩,老婆陀仔呢幾個月冇咩唔舒服,都算係好易服侍。佢有咗BB之後就暫時停工,為安全街都唔會出,買餸煮飯主要都係我責任。好多做咗爸爸媽媽嘅圈中朋友,畀好多意見過招畀我哋,好似car seat要買可以360度轉嗰啲、最新邊款蒸奶樽機最好用咁,最好就係阿怡(楊怡)啱啱生完,教我煲魚湯同桑寄生蛋茶畀老婆飲。我舊年開始跟馬德鐘兩公婆間中茹素,不過煮畀老婆點都要有肉,通常佢食肉我食魚,最緊要有菜有蛋白質每餐營養均衡,所以呢幾個月喺屋企我哋兩個尤其太太有咗BB都係Keep得好好,冇肥到,啲營養落晒BB度。」
太太現懷孕五個月,預產期是今年九月,囝囝小蒜頭認真好腳頭,放埋四
月,陳山聰五月開工拍新劇《超能使者》又係男一,視帝叫胡作陸續有來!
![0](https://imgs.weekendhk.com/wp-content/uploads/2020/04/18_1169a_catc_p20_22_20027138915ea94cef70071.jpg)