金宵大廈2|蘇皓兒角色原來執二攤 黑化渺渺演技大爆發留下三大謎思
![金宵大廈2 蘇皓兒 蘇皓兒諗通了,不但認同母親以往做法,更與母親調轉角色,用母親作商品大賣慘情呃善款,非常病態,令人心寒。渺渺口中說的都是感人賣慘位,芬姐卻聽得十分難過,但看得出她還是盡力配合女兒。](https://imgs.orientalsunday.hk/wp-content/uploads/2022/04/6_68520121624fecc37a4ae-1024x597.jpg)
蘇皓兒重拾自由
《金宵大廈2》單元故事《雙魚》的結局令人有驚喜,伍姑娘飾演的母親芬姐,因有感女兒「有毛有翼識飛」,遂與蘇皓兒飾演的女兒渺渺展開激烈爭吵,更用水狂淋渺渺,渺渺奪門離家出走;此時金宵大廈發生異象,芬姐回到女兒受傷當日,原來用鏹水意外淋到渺渺的是芬姐本人,單位內的離奇雙魚狀黑印、正是當年渺渺印在牆上的血手印,相當震撼。幾經折騰,芬姐為將自由送回給女兒,竟閉眼衝出馬路,最終被車撞到終身殘廢。
![金宵大廈2 蘇皓兒 這場母女爭吵戲非常精彩。](https://imgs.orientalsunday.hk/wp-content/uploads/2022/04/18_812981507624feda0bb61e-1024x572.jpg)
![金宵大廈2 蘇皓兒 已多年沒接拍無綫劇的伍姑娘,坦承是自己向監製自薦參演:「《金宵》好睇吖嘛,喺 TVB 平台有咁嘅戲種好得意,我見到監製就話如果《金宵 2》開,有角色啱我我都願意嘗試吓。點知佢真係搵我,我只係聽咗個故仔,已經覺得好好睇。」](https://imgs.orientalsunday.hk/wp-content/uploads/2022/04/30_311752326624feda2a7182-1024x620.jpg)
蘇皓兒令人睇到心寒
由被照顧者變成照顧者的渺渺,全程享受控制權,並反利用傷殘的母親作「賣慘」籌碼;渺渺更似笑非笑向芬姐「示威」:「我唔係為咗你先上電視(賣慘)㗎,係我諗通咗喇,施比受更為有福。如果冇咗我哋呢啲不幸嘅人做比較,其他人又點會感受到自己嘅幸福喎」。在賣慘節目中高唱溫情歌曲的渺渺,配以溫馨及虐待交錯的母女今昔相處畫面,以及伍姑娘看似幸福安慰、但又夾雜痛苦無奈及默默承受的表情,結局相當闇黑》,令觀眾睇到好心寒。
![金宵大廈2 蘇皓兒 蘇皓兒雖然沒有邪惡的表情,但呢個似笑非笑表情已令網民大感意外及心寒,並認為是為結局的扭轉 位作出鋪陳。](https://imgs.orientalsunday.hk/wp-content/uploads/2022/04/7_828260913624fee4373dff-1024x588.jpg)
結局留下三大謎思
亦有眼利網民發現劇中多次出現的「雙魚」圖案(牆壁、家中裝飾、母女間「愛」的信物),芬姐向年幼渺渺訴說的神話故事,均在強調芬姐與渺渺的羈絆,大讚製作單位鋪排有心思。但由於劇集細節位多,兼信息表達來得內歛,網民對劇集結局持分歧看法,有人認為是大團圓,亦有人認為終極黑化的蘇皓兒是全心向母親報復,並普遍出現以下三大謎思:1. 伍姑娘最後係扮內疚定真心悔改?2. 渺渺係咪黑化咗?3. 最後首歌咩意思?
![金宵大廈2 蘇皓兒 對於首次演這類高難度角色,蘇皓兒表示壓力非常大。](https://imgs.orientalsunday.hk/wp-content/uploads/2022/04/15_1844447216624fee541f959-1024x598.jpg)
監製親解結局謎思
對於劇迷現疑團,監製葉鎮輝(阿細)受訪時逐一解畫:「芬姐係真心愛個女,亦都知錯,奈何個女已經『成長』變成另一個佢。殘廢後嘅芬姐要依賴個女生活,亦都甘願接受畀阿女控制返轉頭。至於渺渺就一定係黑化咗嘅,事實係渺渺都唔可以冇咗芬姐,佢冇辦法自己一個生活,佢其實都係愛芬姐嘅。兩母女就係咁繼續『相愛相害』,就算大家之間有好多恩怨,都因為呢種關係被迫綁埋一齊。現實生活好多母女都可能係咁,冇辦法擺脫大家,但相處每分每秒都係折磨,其實呢種關係都幾悲情。」至於劇集尾段出現的「溫情歌」,監製就話有觀眾以為係大團圓,其實渺渺唱歌時腦入面嘅畫面都係芬姐點虐待佢,其實完全冇原諒芬姐,可以話係「戲中戲」。
蘇皓兒演內心戲壓力大
陳山聰、李施嬅、伍詠薇及 Chloe 分別在 IG開Live,獲讚好戲的伍姑娘不斷多謝劇迷支持外,坦言芬姐最後所受的報應令單元故事性更強:「阿女最尾變咗我咁,其實係我報應嚟㗎!我愛佢變成害佢,呢個結局真係意想不到。」而首度遇上如此高難度角色的蘇皓兒則坦言有壓力:「都真係好難演,個角色好難演,好多內心嘢。」幸好蘇皓兒的內心戲受到支持及認同,有網民讚她的演繹似笑非笑,並指「睇唔出底牌先至最耐人尋味」。
![金宵大廈2 蘇皓兒 伍詠薇與蘇皓兒一齊開Live,齊被網民大讚演得好。](https://imgs.orientalsunday.hk/wp-content/uploads/2022/04/43_1901222142624ff114b6b8c.jpg)
蘇皓兒角色本屬江嘉敏
蘇皓兒在《金宵大廈2》的演出備受讚賞人氣急升,但原來毀容女這個角色本來屬上位花旦江嘉敏,當初連造型都做埋,臨開拍時因為與《七公主》撞期,江嘉敏慘遭易角,由蘇皓兒執二攤頂上。江嘉敏亦曾在IG上發文表示可惜:「呢排無論係fans,記者朋友,做專訪定做電台訪問嘅時候,大家都會問我幾時開《金宵大廈2》。我唯有係到同大家講聲,係今輯嘅《金宵大廈2》我冇緣同大家見面嚕」,她直言角色有發揮,這次未能與伍姑娘做母女也有點不開心,唯有再等下次。
![蘇皓兒 江嘉敏曾為《金宵大廈2》試造型,這個短髮造型就是蘇皓兒原本的角色。](https://imgs.orientalsunday.hk/wp-content/uploads/2022/04/114_2036639467624ff206be5b7.jpg)
將來還有什麼演唱會值得留意?
有不少歌手宣布舉辦演唱會,小編為你整合了香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!