郭思琳公開超聲波圖、吳浩康多謝大家祝福：我遇到理想的另一半

郭思琳公開胎兒超聲波 吳浩康做爸爸

雙喜臨門消息公布後，女方郭思琳亦將胎兒的超聲波照片公開，並留言：

大家的祝福，我們都收到了，謝謝大家!
知道昨天的新聞令大家又驚又喜..
是的..今年我要做人妻，也要準備做人母了!

人生大事當然想和大家分享喜悅…
可是疫情嚴峻，結婚有限聚令…
註冊當天未能邀請親朋戚友前來觀禮,望見諒!
待疫情穩定，我們補辦喜酒必會邀請大家!

吳浩康閃婚：我要結婚了！

吳浩康與郭思琳低調拍拖逾半年，日前被爆已在上月入紙申請註冊結婚，原定於3月到婚姻登記處舉行婚禮，但現在要待疫情過去，才能大排筵席。對於今次結婚的消息，Deep開心同大家分享：「多謝大家的關心，我好開心和大家分享呢個喜訊，我要結婚了！我遇到一個理想的另一半，所以我們決定一齊行埋我們的人生。」

吳浩康：我要做爸爸了

而講起雙喜臨門，Deep表示：「好多謝大家的祝福，自己嚟緊都面臨一個好大嘅挑戰。因為我要做爸爸了。依家開始都有好多嘢需要學習，無論係生活上，以及同另一半相處上。無論喺任何事上面都有好多需要學習，依家都係學習當中，好期待。」最後Deep說：「再一次多謝大家嘅祝福，好開心同大家分享呢件事，喺疫情底下大家都好唔容易，希望大家都身體健康，好好保重！」

郭思琳：努力改變緊生活習慣中

而懷有胎兒的郭思琳在上月底亦有更新IG表示暗示迎接新生命：「有朋友見我耐無update擔心到要搵我..我無事，好好啊，只係努力改變緊生活習慣中，大家可放心！呢幾日得知身邊有3位朋友確診，見到香港每日啲感染數字真係好驚！大家一定要做足防疫措施，無咩必要真係唔好四圍去喇！」

前度都係優質筍盤

吳浩康出道20年來情史豐富，仲個個都係優質筍盤，其中公開過的前度女友，包括有TVB視后胡定欣、拿督千金莊鍶敏（前名莊思敏）、同公司師妹鍾舒漫、ViuTV女神李昭南以及36G咪神崔碧珈。其中李昭南曾與吳浩康拍拖兩年，2018年宣布分手時，她對吳浩康表示：

「你永遠都係我尊重嘅師兄同好朋友，永遠感激你對我嘅愛錫，永遠支持你！繼續努力，繼續加油！」

專訪吳浩康：經濟困難 受盡白眼 吳浩康：感激家人不離不棄

由紅極一時，跌入低谷；由Facebook唱到開音樂會，呢條漫長嘅路走了15年，吳浩康(Deep)話屋企嘅支持好大，特別係「專登留番條命」睇佢行番上個台唱歌嘅爸爸，感激佢哋長期嘅擔心同埋對自己不離不棄。

吳浩康：擔心就此玩完

提到2004年因藏毒出事，當時驚唔驚就此玩完，吳浩康直言：「絕對有擔心從此就冇，其實情理上係會冇㗎嘛，同埋件事真係大件事，外國係點係外國嘅事，香港就係香港，所以絕對有擔心。」當年有指鄺美雲幫佢同老闆楊生講好說話，問到係咪同鄺美雲好熟，佢話：「嗰陣啱啱識，所以係好感激Cally姐姐(鄺美雲)，我只不過有次受佢邀請為佛誕唱歌，佢覺得呢個新人好似幾有禮貌，佢有個姪女都幾鍾意我，出事之後，佢覺得呢個後生仔都值得幫，就打畀老闆求情。」

吳浩康藏毒出事受盡白眼

經過呢件事後，不但生活受盡白眼，連經濟上有頗大壓力，吳浩康：「經濟上有捱過嘅，喺我組Closer夾Band嘅時候，我一個人就算喺演藝工作唔多，我都會做其他嘢去穩定住，因為我都要養屋企，但唯獨夾Band嗰陣，我哋係新嘅樂隊，一份糧四個人分，工作機會少，嗰段時間每一日都要計住點搭車，因為我住觀塘，Band 房喺荃灣，淨係搭車都係好攰嘅事，我一個禮拜最少返去四日，日頭夾到夜晚，仲未計其他生活開支。我追夢啫，但我唔能夠要爸爸同我一齊過飄泊嘅生活，所以早三、四年開始，我做其他兩樣嘅生意，唱歌學校同籃、足球嘅青訓。」

吳浩康：從來冇諗過放棄音樂夢

工作機會少，收入低，咁有冇諗過放棄唔做呢行，吳浩康：「冇，除非我行完晒條路，我應承過自己要有始有終，我仲有好多嘢未做，我想試吓盡力盡情做一次，可唔可以做到啲嘢。」

與父親的約定

吳浩康繼續道：「我爸爸同我有個約定，佢有癌症諗住唔睇醫生，我就同佢講：『留番條命睇我行番上個台度。』佢又真係好乖頂住。我爸爸好想見到我返番個台唱歌，因為佢覺得喺嗰度我係最開心。」

癌父每日煮早餐畀佢

問到低潮嘅時候，屋企同前女朋友點支持佢，吳浩康指最大的支持的確係來自屋企：「我屋企嘅支持好大，尤其係我爸爸，佢直情唔過問關於我嘅經濟、諗住點發展，零壓力，每日一定會煮好早餐畀我，夜晚會等我門，見到我唔開心，會揀啱時間先問咩事，呢個空間、呢種支持、陪伴，女朋友最大都係信任同陪伴，屋企人長期嘅擔心、長期嘅不離不棄係好難能可貴。」

公司無條件支持

除了家人，公司的支持亦係佢堅持的動力，吳浩康話：「公司都係另外一班屋企人，我聽到好多說法，講到公司好條件交換，講到『阿Deep夠多人撐，佢哋咪會理番佢。』其實根本就唔係咁，根本由決定做Fb Live開始，大家一路喺背後support我，只不過好難話畀大家聽我啲同事又做緊嘢嘞！ 老闆楊生冇計算過我值唔值得幫，佢一個咁聰明嘅人只要計，就知唔值得。Mani我試過搞出大頭佛，記者問回應，我呃佢我冇去過嗰個地方，佢都係照樣幫我，我媽媽離開，佢好落力去幫，連私事、家事都咁support。」