視后都無面俾！李佳芯連續四劇被飛 新劇《殺手》播出無期
廣告
被指因網上言論表露政治取態的李佳芯（Ali），走紅後被指經常違抗公司指令，據悉無綫已決定放棄她，寧願捧聽話花旦。昔日在無綫劇接劇的她被拉下馬，四部劇被飛，除了三套續集作《踩過界II》、《 BB大晒》及《白色強人II》冇得留低，下月開拍的《七公主》，原本屬意她的女一角色，亦改由黃翠如頂上，連續四劇被飛走！
原文刊於《東方新地》
李佳芯配角捱上做主角憑《 BB來了》坐正做視后
12年底由有線過檔到無綫發展的李佳芯，由配角捱上做主角，得高層加持機會多多，擔演的角色皆大有發揮，17年憑《踩過界》蒲精法官角色上位，同時奪走《星和無綫電視大獎2017》及《 TVB馬來西亞星光薈萃頒獎典禮2017》兩個海外女主角獎，18年再憑《 BB來了》坐正做埋TVB視后，炙手可熱吸盡人氣及財氣。不過，走紅即心高氣傲，李佳芯曾一度為了在聖誕及新年檔期賺快錢，反口推劇激怒無綫高層，當時無綫要出動愛將黃翠如臨危受命，頂她拍《那些我愛過的人》，雖然最後Ali大步檻過，獲無綫網開一面，繼續有機會擔大旗拍重頭劇《殺手》及《愛美麗狂想曲》，可惜禍不單行，早前被指網上言論表露政治取態，被TVB雪藏，觀眾緣和人氣急挫，近幾個月幾乎絕跡無綫熒光幕。
李佳芯四劇被飛 換黃翠如做《七公主》女一
不過當工作急煞停，連月來坐冷板凳的她亦開始洞悉事業危機。據知已被無綫送入雪櫃的她，除了《 BB大晒》、《踩過界II》以及年底開拍的《白色強人II》冇得留低，下月開拍由陳維冠（Joe）監製的《七公主》，原本由她擔任女一角色，亦轉由形象好的黃翠如頂上。據知情者透露：「一路以嚟，阿Joe畀好多機會Ali，好似《誇世代》、《殺手》都用Ali孭重飛，上年Joe籌備開拍《七公主》，一直屬意搵Ali做第一女主角，不過當時Ali已經定咗會拍《 BB來了》續集《 BB大晒》，套劇同樣定喺今年三、四月開拍，阿Joe為咗遷就Ali，都專登將《七公主》延後至六月開等佢，不過公司要將Ali入雪櫃，就連上年台慶檔被抽起嘅《殺手》，到依家仲播影無期，阿Joe最後被迫放棄，決定將《七公主》女一換咗聽話又有觀眾緣嘅翠如擔正。其實初頭，Ali諗住自己當紮，都唔係好信自己真係會被雪，直到四套劇都被飛，佢先知係咁嚴重！」
