【出街搵食】黃埔雞翼專門店！日賣300份！7款口味！招牌玫瑰、鹹檸七、味噌雞翼｜街頭小食｜
撰文：ning 攝影：Day
中環Cafe姊妹品牌 黃埔雞翼專門店
黃埔這間雞翼專門店，其實是中環Sogno Cafe+的姊妹店。老闆Steve眼見Cafe的玫瑰雞翼人氣高企，加上覺得雞翼本身在味道上可以靈活多變，令人百吃不厭，於是就決定以招牌的玫瑰雞翼做主打，再研發出另外6款口味，打造這間雞翼專門店。
即叫即炸！雞翼熱辣辣
店內全部用上無激素雞翼，隻隻醃過夜，撲上日本炸粉，有客人落單便即叫即炸，再混合不同的醬料、食材，炒成7款口味的雞翼。雞翼更炸足兩次，先封實肉汁，再回鑊炸至酥脆，食落熱辣辣。
7大雞翼口味逐款睇！
1.招牌玫瑰雞翼
Sogno Cafe＋的招牌菜，將炸好的雞翼與自家製玫瑰糖漿同炒，再灑上香草和乾玫瑰花碎而成。類似拔絲的煮法，令雞皮封上了一層如焦糖般的脆皮，食落脆卜卜，內裡雞肉Juicy多汁；味道香甜，玫瑰花味來得天然，易入口之餘唔似香精。
2.鹹檸七雞翼
這款由其中一位老闆Steve自創，雞翼醬汁用了七喜汽水和泰國鹹檸檬來做，奉客時更送埋大大粒的鹹檸，雖然食落不及飲真。鹹檸七般濃郁，但味道總算對辦，鹹鹹甜甜，帶點醃檸檬的微酸和微甘。
3.熱情果雞翼
以鮮果入饌的口味，用新鮮熱情果（即百香果）來做醬汁，雞翼還沾上了小量熱情果籽。味道酸甜開胃，熱情果果香突出。
4.港式避風塘雞翼
重口味人士必選！炸得香口的雞翼，回鑊與炸蒜粒、辣椒等配料炒成避風塘口味，辣椒落得足，食落有麻有辣，嘴唇微微刺癢，配上金蒜更惹味。
5.和風味噌雞翼
除了雞翼，所有款式都可以轉為雞槌（不過要留意，不能雞翼雞槌雙拼喔）。這款味噌雞槌就用加了海鹽的日本信州長野味噌來做，食落鹹鮮帶麵豉香，面層的木魚花令雞翼多了份煙燻味。
6.檸香山葵蟹籽雞翼
綠色半透明的是日本芥辣混合青檸汁而成的Wasabi檸香醬，青檸的酸甜平衡了Wasabi的辣勁，食落略帶辛辣而嗆，有淡淡青檸清香，蟹籽在嘴內卜卜爆開，配脆皮雞翼口感豐富。
7.三重芝士雞翼
專為芝士控而設，用紅車打芝士、大孔芝士及Mozzarella水牛芝士煮成芝士醬，淋在雞翼上再灑芝士粉，啖啖芝香奶香。
順帶一提，大盒裝16件雞翼可選兩款口味，但4件或6件則只可選一味。
雖然店子開業未夠一個月，但日限300份雞翼依然每天沽清，尤其下午4點至6點的放學、放工時間，很多學生哥、上班族來醫肚。而雞翼以外，更有無酒精的有汽特飲，如Mojito薄荷特飲、配惹味雞翼做下午茶，鋸晒呀！
雞翼山
地址：黃埔德民街29號黃埔新村德民大廈地下F3號舖（顯示地圖）
電話：3706 5232
營業時間：星期二至日 12nn – 10pm（星期一休息）
備註：不設加一，只收現金、八達通；每款雞翼每日限量供應，售完即止。
延伸閱讀：
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
