Pun’s冰室。乾炒牛河四步曲食譜＠Pun’s
干炒牛河有段故
是咁的，傳説乾炒牛河係喺廣州附近出現。有一晚，因為檔口嘅豆粉用完，咁啱有位來自軍隊嘅頭目買濕炒牛河做宵夜，廚師因為無豆粉，做唔到芡而唔肯炒河（廚師對親手煮嘅食物都總會有份執著），就係呢份執著，攪到頭目嬲嬲豬，攞槍要脅，人急生智，就諗到不如乾炒啦！點知！頭目食完後，讚不絕口，就係一碟乾炒牛河，廚師同佢一家先保得住命仔咋！就係咁！呢位廚師成為廣州第一間賣乾炒牛河嘅食肆。
唔知故仔真定假，但係就始終覺得乾炒牛河真係香口啲。
材料:
牛肉—————————–120g
河粉—————————–400g
銀芽—————————–40g
韭黃—————————–適量
蔥 —————————–適量
牛肉醃料：
生抽—————————–2茶匙
蠔油—————————–2茶匙
生抽—————————–1茶匙
糖 —————————–半茶匙
麻油—————————–少許
雞粉—————————–少許
調味料：
生抽—————————–2湯匙
老抽—————————–2湯匙
糖 —————————–1.5茶匙
雞粉—————————–1茶匙
做法：
1.牛肉醃20分鐘
（茶記多數入平貨，自己食可以買牛柳，牛冧肉比較嫩，而肥牛夠香但會太油。）
2.河粉唔想炒到一舊舊，最好用手分開一條條備用。（此步驟為「摷粉」）
3.起鑊，落油，放牛肉炒到啱啱熟備用。
4.將鑊燒紅後，落少許油，將河粉、銀芽、韭黃猛火快炒，再落生抽、老抽、糖、雞粉同蔥，用慢火繼續炒至河粉每條平均都有老抽顏色，即可～
btw，炒得夠學問…
竅門：
1.鑊要夠紅！炒出嚟先有鑊氣
2.河粉粗幼厚薄有致！再用手分開一條條！
3.調味隨意！
4.河粉乾炒時炒到焦香！
5.仲有，唔好急，最緊要快，快炒牛肉先可以保持鮮嫩 ！
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
