灣仔Mamoru Omakase壽司 $3,000位等45分鐘未入座經理串爆應對｜飲食熱話

May 23 2022

灣仔Omakase$3,000位神級壽司店近日成為網絡焦點，皆因有食客等足45分鐘未被安排入座，食客投訴經理應對不可一世！日前有網友發文《非一般的「神店」體驗，非一般的Mamoru》，開名炮轟灣仔一間被譽為神級的Omakase餐廳，等足45分鐘仍未被安排入座，經理服務差到無人有的回應及態度完全焫著事主，帖文一出旋即惹起熱烈討論！

灣仔Mamoru Omakase壽司店天價收費食客廁所門口等入座

事主於FB「香港 Omakase おまかせ關注組」發文炮轟位於灣仔一家被譽為神級日本料理Omakase的餐廳。他表示早於5個月前已向餐廳訂座，後因撞着疫情一改再改，最終預約到8pm的第二輪晚餐。兩人於預約當日提早5分鐘到達餐廳，當時有餐廳員工表示「今日啲貨返遲咗少少，所以上一輪未食完，麻煩你哋等一等」，事主只好站在廁所門口狹小的空間等安排入座。等了廿分鐘，終有經理出來，指為表歉意會送上香檳。事主未料一等再等，期間想再試圖尋找經理處理，但不得要領，直到8:40pm ，事主再度追問入座安排，終被尋獲的經理以不可一世的回應而焫著。

Omakase 等足45分鐘換來一肚子氣，經理不可一世的應對，確實令人O嘴！ — 灣仔Omakase壽司店等足45分鐘換來一肚子氣，經理不可一世的應對，確實令人O嘴！（圖片來源：日劇《孤獨的美食家》截圖）

空等45分鐘經理：送你免費一餐但冇期至12月底

經理最初以施捨口脗表示可以讓事主拎走致歉香檳：「若果你哋想安排退款的話，我哋可以安排，同埋如果你哋肚餓的話後面有間拉麵店」，並表示，「其實啲貨遲我哋都控制唔到喎，而且食omakase就係師父控制啲食物上嘅節奏，我哋都控制唔到食到幾時」，不可一世的應對即時焫著事主：「你啲貨遲，你咪打個電話俾我哋唔好咁早過嚟囉，你好多個客咩？打個電話好難咩？仲有，咩叫控制唔到食到幾時？你哋一晚做兩節，每節兩個鐘，你由上菜開始就要控制兩個鐘食完，你同我講話唔知食到幾時？」

後來剛好在8時45分有客人離開，經理指現在可為事主安排入座，並表示：「都知道你哋好唔開心，如果你哋入去食，而家都可以安排到座位，但真係取消嘅話，公司免費請你哋一次嚟食飯。不過而家暫時冇期至12月底，但2023年我哋未開booking！」事主隨即憤怒地回答：「得！你同我取消咗今晚個booking佢，呢刻就算你安排我入座我都食唔落（一肚氣，唔想委屈自己）你出電郵俾個確實日子我2023年邊一日，早到嘅你話俾我知！」。

有網民表示Omakase師傅發辦套餐的原意是想客人和師傅間邊吃邊交流，偏在香港吃到的Omakase最多只得兩個小時，趕頭趕命要鬥快食，失卻Omakase的原意。 — 有網民表示Omakase師傅發辦套餐的原意是想客人和壽司師傅間的交流，偏在香港吃到的Omakase最多只得兩個小時，趕頭趕命要鬥快食，失卻Omakase的原意。（圖片來源：新假期資料室）

經理：怕日本師傅不高興

正當事主二人打算離開，經理卻再問：「要唔要日本師傅出嚟？」事主誤以為指日本師傅會向他們道歉：「唔使，我話都未必關日本師傅事，是樓面嘅態度同安排嘅問題。」經理竟然回應：「我驚日本師傅唔開心喎！少咗兩個人。」事主即刻發火問：「係咪要我向佢道歉？」經理嘗試補鑊：「唔係，我意思係若果你哋走咗日本人冇機會道歉的話，佢會唔開心。」事主即場拒絕後，頭也不回地離開餐廳。

Omakase 有網民怒斥經理的應對不當，要為事件負全責。 — 有網民怒斥經理的應對不當，要為事件負全責。（圖片來源：FB@「香港Omakase おまかせ關注組」截圖）

Omakase 有網民表示理解日本人性格，相信師傅是真心想出來道歉。 — 有網民表示理解日本人性格，相信師傅是真心想出來道歉。（圖片來源：FB@「香港Omakase おまかせ關注組」截圖）

峰迴路轉花生滿地餐廳電郵致歉

事發兩日後，事主收到餐廳的致歉電郵，著手安排退款及免費用餐，「電郵用字措辭都客氣恰當，但係我唔會過分褒揚，因為我覺得呢個先係佢哋應有嘅服務態度，若果當日樓面經理能夠以呢種態度去處理問題，就唔會演變成後面嘅事情。」怒極的事主更在群組發文，提醒網友免得中伏，「呢種倚仗自己有啲名氣不可一世，好似需要你去乞求佢去食飯嘅餐廳，大家鍾意的話，繼續幫襯，我祝佢生意興隆，老闆請多幾個呢啲夥記。」

帖文隨即引發網民熱烈討論，直指「高級餐廳要客人等45分鐘是完成不可接受的事」、「等15分鐘已要求退款」，怒罵經理的處理失當。或受壓於網上群情洶湧，餐廳將補鑊的免費飯，一口氣由12月提前到8月！

Omakase 餐廳向事主發出致歉電郵著手安排退款及免費用餐，不過事主不領情，拒絕餐廳的免費邀請。 — 餐廳向事主發出致歉電郵著手安排退款及免費用餐，不過事主不領情，拒絕餐廳的免費邀請。（圖片來源：FB@「香港Omakase おまかせ關注組」截圖）

讚事主處理方法高質事主：唔係想攞着數

不過經深思熟慮後，事主最後決定拒絕餐廳的免費邀請，「由頭到尾都唔係想攞乜嘢着數，我哋需要嘅係尊重同埋誠意……尊重係一個雙方嘅責任，餐廳作為服務提供方，對客人有應有嘅尊重係理所當然……希望餐廳真係做到虛心聆聽，雖然我都唔會再幫襯。」網民大讚事主處理方法「高質」，事主叫大家食花生的同時，面對所謂「神店」也要骨氣，「所謂「神店」，$3,000幾一位好似要去乞食咁。希望香港人唔好俾人睇死，攞啲骨氣出嚟，令呢啲既所謂「神店」唔好覺得自己不可一世，香港仲有好多有心嘅餐廳等緊我哋去支持！」