Häagen-Dazs 全新S型 脆皮雪條 ! 6款口味邊款最吸引?
廣告
又到咗食雪條嘅季節！早排便利店已經經歷咗一場雪條之爭，點知最近 Häagen-Dazs 亦都加入戰爭，推出一系列嘅新雪條。雪條外型用上S型曲線，令人聯想到窈窕嘅身材。除咗新嘅外型，仲有新嘅口味！今個系列每款雪條都用上比利時朱古力脆皮，一共有6款口味，記者試食完，究竟邊款最好味？
Häagen-Dazs6款新雪條登場
除咗有品牌嘅3款經典口味，士多啤梨、抹茶杏仁同呍呢嗱焦糖杏仁之外，亦有3款用上全新口味，朱古力杏仁、岩鹽焦糖和夏威夷果仁脆糖，相當吸引。
記者即場試食！
呍呢嗱焦糖杏仁
脆皮有杏仁碎粒，內層用上呍呢嗱雪糕，再配適量焦糖醬，甜度剛剛好。
士多啤梨
脆皮用上比利時朱古力，夠薄又夠脆，同以往士多啤梨雪糕一樣，入面會有士多啤梨果肉，唔算太驚喜。
抹茶杏仁
朱古力杏仁脆粒嘅脆皮，包住日本鹿兒島綠茶味雪糕，綠茶味濃郁，同杏仁脆粒非常夾。
朱古力杏仁
朱古力雪糕配以香濃朱古力醬，加埋杏仁朱古力脆皮黎返個三重朱古力嘅感覺，雖然有杏仁去中和返朱古力嘅甜味，但食落都覺得偏甜、太膩。
岩鹽焦糖
岩鹽焦糖雪糕，甜得嚟帶少少鹹味，唔會太甜太鹹，味道好夾，而且雪糕入面更有焦糖粒，口感更豐富。
夏威夷果仁脆糖
呍呢嗱雪糕配以夏威夷果仁，除咗有果仁，仲有脆糖喺雪糕入面，有唔同層次嘅口感。
邊款最好食？
記者Katie同Sam試哂6款雪條，究竟邊款最討佢哋歡心？Katie最鍾意岩鹽焦糖雪條，雖然岩鹽味較淡，但雪糕味道甜而不膩，內裡更有焦糖粒，口感唔錯。而Sam就鍾意夏威夷果仁脆糖雪條，覺得雪條整體甜度適中，朱古力脆皮唔會蓋過雪糕味道，而且入裡有夏威夷果仁同脆糖，好有咬口。
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
