又有新口味 ! 擔定櫈仔去 Guschlbauer麥上日光 @Dining娜

上次講到，我Dining娜為咗食好嘢，不惜熱溶個妝都要大排長龍，目的咪就係為咗一嘗奧地利老牌麵包店 Guschlbauer麥上日光 ，新鮮出爐香噴噴嘅麵包囉。所謂皇天不負有心人，老天知道我係麵包精，麥上日光隨住灣仔店開張，又推出咗大堆新產品，仲專登搵我率先試食，價錢同正式推出日期就要等官方公佈喇，嘩咁仲得了！唔係唔試呀？

有時無咩胃口，食個沙律都係唔錯選擇，麥上日光夠晒體貼，新增咗兩款沙律，分別係德國薯仔沙律同巴馬火腿蕃茄鮮橙沙律，前者混入咗煙肉、洋蔥等材料，配上芥末及檸檬汁特別開胃，而後者就食到啖啖鮮橙肉，超級fresh！

*只限灣仔店供應

Dining娜一向好鍾意食烏卒卒食物，蝦沙律竹炭包就好啱我胃口，蝦沙律跟竹炭包又十分合襯。另一款新包係芝士牛角吐司強項係外脆內軟，帶有濃香芝士味，食到個心都溶晒！

*只限灣仔店供應

堪稱是麥上日光嘅皇牌，亦係導致大排長龍嘅「元凶」五層流心QB (Quarter Bun)包系列，竟然一口氣加多咗四個「幫凶」！唉，就等我先為大家摸摸底，就知佢哋有幾邪惡。

五層流心蜜瓜乳酪QB包

共五層樓高，咬下去清香的蜜瓜味道散滿舌尖，特色係呢款包今次唔用芝士改用乳酪，唔太甜勁合襯！

五層流心藍莓芝士QB包

芝士照舊係落足料，用嘅依然係澳洲同紐西蘭Cream Cheese，藍莓醬果味清新，無論男女都實like！

五層流心紫薯芝士竹炭QB包

呢款仲過癮，混合咗紫薯、流心、竹炭幾款元素，個包烏卒卒睇落雖然man啲，但偏偏我又好鍾意喎！

麵包同咖啡從來都係絕配，麥上日光又點會唔知? 今次就新增咗呢款玫瑰芝士咖啡，用上玫瑰花汁同秘製忌廉芝士，配上奧地利百年咖啡品牌Julius Meinl優質咖啡豆，咖啡香完全撲鼻而來。唉！佢會唔會成為另一個排隊嘅理由呢?

*只限灣仔店供應

同場仲加映兩款新飲品，養生水果茶就加入堅嘅果肉如蘋果、火龍果同菠蘿，唔係得朕味嗰啲果茶，感覺健康養生得多！另一款係女性恩物熱戀玫瑰冰露，入面有可食用玫瑰花花瓣同玫瑰花汁，聽聞玫瑰花有美白成份，雖然我已經鬼火咁靚，但係靚無人嫌多啩！

*只限灣仔店供應

Guschlbauer麥上日光

地址：
九龍尖沙咀金馬倫道32-34號福僑大廈地下D舖
電話：3956 5437
營業時間：10:00 – 21:00

香港灣仔軒尼詩道338號北海中心地下C舖
電話：2611 9638
營業時間：08:00 – 21:00

Facebook：Guschlbauer Hong Kong 麥上日光
Instagram：guschlbauer_hk