荃灣DONKI迴轉壽司店全球首間「鮮選壽司」今日開幕！開店2小時即截龍 最平$12碟/100款當造食材（內附地址）｜區區搵食
撰文：Zero、艾菲｜圖片來源：DON DON DONKI
荃灣DONKI迴轉壽司店「SEN SEN SUSHI鮮選壽司」
全球首間！10月29日荃灣海之戀開幕
DONKI不再只係超巿及日式雜貨了！自2019年進駐香港後，其版圖不斷擴張，過萬款產品中，最受歡迎的產品之一必定是其超抵食的吞拿魚拖羅壽司，每次都見大家一盒盒買回家，就知DONKI壽司有多熱賣！今次Fans有福了，全球首間迴轉壽司店將於荃灣海之戀商場、DONKI店旁邊開幕，其店取名「SEN SEN SUSHI鮮選壽司」，連日本都未有，香港DONKI迷實在太幸運！
店內由日本人主理，並由日本買手每日嚴選世界各地新鮮食材到港。今次最大的特色是，店內特備鮮度系統，壽司若果過了最佳鮮味享用時間，則不會提供給顧客，保證不會再買到灰色吞拿魚啦！
首日開幕2小時即截龍！
今日10月29日終於開幕了，不少市民7點已經在排隊，10點的DONKI迴轉壽司店，場面人山人海，一道逼爆隔離的DONKI店及商場走廊，網民指出12點已經派完一整日的籌。官方Facebook在2點隨即發帖文表示「現時籌號已超詔接待上限，現已停止派發，會根據情況而決定重新派發籌號與否。」網民反映，即使外賣Set也要等足一個鐘，看來第一日要食到DONKI迴轉壽司店真的很困難！另外，成功拿籌入場進食的市民指出，進入餐廳入需要使用安心出行，不可以填寫個人資料。
定價超親民！壽司最平$12碟
DONKI迴轉壽司店，將供應約100多種季節性食材炮製的食物款式，用料來自日本及世界各地，講到必食的，一定是藍鰭吞拿魚及三文魚壽司，另外炙燒及刺身海老壽司等款式。最平$12碟，定價擺明向壽司郎挑機！
DONKI壽司最受歡迎的一定是吞拿魚，食材來自克羅地亞，而這款一碟有齊大拖羅、中拖羅及赤身，極度滿足！（圖片來源：新假期編輯部）
最推薦為火炙藍鰭大拖羅，表面燒得香脆，油香再加重！（圖片來源：新假期編輯部）
其他壽司逐件睇
原條鰻魚大件過手掌，而且入口啖啖肉，配着鰻魚醬汁好惹味。（圖片來源：新假期編輯部）
油甘魚晶瑩剔透，入口油脂均勻。（圖片來源：新假期編輯部）
海老經炙燒後醬汁及香蔥 表面燒得焦香，入口鮮甜滿溢。（圖片來源：新假期編輯部）
用上挪威養殖的三文魚，鮮甜豐腴。（圖片來源：新假期編輯部）
別被它的外貌欺騙，入口鮮甜有驚喜！（圖片來源：新假期編輯部）
至於壽司米都有講究，用北海道七星米來做，米粒充滿光澤、黏性和甜味都十分平衡。 壽司醋則用純米大吟釀及兩種紅醋混合而成，煮米時亦會加入北海道產利尻昆布、鹿兒島縣鰹節煮高湯，食落更加可以為魚材提鮮！
6款外賣套餐
此外，鮮選壽司設有外賣，一共有6款外賣套餐，包括吞拿魚套餐、三文魚套餐、兒童壽司套餐、一人兩人及四人壽司套餐。款式變化多樣，價錢親民實惠。店內設有外賣自取櫃，能保持低溫功能，維持食物的鮮度，十分細心！荃灣友們又多個選擇了！
外賣方面有多款套餐選擇。（圖片來源：新假期編輯部）
大家最愛購買DONKI的吞拿魚盛合，不彷到這間壽司店購買吞拿魚套餐，保證更新鮮。（圖片來源：新假期編輯部）
三文魚套餐是眾多中最抵食，一盒10件，而且包含的款式眾多，竟然仲有花之戀！（圖片來源：新假期編輯部）
生猛活海鮮＋每日表演炙燒／鮮魚解體
DONKI除了迴轉壽司外，現場設有兩層魚缸，每日直送多款活海鮮，例如毛蟹、龍蝦、象拔蚌等，客人可以額外柯打原隻海鮮即切即食，高級的享受！除此之外，店內將每晚6點舉辨不同精彩活動，例如炙燒表演或鮮魚解體等，記得Mark定時間去睇啦！
DONKI壽司店值得去試？
在款式方面，DONKI壽司店有過100款美食，而且最平$12，價錢尚算實惠，不過日本直送的刺身並不多，當中的三文魚顏色欠光澤，不夠肥美，較為失望。比起其他迴轉壽司店，不過不失，沒有特別大驚喜。鮮選壽司舖內只有4,060呎，設有181個座位，以DONKI的熱門程度來說，坐位供不應求，看來開幕後需等待多時。建議DONKI迷先買外賣一試，再去挑戰！
- 餐廳：DONKI迴轉壽司店「鮮選壽司 海之戀店」
- 地址：荃灣大河道 100 號海之戀商場 2 樓 2001 號舖（顯示地圖）
- 營業時間：10am-11pm
- 電話：2498 8889
- Facebook：SenSenSushiHK
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
