Burgeroom -早去好似著數點＠甜仔

Burgeroom 漢堡

由於位置不明顯，也未有大肆宣傳，基本上都冇咩人知咁。去到只有一兩枱客，同銅鑼灣店根本冇得比，但對食客而言無疑是喜訊。相比之下，尖沙咀店闊落得多，新開張，所有野都好新淨整潔。重點是人流不多，唔會怕嘈吵，亦唔驚會急住hea整或者等食物等太耐。不過依然係要自己出去落單同俾錢，其後會有個感應器，要嘟下枱面既Here以確認座位。

餐牌

餐牌項目有沒有新品，有什麼新品我就數不出來，因為冇收到咩公關稿定咩宣傳咁。用眼睇，午餐時段有Lunch Burger Combo，另加$30就有粗薯條及飲品。飲品有幾款可以揀，亦可以再加錢轉，但話說新店未有酒牌，啤酒紅酒白酒咩都未有住。

薯條

黑松露芝士薯條　Truffle Cheese Fries　$62

難得見有Twister Fries　旋風薯條，其實本身想試，但還是想要些少Toppings。無奈那款只可配芝士，老老實實如果可以自選薯條及Toppings應該也不錯。感覺上自由一點，可以選自己喜歡的，共冶一爐。反正Toppings大抵也是另外加上去，跟原本製作工序沒有太大抵觸。

在黑松露芝士及牛油果醬芝士之間猶豫了好一會，前者配搭本就夠保險，後者睇相幾豐富。問問店方推薦，好似話黑松露芝士係新品，因此，為了嚐新……結果先來的是薯條，剛剛好，可以趁熱試味先，畢竟芝士及炸物一放涼可以差很多。

芝士微溶的狀態下略有牽絲，奶感重且帶鹹，車打的世界？不過醬的量不算多，淋面時均勻些少亦可避免一黎就沉哂底既問題。點點黑松露蒲頭，連著芝士，分不開，只是芝士香味強勢得多，黑松露就淪為配角。金黃粗薯條長短不一，沒有泛油，初時趁熱時還帶微脆，放涼變軟後，薯味再明顯些少。

Lobster Burger

Lobster Burger　龍蝦漢堡　$198

以波士頓龍蝦為主的龍蝦漢堡是為此行目標，之前上網見到，想食又唔想排，終得一嚐。不只是龍蝦肉，連龍蝦頭也一同上桌，長碟一次過整齊排好。可以當佢整色整水，然而蝦頭入面其實仲有少少可食部分既。雖然賣相不俗，而且夠哂墟冚，但我們不能用「十五分鐘去細心欣賞」，所以，要吃了。

喂，＿！原來芝士蓋住的不是蕃茄醬汁之類，是完完整整的龍蝦肉。足料，完整起好，吃來不費吹灰之力，每一口都是龍蝦肉自帶的鮮甜微鹹香氣。肉質富有彈性，不是霉爛粉散的，可惜最中心有少許乾，稍為韌了點。幸好車打芝士的鹹味沒有抹去龍蝦肉本味，配上細滑牛油果醬及自家製蕃茄莎莎就更清新。嫌膩嫌濃味，食埋隔離既羅馬生菜，其實可以當沙律，加了醋汁，酸味醒胃。食漢堡，總不能忘了包，帶甜香，有烘過，未算脆口，外層帶乾。以上說的是獨立上層，而墊底的下層倒是吸了水份，變得帶濕但不至於爛化。

美麗華商場內，地理位置似乎不差，但在那個角落，又似乎未算有地利。怎樣也好，打開門做生意第一日，往後日子的事情誰知道？也許某日某時突然消息傳開，九龍新界區的客人就會蜂擁而至捧個場。反正新店現在應該比較少人（其實係我早到，後期七八點已經有幾枱入座）；加上新張期間，人手應該會比較充裕，服務方面雖可能未熟手，但叫做冇咁忙，周到啲。早去好似著數啲，應該係，除非唔係。

Burgeroom

地址：香港尖沙咀彌敦道132號美麗華商場2樓2012號舖（顯示地圖）