180度日落海景！亞博館精緻中菜：當造爆膏奄仔蟹+刀工精湛地芝麵

Aug 9 2022

近排天氣咁好，好想放假搵一間特別嘅餐廳，同屋企人好友熱熱鬧鬧咁gathering一吓！係咁就啱晒啦！今個8月必定唔可以錯過位於亞洲國際博覽館嘅澐．NUVA，除咗主打高級中式精緻餐飲，仲融合美酒佳餚同埋藝術氛圍，係大嶼山嶄新嘅餐飲體驗！澐．NUVA嘅餐飲團隊主管同行政總廚都獲法國國際美食協會(Chaîne des Rôtisseurs)認證，可想而知團隊實力斐然！另外仲會同唔同嘅畫廊合作，為餐廳注入藝術元素，營造與別不同嘅感官體驗。

嚟緊除咗有演唱會「852FES Awaken Music Kay Tse x Charmaine Fong 覺醒音樂｜方皓玟x謝安琪」之外，由8月12-14日一連三日，亞博館仲會有本地特色市集「Awaken Festival覺醒文化」，到時仲有多位獨立歌手表演架，真係夠晒熱鬧！而家下載埋AsiaWorld-Expo App成為會員，仲有機會抽中演唱會飛添，超過1500份禮品等緊你！

「夏去秋來」最適合吃一啲潤燥、有營養而又唔容易上火嘅菜式，澐．NUVA最近推出期間限定嘅「盛夏時令‧珍饈宴」套餐，採用時令食材，炮製出適合夏天食嘅滋潤菜式。

鹽焗奄仔蟹啖啖蟹膏

端午節後、中秋節之前，奄仔蟹係最當造架！奄仔蟹脂香肉嫩鮮甜，全身爆滿蟹膏好似流沙鹹蛋黃，好甘香。要原汁原味咁品嚐，揀呢款就啱晒！鹽焗奄仔蟹以海鹽入味，加入少許牛油以沙鍋高溫鮮烹，更令到鮮甜蟹肉散發著點點焦香，鮮味就更加突出喇！

新穎食法香茅咖哩麵包焗蟹

除咗傳統鹽焗，仲可以揀充滿馬來風情嘅「香茅咖哩麵包焗蟹」，同樣以肥美多膏啖啖肉嘅奄仔蟹入饌，挖空嘅農夫包裝滿香濃嘅黃咖哩，微辣惹味，加埋奄仔蟹多到滿瀉嘅蟹膏，點麵包或者撈飯一流！好惹味呀！

特式澐霧肉

「特式澐霧肉」色澤紅潤，製作嗰陣以龍井茶葉等材料煙燻，茶香濃郁無比，更經過三小時燉煮，將五花肉嘅豬油逼晒出嚟，食落入口即溶，又唔會好似東坡肉咁油膩。

菜苗鮑魚濃湯地芝麵

夏天梗係食冬瓜消暑，「菜苗鮑魚濃湯地芝麵」以創新手法打造，將冬瓜切絲，製作成幼細嘅麵條—地芝麵，盡顯師傅刀功！同時加入日本粉絲提升口感，加埋主角蠔皇扣鮑魚，口感煙韌而味濃。

餐廳裝潢高雅別緻、匯聚傳統文化同埋現代風格，更環抱180度天際海岸，令你融入海天一色嘅寫意氛圍，享受一場味覺與視覺嘅奢華盛宴。

裝潢、擺設以至餐具，都經過精心佈置同挑選，到處可見藝術特色，同戶外嘅180度環海景致互相呼應，夏天可欣賞日落美景，好有feel呀！

澐．NUVA

地址：亞洲國際博覽館2樓

營業時間： 11:30am-2:30pm、5:30pm-9pm

訂座電話： 3606 8818

網址： http://www.asiaworld-expo.com/nuva

Facebook：澐．NUVA

其實嚟亞博館好方便，喺澐．NUVA book檯食飯仲提供免費泊車，無論從港九新界都可輕鬆到達，經屯赤隧道往亞博館更只係要大約15分鐘，而坐機場快綫仲有八達通優惠㗎！無論喺任何港鐵站出發，只要喺靑衣站轉乘機場快綫，成人即日來回車費只係 $47^咋！

^須使用同一張八達通並逗留博覽館超過1小時

同場加映： Awaken Festival覺醒文化有得玩有得打卡

8月12-14日一連三日喺亞博館舉行嘅「852FES Awaken Festival覺醒文化」，結合本地音樂、復刻文化、創意藝術、生活風格同設計新體驗嘅大型活動，涵蓋攤位市集、手藝工作室、藝術展覽、音樂表演，集視、聽、玩不同元素，仲有多個本地音樂單位現場表演，期間特設限定滑板場、滾軸溜冰場，結合懷舊及潮流遊樂設施，總有一個啱你風格！

行市集、整手作、聽Busking之後，可以喺澐．NUVA欣賞日落美景，大大個咸蛋黃等緊你邊食晚飯邊打卡，啱晒一班鍾意搵新地方去探索嘅文青們！

8月13及14日更有兩大天后Kay謝安琪同埋Charmaine方皓玟首次聯乘嘅演唱會，一定唔可以錯過！醫完肚就可以去睇演唱會啦～