【18區掃食】三角公廁搵食尖咀七大$100有找推介

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

Nov 19 2015

尖沙咀三角公廁一向多嘢食，除咗果D，過去都有零星食肆在這條街開設，名店天香樓也是座鎮於此。可能因為金巴利道打後一帶的尖咀食肆已開到滿瀉，連近佐敦的柯士甸路也，食肆也開到一間黐住一間，變成了一條強勁食街！今次為大家找來人均消費$100樓下的正店，約定你，公廁門口等！

法國餐廳過江龍 $40有找高檔早餐

Scarlett Cafe & Wine Bar這間法國餐廳，在北京和曼谷都有分店，今年年中進駐香港，相信鍾情法國菜和食平嘢的朋友一定唔陌生，晚市的1米長芝士拼盤同埋烤雞，大家一定食咗好多次，但原來早餐一樣筍! Egg Benedict $40有找，pancake是麥記價$18。哇！搞錯呀！尖沙咀喎，茶記都無咁平啦！星期一至日都供應，附近返工的的你不妨朝早去歎返個醒神早餐，再返office拼博!

Egg Benedict $38

你見唔見呀？隻蛋幾精盈剔透啊? 輕輕切一刀,蛋黃已經湧出嚟，夾著火腿、菠菜及English muffin一齊食，口水已留~~

The Scarlett $40 (連飲品)

大路美式早餐，可選炒蛋、太陽蛋、煎蛋，煙肉亦可轉火腿或豬肉腸，配埋炸薯仔及多士，超豐富! 賣四十蚊無投訢啦~

鴨肉薯餅 $38

少見高質早餐，水煮蛋下面的鴨肉，用了攝氏80度，慢煮12小時，還有香脆薯餅。鴨肉肉汁豐富，撈埋蛋黃一齊食，鹹香爆棚！咁平真係唔知邊度搵。

朱古力pancake $18

Pancake 粉加了朱古力豆，好足料啊～～外脆內軟超好食，淋上蜜糖同忌廉，小朋友一定好鍾意食！另外重可以揀藍苺口味，廿蚊有找，離譜！

English Breakfast Tea (部份早餐包，單點$20)

部份早餐包埋coffee or tea!!茶可以選English Breakfast Tea、Earl Grey等口味。

晚餐有咩食?

Scarlett一米長拼盤 $368

向Jamie Oliver個Plank 致敬的拼盤，要橫跨兩張枱先放到！cheese、cold cuts各5款，還有1款pate，幾個friend飲酒啱晒!

全隻烤雞配薯仔泥及沙律 $108

抵食！法國春雞先用鹽水和香料泡一晚，風乾後加香料和牛油，放入真空袋蒸兩小時再烤焗，咁花時間，肉質滑溜鮮嫩。

Scarlett Cafe & Wine Bar

地址:尖沙咀柯士甸路2號地舖(顯示地圖)
電話:3565 6513
營業時間:星期日至三:7am-10:30pm,星期四至六:7am-11:30pm
備註:設加一收費

瓹入個窿發現暖男優質和食

如果唔喺地膽，很大機會搵唔到呢間東京食堂。小店開咗3個月，隱身在柯士甸大廈內，企喺正面望去，你只會見到聯威茶餐廳，行入少少，就會見到低調大閘蟹老字號申聯，以及在左手邊的東京食堂。小店由Nick及阿樂兩位主理，落單煮嘢收錢抹枱送外賣全部自己一腳踢，想食比少少耐心等下啦~聽個名都知食日本野，但估唔到除了價錢平，食物質素一樣有誠意，大部份用料都是由日本供應商入口，日式飯都只不過是四五十蚊，價錢貼地，加上一兩份小食及串燒，一百蚊有食飽肚的滿足。同埋兩位暖男老闆傾下計(如果佢哋得閒)，夠晒治癒啦~

東京食堂就在三角公廁斜對面，武士拉麵告南門中間的窿入面，一不留神就會錯過。

穿過柯士甸大廈個窿，就會見到三間餐廳，東京食堂就在你的左手邊啦!

大阪燒 $68(午市價錢)

今星期午市新出品！用上爆足料豬腩肉、椰菜絲、紫菜及木耳碎，再加上秘製燒餅汁，極大份，極大份，極大份！豬腩肉煎得好鬼脆，趁熱食超好味! 一個人千祈唔好點呢個，起碼兩個人先食得晒。

雞翼 $22/串，豬頸肉 $18/串(午市價錢)

都是今個星期新品！可選汁燒或鹽燒，以日本燒肉汁燒製，雞翼差不多燒起時再抹上蜜糖及以火槍封面，食落脆得嚟又帶蜜甜，豬頸肉爽口肉汁多，我食曬兩串都唔夠喉~~

蒲燒鰻魚飯$68(午市價錢)

用上大半條日本蒲燒鰻魚，及日本珍珠米，飯香軟腍，一人份量剛剛好。

汁燒鯖魚飯 $42(午市價錢)

鯖魚燒到外皮香脆，魚香味重，不過小心啃骨啊。

蟹肉忌廉薯餅 $12/件

入面有軟滑忌廉，脆卜卜口感，值得無限encore。

小店都只有10個座位，Book左枱記得要去啊~唔去佢哋會好傷心嫁~

Minion本是朋友送的公仔，點知而家已經成為了打卡位，門口架單車喺佢地送外賣專用，一人份都送!

東京食堂

地址: 尖沙咀柯士甸路15A 柯士甸大廈地下D舖(顯示地圖)
電話:5616 6159
營業時間:12:30nn-4pm,5:30pm-9:30pm

午市減價鮮香魚介豬骨拉麵

衣家食碗拉麵唔過百都捱近，撞啱這間拉麵店3週年誌慶，星期一至五12nn-3pm有幾款拉麵都做特價，＄58-68一碗，大碗又抵食！又或者你是學生，平日午市穿校服來都有半價優惠！店內的材料由全蛋麵、食材和醬料都由日本空運到港，店內招牌魚介豚骨湯底，用上豬手、豬背骨、鯖魚、沙甸魚及蔬菜等熬足8小時，豬骨香味中帶陣陣魚香，鮮味濃郁。每碗拉麵內都有2塊日式叉燒，選用豬腩肉，上枱前灑上黑椒碎用火槍炙過，逼出油脂，食落焦香滿溢，不能錯過!拉麵每日售完即止，加上全店只有10個座位，想食重唔即刻衝去？

豐臣將軍拉麵＄98 (星期一至五午市特價$68，另有鹽味、醬油、黑蒜油揀)

四國香葱油湯底，用上四款蔥，包括黑葱油、京葱、玉葱及水葱，味道清香，不會太鹹。

板上將軍拉麵（蕃茄豬骨湯底）$98

特別一點可選番茄湯底，用上日本蕃茄醬和本地有機蕃茄配上豬骨濃湯，特濃滋味加埋兩塊厚切叉燒，好滿足啊!!!

武士沾麵 $118

湯底是柚子味，用上九州柚子wasabi炮製,微微辣，這款會選用較粗身的麵條，較易掛湯及更煙韌。

可加$10追加溏心蛋，晶瑩欲滴，睇見都流晒口水~！

有玄米綠茶供客人自己勘嚟飲，微甘好飲。

店內無芝麻無七味粉，但有秘製黑椒油，輕輕落一匙，成個湯即刻勁香，兼且辣辣地。還有特製魚油，加幾滴落湯底，帶出魚介鮮味。

一開門好似入咗日本拉麵店，清一色對住師傅整麵的座位，牆上更有衣架俾你掛衫，好貼心。

武士拉麵

地址: 尖沙咀柯士甸 15A 柯士甸大廈B座地下(顯示地圖)
電話:2369 3211
營業時間: 12nn-3pm,6pm-10:30pm

Call friend齊齊食大大杯韓冰

主打韓式甜品，由韓籍老闆娘主理，包保味道夠正宗。有多款鮮果雪冰，雪冰用日本製刨冰機刨製，冰粒粒粒細滑，加入牛奶和鍊奶，每啖都有奶香。部份配料例如米糕、抺茶粉及和紅豆等由韓國入口。甜品大大份，一大班friend去share食就最啱!

蜜瓜雪冰 $110

鎮店之寶，每日限量供應。賣相夠霸氣，用了半個美國Honey Melon，汁多肉甜，起肉後刮成球狀，鋪在雪花冰上，中間還插着蜜瓜雪條及淋上朱古力醬，2個人share食剛剛好。

菠蘿雪冰 $90

搞鬼做型！用了成個菠蘿，都係要share先食得晒！入面都有雪花冰!

抹茶雪冰 $64

牛奶冰底配以抹茶粉，配以紅豆蓉及抹菜雪糕，冰層中間也夾有抹茶粉，不會吃到一半已口淡淡，好好食。

Bung EO BBang魚餅雪糕 $40

小魚餅有紅豆和朱古力兩款口味，即叫即做，口感非常煙韌，趁熱dip埋雲嗱啦雪糕一齊食，一流享受。

藍檸檬汽水　$48

賣相清涼又養眼，飲落酸酸地，都幾夠氣，文青呃like必備。

大部份店員都是韓國人，有型仔Oppa為你整甜品，未食都已經甜入心啦係咪?

冰庫

地址：尖沙咀柯士甸路15號金巴利大廈地下A舖(顯示地圖)
電話：2739 0633
營業時間：星期日至四:12nn-11:30pm,星期五及六12nn-00:30am
備註：每人最低消費$30

家庭式小店　正宗上海餃子

於紅磡有分店，主打上海家庭菜，鎮店之寶餛飩可叫每枱都必點，另有幾款例如五香燻魚、蒜泥白肉及醉轉彎等都唔好miss!有套餐可以俾你一次試餛飩及小食，送埋豆漿，每份都是$46至$52，抵食啦!

玉豆豬肉餛飩拼洋蔥肉餃子(10粒)+拍青瓜 $46

套餐包10粒餃子，味道可雙併，隻隻皮薄料多，洋蔥肉餃子用上紫洋蔥，食落格外香甜，玉豆餃子是用四季豆壓成蓉後混和豬肉作饀，肉多，這兩款招牌最多人點。

拍青瓜非常爽口，食一小粒已經好好好辣!

五香燻魚上海麵 +蒜泥白肉 $49

燻魚超厚身，食落完全唔腥，更帶絲絲甜味，但都幾多骨，如果麵條份量多啲就perfect啦！

蒜泥白肉醬油及蒜泥味超香濃，口感鬆軟好入味。

阿芳餛飩

地址: 尖沙咀柯士甸路15A號柯士甸大廈B座C舖(顯示地圖)
電話:6076 6782
營業時間:12nn-9pm

麻甩之選　舊式外賣快餐

舊式快餐店買少見少，小店是外賣形式，樣樣野即叫即做，店內都有兩個位可以比你食完先走。最正是生炸大雞脾，肉汁juicy體積又巨型。另外有多款中式及西式飯盒，都不過是三十幾蚊，重要送飲品，抵到爛！

生炸特大雞脾 $16

即叫即炸，皮脆肉嫩，還有些少淮鹽調味，非常香口。學我一啖咬落去，肉汁即刻標晒出嚟，ready好紙巾先好食，好邪惡>~<

豆腐火腩飯 $36 (送飲品，可選各式冷熱飲品或紅豆冰)

男人的浪漫$40有找，兼送飲品，冷熱同價，揀紅豆冰又得，浪漫又抵食。味道不算太濃，但勝在汁多，撈飯食唔會dry。

紅豆冰（跟飯送，單點$14）

奶味可以重返少少，但落了足料紅豆，送俾你飲ok啦！

樂心快餐

樂心快餐店

地址：尖沙咀柯士甸路15號C地下A1(顯示地圖)
電話：2367 9684/27231841
營業時間：7am-9:30pm

夜鬼出沒注意! Warm爆你胃足料老火靚湯

開業十多年的小店，每晚六點，開至翌日清晨六點，通宵營業。招牌雞腳湯，一上桌已經聞到濃濃的胡椒味，一碗至少有5隻雞腳，全都煲至溶爛；一入口胡椒味極重，愈飲愈過癮，而且膠質豐富，相當黏口，雞腳一夾即骨肉分離。黃太解釋胡椒湯可解酒，加上雞腳比其他肉都要滑，所以極受歡迎。小小的廚房有四個大湯煲，裡面全都是多到快要瀉的雞腳和冬菇，非常足料，由開舖煲到收舖，煲如此足料的老火湯，去邊到搵？

招牌雞腳湯 $30

足料得可當餸食，雞腳軟腍胡椒味重，呷一口已夠醒神。