【記者直擊】鼎爺烹飪班試玩！阿爺親民教煮盤龍鱔+蝦仁炒滑蛋
撰文：ning 攝影：Tango
直擊鼎爺烹飪班
今次的烹飪班其實是鼎爺和亞洲萬里通的合作活動，讓會員參加一系列的餐飲體驗，包括和米芝蓮餐廳廚師進餐、調酒班等，而鼎爺烹飪班更是重點活動之一，鼎爺人氣有幾旺，單看當日來上堂的，很多都是太太級忠實Fans就知，一連兩場的烹飪班更是全場爆滿。
鼎爺好惡？其實好親民！
烹飪班開始前，記者率先走入廚房，打算偷睇阿爺準備示範材料。看著鼎爺不苟言笑，嚴謹專注地處理食材，的確超霸氣，小記心中都有點怯，好驚畀阿爺鬧。
課堂開始！大家齊齊走到示範枱，聽鼎爺講書，今次課堂教的，是鼎爺拿手的豉汁蒸盤龍鱔及蟹柳蝦仁韭黃炒滑蛋，都是經典的廣東菜。
在講解示範途中，鼎爺收起嚴肅，變得幽默親民，有問必答，傳授很多煮食小貼士和竅門，當然不少得招牌刀法，更不時大放金句說，「用咩蛋做炒蛋？係雞生嘅就得」，令場內笑聲不斷。
不過，當真正開油鑊煮食時，鼎爺再次回復嚴謹眼神，重視每個步驟，加以提點要學員需注意的細節，拍薑更是震懾全場，或許這種就是當廚師的專業。
示範完畢就可以試食鼎爺煮出來的兩道菜。盤龍鱔最有功駕，刀工俐落，鱔件大小平均，連綿不斷。肉質滑溜，無腥味，醬汁踏實不花巧，食到魚肉鮮甜，賣相當然也是宴客級別。
蟹肉蝦仁炒蛋更是鑊氣之作，惹味得來蛋香亦濃，配料亦和雞蛋緊緊相纏，每啖口感豐富。做法亦不難，只需將蝦仁、韭黃輕輕灼熟，炒蛋時就唔怕雞蛋熟而配料未熟。炒蛋要滑，鼎爺教落，鑊要夠熱，必要時可以燒熱鑊後，離火用餘溫炒蛋。
落手試煮！鼎爺埋身指導
睇完示範，係時候自己落手做。鼎爺則巡走全場逐個指導，見到學員不懂處理白鱔，執刀再提點；學員拿不起燒紅了的鐵鑊，更是親手幫助，好Nice！
即睇記者煮鱔初體驗
雖然烹飪班為二人一組，但時間緊迫，同一時間要醃好白鱔，又要將薑、蒜、陳皮、豆豉等切碎，還未準備熱水蒸鱔⋯⋯即使平時煮慣飯的小記，都有點手忙腳亂；面對第一次切鱔，更是心驚膽跳，好彩最後都成功變出一碟（斷了兩件的）盤龍鱔。
炒蛋輕敵俾鼎爺鬧！
輪到蟹柳蝦仁炒蛋，記者心想「炒蛋咋嘛，駛乜驚」，誰知在輕灼蝦仁時，被鼎爺捉到正！「蝦仁切到咁大粒，炒蛋時沾不上蛋塊，食落蛋還蛋，蝦還蝦架囡！」，小記個心真係離一離。果然，愈看似簡單易煮，愈不能輕敵。
還好總算力保不失，製成品依然有滑蛋狀，聞到韭黃清香，食落香口。
烹飪班完結之後，大家更可以拿著自己的製成品和鼎爺合照。Fans們更把握機會，繼續向鼎爺取經再Selfie，更有粉絲帶同鼎爺出版的食譜來攞簽名！
試玩後感：跪求加場！
今次的烹飪班確實好玩，能夠跟鼎爺本尊偷師，機會亦是難得。課堂上教的內容容易掌握，一些看似困難、花功夫的菜式，透過鼎爺教落的技巧和秘方，原來新手都可以做到。由處理食材、煮製，以及煮食冷知識，鼎爺都樂意指導，教得淺白，課室輕鬆，令人容易掌握之餘，也可以即時記入腦。不過只辦一場實屬太少，相信還有很多Fans想跟鼎爺學煮餸，希望將來可以加場吧！
Asia Miles亞洲萬里通餐飲體驗
參加方法：申請成為會員，即可報名參加各類型的會員專享體驗。詳情可參閱官方網站及Facebook專頁。
網址：https://www.asiamiles.com/am/zh/homepage
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
