陸績．明白 鹿鳴春 @呢啲嘢啊

鹿鳴春 -食記

生日早早請咗假，同友人行咗半天，仲食咗個甜品（明明我唔開心唔願意食甜嘢），再行完好多地方，晚上先約咗大班同事食飯。而佢哋知我好中菜而揀咗間尖沙咀的老店，鹿鳴春。聽就聽過「做冬食大閘蟹要去」得多，由細到大行過還沒K11的街上都唔少，上去食飯就真係第一次。食中菜最緊要就係呼朋叫友，唔係好難試得多幾味餸，而且圓桌坐起來也沒那麼興奮。

鹿鳴春 ，係一間商廈中的酒家。在街上，會見到酒家的霓虹燈招牌；再走入那舊式的大堂，更見「Peking Food Spring Deer Restaurant」的亞加力牌，這北京稱謂更見其歷史。上一層便到，推門那刻看到那多八十的陳設，不高的樓底，透白紗窗，膠地板，白光的假天花，花邊切割鏡片的柱身，好似個段香港最光輝嘅時刻，係呢間餐館，凝住了。

到了訂座的圓桌，隨則送上的就係酸菜花生，可憐同枱只有我呢個啊叔啱食。侍應快速上茶，端上的是水滾下沖的濃普洱，但係就無催過我哋落單，個人認為咁樣係好餐廳的基本要素。

雜錦冷盤
談笑間第一道送上的是冷盤，什錦的好處就係咩都有啲，上菜時五顏六色亦好看，厚薄適宜顯刀功，分別有海蜇、牛展(腱)、滷肉、甘筍及窩筍。海蜇粗大爽口，牛腱滷肉入味，甘筍窩筍清新爽口。作為一道京餐前菜，可稱得上引人入勝。

清炒蝦仁
圓碌碌的粉肉寶石，閃閃下咁真係令人垂涎，仲有個粒粒一樣齊齊整整，對我這完美主義者有太強的攻擊力。炒得乾淨，蝦香四溢，無咩多修飾，先見到師傅真功夫。

賽螃蟹
賽，有媲得上的意思，原只有炒起少魚肉多蛋白的菜式 ，卻因相頭與味道 具有魔力般的美味，與蟹肉有多分相似。呢樹炒的夠流身，唔會實的的，味道調較得適中，不需加醋也份外美味。我個人就很「呷醋」的，而且加埋醋就更似蟹。說實在，蛋比蟹各有其營養，而且蛋炒起來時要加上更多的油，睇相見到油亮亮就知。可是蛋比蟹為更易找更相宜的食材—不是蟹，卻似其外，更勝其內。

京燒羊肉
食羊與不食羊的朋友很極端，嗜羊為膻，不好亦為膻。這道菜可平衡失了點，把角度調至不好羊者那邊，反正我就吃不到重重的膻味。但濃醬汁補回不少分數，惹味而質地易沾卻不過稠。燒得也很好，肉實在嫩，帶燒出來的香。可是……還是不膻。應該很多人會愛吃吧！

砂鍋雲吞雞
嘩！好大一鍋。上枱就係講咗呢句，之後就傳來陣陣雞湯香。 端上的金屬盤具更顯此菜優雅復古 ，令佢變咗成餐重頭戲咁。雞煲得出哂味，肉易分而還剩些許雞味。雖說這是雞的菜式，但係我覺得呢道菜更重要的是雲吞與湯。

雲吞有水準，厚皮但蝦香而有大地魚味，魚粉落得剛好，帶起蝦鮮。很多人雞湯係煲得夠哂耐的，一點燥都無，令我飽飽地都啪咗三碗，而且雞湯嚟講，佢一啲都唔油。講起都想飲返碗…

酸甜蝦球
碟上橙色寶石顆顆，賣相吸引。咬落粒粒炸得鬆脆，呢種滋味比得上夠級數的生炒排骨。味道開胃，對剛品下三碗暖湯後嘅我，有種打機補咗血繼續嘅力量。風華外表，但不多留情，掛上不多不少的糖醋汁，成碟食哂，無多餘的醬汁留於碟上，淨係有一圈圈的波紋足印。真係淡淡交匯過，各不留下印…

北京填鴨
係上緊其他菜的同時，師傅已經係遠處準備好鴨一大隻喺度切，我仲不忘影低佢。好多酒樓都係搵經理、部長、甚至侍應等等唔係做廚的「二打六」頂當去切隻填鴨，起碼呢樹就有位頭戴廚帽，全白衣身的廚子落刀，襯埋個背景，就有幾分當年電影《滿漢全席》中各路廚師的影子。

上碟的填鴨，個個圓狀，片片肉皮平均，香脆肥瘦各存。仲俾一大碟醬，唔洗就住就住點。甜麵醬香濃，大荷葉餅包皮加上小生蔥，包上即食，酥油滿腔，無人頂得住。包皮呢度就比起街上吃的厚身，也沒用濕濕的蒸籠上，食落較粗豪，亦都好快令人飽水…軟軟的包皮配上香脆的鴨皮，樸實的味道配上油香滿滿的肉，不愧京菜之首。鹿鳴春將此御膳煮得剛溫不火，好樣的！

本還想點個豆沙吃吃甜，但所點嘅呢堆看起來不多的菜，已經夠份量咁殺飽胃。就如同北京姑娘般，樣白美身如燕，看輕她你就要受罪了…

鹿鳴春這老店，與我見過間間出色的老字號一樣，是一間夠火侯的餐廳。侍者為多年伙計，識do識服務，識睇穿客人眉頭眼額，未揚手人已到。味道總有種剛剛好的感覺，咸一點油一點也不，就剛剛勾到你的胃口，食落知味。賣相不會太豪太華麗，帶點古舊下的實在，是隱世高手才會大隱隱於朝，中隱隱於市。倚老賣老，也需有種高強技巧，不變應萬變的心態。一味叫創新的現世，會否明白？

另外，謝謝您們。

要知道，同事能作個面笑心恨的很容易，要作個知心知己，講得出係堅·朋友有幾多。我慶幸，在公司能遇到一班會俾我用爛gag，食字無聊冷笑話惹得工作間熱哄的您們。

Ed
呢啲嘢啊? (edyeah.blogspot.hk)