荃灣DONKI「鮮選壽司」推壽司放題！$280無限任食壽司＋拖羅刺身

相關文章：荃灣DONKI鮮選壽司詳細介紹

荃灣DONKI「鮮選壽司」$280壽司放題！

近日有threads友發文分享Donki迴轉壽司店「鮮選壽司」新推出壽司放題，成人每位$280即可無限任食壽司，食足2小時，每位加$100仲可以任飲啤酒和威士忌梳打。雖然Menu只標示壽司任食，但threads友表示價錢包埋刺身任食，連拖羅、帶子、海膽、三文魚、甜蝦等一律無限任點，大讚質素不錯，食足30碟！除了壽司放題，另外還有螃蟹壽司放題選擇，每位$480即可無限任食日本螃蟹及壽司，暫時未有threads友去試，各位蟹迷又會唔會想食呢？

DONKI迴轉壽司店「鮮選壽司」平時供應約100多種季節性食材炮製的食物款式，用料來自日本及世界各地，講到必食的，一定是藍鰭吞拿魚及三文魚壽司，拖羅油香十足，入口即融，食多幾件已回本！另外炙燒及刺身海老壽司等款式。最平$12碟，定價親民，今次$280就食到多款人氣款式壽司及刺身，大胃王去挑戰下啦！

其他壽司逐件睇

鮮選壽司壽司米都有講究，用北海道七星米來做，米粒充滿光澤、黏性和甜味都十分平衡。 壽司醋則用純米大吟釀及兩種紅醋混合而成，煮米時亦會加入北海道產利尻昆布、鹿兒島縣鰹節煮高湯，食落更加可以為魚材提鮮！壽司方面提供逾百款選擇，三文魚用上挪威養殖的三文魚，鮮甜豐腴；火炙香蔥赤海老經炙燒後，醬汁及香蔥表面燒得焦香，入口鮮甜滿溢；油甘魚晶瑩剔透，入口油脂均勻；原條穴子大件過手掌，而且入口啖啖肉，配着鰻魚醬汁好惹味。