創意 順德菜 美味推介＠DINING娜

text: DINING娜

順德菜向來以「食不厭精，妙在家常」見稱，講求嘅除咗食材要夠新鮮，廚師嘅烹調技術亦要夠精湛，必須具備三工：刀工、手工同煮工，令一道睇落簡單嘅菜式，亦可以睇到師傅喺烹調時細緻嘅做法。最近聽講譽宴會推出一個全新嘅順德菜menu，我Dining娜就梗係要即係去試下啦，睇下師傅功架係咪真係咁了得嘛！

8大 順德菜 推介!

一問之下，先知原來呢間舖頭嘅大廚黎師傅，入廚已經超過20年，仲喺今年嘅美食之最大賞拎咗唔少獎，包括蛋組嘅「至高榮譽金獎」同今年新增嘅「至Like廚師」獎項！今次個menu就係由佢全新設計，喺傳統順德菜嘅食材配搭上玩玩新意，等大家重新認識順德菜嘅精妙之處。即刻睇睇有咩好推介！

鳳凰乳液繞玉龍

炒蛋睇落簡單，其實好難！要滑得嚟帶少少濕潤，配料又唔可以煮得太老，呢道菜就完全符合晒以上要求啦！

提到順德菜，當然唔少得河鮮。師傅將新鮮河蝦開邊炸熟，加入蝦苗、煙肉、蒜蓉、辣椒乾略炒，有大蝦小蝦，炮製成呢道蝦兵蝦將。

大家一定要試試呢個燉湯，佢係集香、滑、鮮、甜於一身，而且用料十足，滋補減燥，啱晒而家開始入秋嘅時候飲用。

燘豬手大家都食過，燘德國鹹豬手你又有冇試過？師傅用咗中菜西煮嘅概念同做法，令菜式香濃惹味得嚟，唔會好似傳統粵菜咁太過油膩。

以茶果子取代麵包糠，令煎炸魚餅嘅過程減少油分吸收，同時亦增加魚餅嘅口感層次，咬落香口又煙韌。

上菜前侍應會喺你面前加入四款調味，快炒一下之後就會上枱。淨係嗰陣香味就已經令人流晒口水，而我就最鍾該佢雞肉有嚼頭唔會過腍，果然係真正嘅走地雞！

粥油水煮鯪魚球

同以往食開嘅鯪魚球豆腐煲好唔同，加咗白粥熬製嘅汁鮮味好多，仲配埋人氣紫薯做配料，即時加晒分啦！

師傅用咗水盆海參，配紫洋蔥、淮山、雲耳同彩椒快炒，口感清爽，證明師傅煮嘅時候鑊氣夠，火候控制得啱啱好。

譽宴

地址：銅鑼灣波斯富街99號利舞臺廣場5樓（顯示地址）

電話：2811 9181

營業時間：8:30am-12:00mn

平均消費：$100-$200

備註：另收服務費12%，收現金及信用卡。