韓式大排檔 襲港! 必試首爾風味辣肉腸 |旺角食乜好|

撰文：Ning | 攝影：霖

革命一：潮跟韓劇綜藝 韓式大排檔 熱炒上枱

愛煲韓劇的，通常都會睇過一兩幕，是主角們坐在透明帳篷下，飲酒食嘢。這種食店，在韓國叫「布帳馬車」，有點像港式的大牌檔，主要供應即製的韓式快炒和簡便小食，食物普遍以辣和濃味為主，適合佐酒。
上年以炸雞和巨盤芝士拉骨攻港的釜山名店Outdark，最近就以布帳馬車為題，推出數款香港少見，但韓國國民大愛的大牌檔小食，原煲原鑊上枱，夠晒風味。必食烈火炒豬肉腸，與年糕、雜菜及韓式辣醬炒製，惹味激辣，叫返支韓國燒酒下火降溫是基本吧！

另外還有韓式田螺拌麵，以韓國南部出產的田螺和蔬菜絲，加上辣醬和醋涼拌成沙律，配韓式冷麵同食，再呷一口冰涼啤酒，暑氣全消。每碟份量頗多，適合三、四人分享，而且附有Gas 爐保溫，一於Call 齊朋友慢慢歎，來個另類韓式Happy hour！

「布帳馬車」知多啲
韓文是포장마차（讀音：Po-jang-ma-cha），即是韓國街頭的小食車或路邊攤，布帳是指車上搭建的小帳篷，與日式屋台類似。主要分兩種，一種是不設座位，要站著吃的小食檔；另一種就是坐住食，點菜配酒，由阿珠媽即叫即煮的熱炒攤檔，是韓國打工仔下班後喝酒relax的聚腳地。

Outdark
地址：旺角彌敦道613號飛達商業中心2樓（顯示地圖）
電話：2892 0877
營業時間：5pm – 2am
備註：設加一、收信用卡、尖沙咀分店同步供應

革命二：精緻擺盤扮韓景 平價高質食fusion菜

剛開業的韓半島，由Jun 和Jenny 這對年輕大廚主理，兩人曾於韓國烹飪最高學府修讀烹飪藝術，數年前更在澳門米芝蓮二星餐廳The Tasting Room 當廚，創造出一系列揉合西式和韓式的fusion 菜，也將某些韓菜食材的形態改變，例如韓式生牛肉的雪梨絲，變為梨蓉醬。最驚喜就是將韓國當地一些景點風貌、習俗文化，利用食物的擺位呈現出來。

以清新翠綠的沙律代表風景怡人的濟州島；慢煮五花腩肉疊放排列，扮成雪嶽山的恐龍稜線地貌。雖然部分菜式頗考想像力，但論精緻度，確實有心思，至少影相呃Like 的時候，別人也未必估到你在吃韓菜。而且價錢經濟，最平$68， 最貴也只是$158， 味道和品質都拍得住fine-dining 級數，絕對抵食！

代表景點：濟州島
相似度：★★（ 濟州花草多，都算講得通。）

智異山日出時分 $118
新鮮澳洲生牛腰脊肉混入麻油，食時拌上鵪鶉蛋、雪梨蓉及甜醬油黑醋，風味與韓式生牛肉一樣，微微的醋酸更能帶出牛肉鮮香及甜味。

代表景點：智異山
相似度：★（ 純粹意境，想像吓。）

島潭三峰繁花盛開 $158
參照韓國甜醬油燉牛肋肉，質感軟腍帶嚼勁，味道香甜，牛肉味濃郁；再將傳統的薯仔、蘿蔔變成薯蓉和蘿蔔條，層次更豐富。

代表景點：智異山老姑壇
相似度：★★（影相角度的重要性，你懂的。）

韓半島Hanbando
地址：尖沙咀厚福街8號H8 1樓（顯示地圖）
電話：2369 7433
營業時間：12nn – 11:30pm（逢星期一休息）
備註：設加一、收信用卡、可供訂座

革命三：極罕濟州韓牛駕到 落入凡間變飯盒

韓牛在香港的價錢，一直都是堅離地，餐廳食隨時過千；親自下廚，每100克也最少索價二百。我等平民想食有無計？有。韓食快餐店Kim’s Bowl最近就以親民價推出韓牛碗飯，更首度獨家引入濟州韓牛，而非年初到港的全羅道、京畿道韓牛，絕對是超破格！
據說濟州的韓牛產量特別少，單是2015年獲評級最高1++ 的濟州韓牛產量就不足全國的10%。店子的醬燒韓牛配炒冬菇碗飯用上50g 的1+ 級的韓牛肩頸及脊肉，切成粒狀後以韓式醬料輕醃，再加入冬菇、洋葱等配菜炒成，再配白飯都只是$70有找。

同場更有韓牛飯糰，$18就有交易， 非常抵食，Lunch 食韓牛外賣飯盒，簡直霸氣盡現。

Kim’s Bowl
地址：荃灣惠荃道22-26號綠楊坊1樓F4號舖（顯示地圖）
電話：2455 1300
營業時間：10:30am – 9:30pm
備註：不設加一，只收現金、港鐵旺角東站分店同步供應