靚料火鍋放題@Dining娜

(Presented by三禾中日料理)

話說早幾日同朋友行尖沙咀，諗住去三木日本料理食放題，點知發現同一棟大廈入面，開多咗間叫「三禾」嘅餐廳，雖然飲食業競爭好大，但都唔洗打對台打得咁明顯掛？好奇心驅使下，我地決定上去試下。

哦，原來三禾中日料理係三木嘅姊妹店，專食火鍋放題嘅。入面啲位都幾寬敞，仲有4間獨立房俾人book嚟開party，老闆話好快就會裝埋大電視俾大家睇波，認真識做！

A5和牛任食

打邊爐點可以冇牛？呢度供應嘅牛全部都係上等貨，最低級嗰款已經係安格斯牛，肉質口感拍得住和牛，肉味較重，只係二百幾蚊就可以任食；高級啲有美國飼養嘅SRF極黑和牛同日本A5宮崎和牛，前者肉質幼嫩，牛肉味最濃郁，後者油花靚到好似大理石紋，食落好juicy，有入口即溶嘅感覺，真心講淨係食牛都已經回晒本。除咗牛肉，menu仲有熊本豬梅肉、紐西蘭羊肉同雞件等選擇，唔食牛嘅朋友一樣有靚肉揀。

特色手作

三禾有唔少用心製作嘅配料，手打墨魚滑、蝦滑、鯪魚滑同黑松露豚肉滑都係我嘅心水推介，其中蝦滑入面食到粒粒蝦肉，爽口彈牙；黑松露豚肉滑夠晒創新，味道鮮香。自家製流心水晶包有芋蓉同豆沙2款口味，皮薄餡靚，特別之處佢唔係一款即食甜點，同樣屬於火鍋配料，需要烚一烚先食。

包心肉丸

丸類都好有特色，手打鵝肝鮮牛肉丸入面包住原粒鵝肝，鵝肝味滲晒落牛肉度，即時令層次昇華；薑汁皮蛋貢丸將豬肉、淡淡嘅薑味同濃味嘅皮蛋混合，估唔到食落味道又幾夾；仲有就係爆醬芝士牛丸，芝士同牛肉嘅比例差不多1比1，一咬就爆漿，非常「芝」味，不過要小心燙嘴。

鮮味之選

海鮮一樣冇欺場，新鮮之餘選擇又多，魷魚、鯇魚片呢啲基本嘢唔少得，另外仲有紐西蘭青口、原隻虎蝦同三文魚頭骨腩呢類少見放題配料，白鱔片更係每日限定得幾條，賣晒就冇；鍾意生食可以揀刺身，帆立貝、鮑魚片、赤貝片等都係任叫任食，抵到冇朋友。

滋味小食及甜品

餐前餐後可以食下小食甜品。小食分別有滷水同麻辣系列，滷水好入味唔會太鹹，特別係金錢肚，有咬口得嚟又夠腍；麻辣小食都幾有四川風味，青瓜豬耳超爽，夠晒醒胃。甜品全部自家製，份量細細，試多幾款都唔怕滯，最鍾意係即焗心太軟，一切開香濃嘅朱古力漿流晒出嚟，甜而不膩，配埋雲尼嗱雪糕冷熱交替，簡直最高享受。

後記：

提提大家，甜品總廚每日都會為熟客或者有預先order嘅客人預備menu以外嘅限定甜品，例如Strawberry Mess、Mango Crumble同士多啤梨芝士塔拼軟心朱古力等，想食就要留意facebook update喇！

三禾中日料理
地址：尖沙咀加拿分道25-31號國際商業信貸銀行大廈8樓（顯示地址）
電話號碼：3188 5609
Facebook：三禾中日料理 （火鍋專門店）